وڭتۇستىك قازاقستان وبلىسىندا ۇبت-دان 100-دەن جوعارى بالل جيناعان وقۋشىلار سانى 4113-كە جەتتى. بۇل وتكەن جىلمەن سالىستىرعاندا 675 وقۋشىعا ارتىق. ال 100-دەن 120 بالعا دەيىن جيناعاندار سانى – 3004، 121 مەن 140 بالل ارالىعىندا جيناعاندار – 1109 وقۋشىنى قۇرادى. بۇل تۋرالى ۇلتتىق ءبىرىڭعاي تەستىلەۋ مەن قابىلداۋ ەمتيحاندارىنىڭ قورىتىندىلارى تالقىلانعان ۇكىمەتتىڭ كەزەكتى سەلەكتورلىق وتىرىسىندا بەلگىلى بولدى. ونلاين وتكەن جيىنعا وبلىس اكىمى جانسەيىت تۇيمەبايەۆ جانە وڭىردەگى سالا جەتەكشىلەرى قاتىستى، دەپ حابارلايدى Qamshy.kz اقپارات اگەنتتىگى وقو اكىمىنىڭ باسپا ءسوز قىزمەتىنە سىلتەمە جاساپ.
جالپى رەسپۋبليكا بويىنشا ۇبت-عا 88 595 تۇلەك قاتىسىپ، ب ا ق سىناعان. بۇل ءوتىنىم بەرگەندەردىڭ 95 پايىزىن قۇرسا، تەستىلەۋ قورىتىندىسىنا سايكەس رەسپۋبليكا بويىنشا ورتاشا كورسەتكىش 80،5 بالدى قۇرادى.
ال وڭتۇستىك قازاقستان وبلىسى بويىنشا 2016-2017 وقۋ جىلىندا 11 سىنىپتى 32 871 وقۋشى ءبىتىردى. ولاردىڭ 21 668 نەمەسە 78،2 پايىزى ۇلتتىق ءبىرىڭعاي تەستىلەۋ تاپسىرۋعا ءوتىنىش بەرىپ، 21 323 ءبىتىرۋشى تەستىلەۋگە قاتىسقان. تەستىلەۋگە قاتىسپاعان 345 وقۋشىنىڭ 312ء-ى ءوز وتىنىشىمەن، 29 دەنساۋلىعىنا بايلانىستى، ال 4 وقۋشى قازاقستان رەسپۋبليكاسى ءبىلىم جانە عىلىم مينيسترلىگىنىڭ بۇيرىعىمەن (حالىقارالىق وليمپيادا جانە عىلىمي جوبا جەڭىمپازى) ۇبت-دان بوساتىلعان. 2017 جىلعى ۇبت قورىتىندىسىمەن وبلىستىق تۇلەكتەردىڭ ورتاششا كورسەتكىشى 76،8 بالدى قۇرادى.
بيىل ۇبت ەرەجەسىنە سايكەس تەست تاپسىرعان 21 323 ءبىتىرۋشىنىڭ 882 نەمەسە 4 پايىزى شىعارماشىلىق ەمتيحانعا قاتىستى. شەكتى دەڭگەيدەن وتپەگەن ياعني 50 بالدان تومەن جيناعان وقۋشىلار سانى – 2 776. مەجەلىك دەڭگەيدەن وتپەگەندەر تەستىلەۋدەن قايتادان وتە الادى. قۇجاتتاردى قابىلداۋ 1-8 تامىز ارالىعىندا، ال تەستىلەۋ 19-24 تامىز ارالىعىندا وتەدى. تالاپكەر مەجەلىك دەڭگەيدەن ەكىنشى رەتتە دە وتپەي قالعان جاعدايدا جوعارعى وقۋ ورىندارىندا ءبىر سەمەستر اقىلى وقي الادى.
وبلىستاعى 1347 التىن بەلگى يەگەرلەرىنىڭ 1327ء-سى ۇبت-عا قاتىستى. تەستتەن بوساتىلعان 20 وقۋشىنىڭ ۇشەۋى حالىقارالىق وليمپيادا جانە عىلىمي جوبا جەڭىمپازى بولسا، 17ء-سى – شەتەلگە گرانتپەن وقۋعا تۇسكەندەر.
ەسكە سالا كەتەيىك، وبلىس مەكتەپتەرىنىڭ بىتىرۋشىلەرى رەسپۋبليكا بىتىرۋشىلەرىنىڭ 25 پايىزىن قۇراسا، ۇلتتىق ءبىرىڭعاي تەستىلەۋ تاپسىراتىن رەسپۋبليكا بىتىرۋشىلەرىنىڭ 23،7 پايىزى وڭتۇستىك قازاقستان وبلىسىنىڭ تۇلەكتەرى.
پىكىر قالدىرۋ