ەلىمىزدە ينتەرنەت-تولقۇجات زاڭداستىرىلادى. ونلاين-قۇجات ازاماتتاردى قاشىقتىقتان تىركەۋ جوباسى اياسىندا قولعا الىنعان. قازىرگى تاڭدا ۇلتتىق بانكتىڭ ارنايى توبى قاجەتتى جۇمىستاردى جۇرگىزىپ جاتىر. بۇل تۋرالى Qamshy.kz اقپارات اگەنتتىگى  abctv.kz مالىمەتىنە سۇيەنىپ حابارلايدى.

بۇل باستاماعا اقپارات جانە كوممۋنيكاسيا مينيسترلىگى، «زەردە» حولدينگى، ءبىرىنشى نەسيە بيۋروسى مەن ءىرى بانكتەر دە قولداۋ كورسەتىپ وتىر. بۇگىندە جوبانىڭ تۇجىرىمداماسى جاسالعان. وعان سايكەس ازاماتتار حالىققا قىزمەت كورسەتۋ ورتالىقتارىندا، قازپوشتادا، بانك بولىمشەلەرىندە وزدەرىنىڭ مالىمەتتەرىن وتكىزە الادى. ياعني، داۋىس جازباسى، كوز قاراشىعى، ساۋساق ىزدەرى، ەلەكتروندى قولتاڭباسى مەن فوتوسۋرەتىن تىركەتۋى ءتيىس. ساندىق ءتولقۇجات قازاقستاندىقتارعا كەز كەلگەن قارجى جانە وزگە دە قىزمەتتەردى قاشىقتىقتان الۋىنا مۇمكىندىك بەرەدى. جۇيەنىڭ نەگىزىن حالىقارالىق مورفوبيومەتريالىق كومپانياسى جاساپ بەرەدى. ازىرگە جۇيەنى ەنگىزۋ مەرزىمى بەلگىسىز.

«ينتەرنەت-تولقۇجات كوپمودالدى بيومەتريالىق ءونىم، قىزمەت. ول ادامنىڭ ساۋساق ىزدەرى، كوزدەرى مەن داۋسى ارقىلى تۇلعاسىن انىقتايدى. وسىلايشا كەز كەلگەن وپەراسيانى ورىنداۋعا بولادى. سونداي-اق، تۇتىنۋشىعا قاشىقتىقتان قىزمەت كورسەتىلەدى. بۇل قوعامعا ساندىق جۇيەنى ەنگىزۋدە ۇلكەن ءرول اتقارادى»،- دەدى «ءبىرىنشى نەسيە بيۋروسىنىڭ» باس ديرەكتورى رۋسلان وماروۆ.