«قازاقستان-2050» جالپىۇلتتىق قوزعالىسى ق ر ۇلتتىق اكادەميالىق كىتاپحاناسىمەن بىرلەسىپ، 4 تامىز كۇنى «MEGA Silk Way» وسو-دا «Men qoldaimyn» شاراسى اياسىندا «Qazaq kitaptary 1929-1940» اتتى لاتىن الىپبيىمەن جازىلعان كىتاپتاردىڭ كورمەسىن وتكىزەدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.
جالپىۇلتتىق باسپا ءسوز قىزمەتىنىڭ مالىمەتىنشە، شارانىڭ نەگىزگى ماقساتى - مەملەكەت باسشىسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا ايتىلعان كيريلليسا نەگىزىندەگى قازاق ءالىپبيىن لاتىن الىپبيىنە كوشىرۋ باستاماسىنا قولداۋ ءبىلدىرۋ.
كورمەگە قازاق زيالى قاۋىم وكىلدەرىنىڭ 1929-1940 جىلدارى شىققان ەڭبەكتەرى قويىلادى. سونىمەن قاتار، شەتەلدىك اقىن-جازۋشىلاردىڭ ەڭبەكتەرىن دە وسى كورمەدەن تاماشالاۋعا بولادى.
مەملەكەت باسشىسى نۇرسۇلتان نازاربايەۆ: «لاتىنشاعا كوشۋدىڭ تەرەڭ لوگيكاسى بار. بۇل قازىرگى زامانعى تەحنولوگيالىق ورتانىڭ، كوممۋنيكاسيانىڭ، سونداي-اق، ءححى عاسىرداعى عىلىمي جانە ءبىلىم بەرۋ پروسەسىنىڭ ەرەكشەلىكتەرىنە بايلانىستى» دەپ اتاپ وتكەن بولاتىن.
لاتىن ءالىپبيى نەگىزىندەگى قازاق ءالىپبيىن جاساۋ يدەياسىن وتاندىق عالىمدارمەن قاتار شەتەلدىك عالىمدار قولدادى. قازىرگى ۋاقىتتا قوعام تالقىسىنا كەڭىنەن سالىنىپ، حالىق تاراپىنان قولداۋ تاپقان باستاماعا «قازاقستان-2050» جالپىۇلتتىق قوزعالىسى دا ءۇن قوسىپ وتىر.
پىكىر قالدىرۋ