مىسىردا ۇستالعان قازاقستاندىق التى ازامات ەلگە قايتىپ جاتىر، دەپ حابارلايدى Qamshy.kz اقپارات اگەنتتىگى. بۇل تۋرالى ق ر ءسىم باسپا ءسوز قىزمەتىنىڭ جەتەكشىسى ءانۋار جايناقوۆ فەيسبۋكتەگى پاراقشاسىندا ءمالىم ەتتى.

«قازاقستاندىق ديپلوماتتار ەلىمىزدىڭ 6 ازاماتىن قازاقستانعا قايتارۋ ءۇشىن ولاردى كاير اۋەجايىنا جەتكىزەدى.

1 تامىزدا كەشكى ۋاقىتتا مىسىردىڭ ۇلتتىق قاۋىپسىزدىك قىزمەتى قازاقستان ەلشىلىگىمەن بايلانىسقا ءتۇسىپ، ۇستالعان قازاقستاندىق جاستاردىڭ ەلگە قايتارىلاتىنىن حابارلادى.

قازاقستان ەلشىسى بىردەن اۋەجايعا بەت الىپ، قازاقستاندىق ازاماتتارمەن كەزدەستى. جاقىن ۋاقىتتا 6 ازامات قازاقستاندا بولادى. ولاردىڭ جاعدايلارى جاقسى»، - دەپ جازدى جايناقوۆ.

الايدا ازاماتتاردىڭ ۇستالۋ سەبەبى ءالى انىقتالماعان. مىسىر بيلىگىنىڭ مالىمەتىنشە، قۇقىق قورعاۋ ورگاندارى قازاقستاندىقتاردىڭ ۇستالۋىنا بايلانىستى قوسىمشا مالىمەت بەرەدى.

ايتا كەتەيىك، بىرنەشە كۇن بۇرىن قازاقستاندىق 6 ستۋدەنتتىڭ مسىرىدا ءىز-تۇسسىز جوعالعانى حابارلانعان. ىزدەۋ جۇمىستارى ناتيجەسىندە 6 ستۋدەنتتى كايردىڭ قۇقىق قورعاۋ ورگاندارى ۇستاپ وتىرعانى انىقتالدى.