«الماتى حالىقارالىق اۋەجايى» اق جۇكتەردىڭ قوزعالىسىن باقىلاۋدىڭ جاڭا جۇيەسىن ەنگىزدى، دەپ حابارلايدى Qamshy.kz اقپارات اگەنتتىگى.

جولاۋشىلاردى تاسىمالداۋدى ۇيىمداستىرۋ قىزمەتىنىڭ باسشىسى اناتوليي يۋزەفوۆيچتىڭ ايتۋىنشا، بۇل جۇيە ءقازىر تەستىلىك رەجىمدە جۇمىس جاساپ تۇر.

ايتا كەتۋ كەرەك، بۇعان دەيىن جۇكتى اۋەجاي قىزمەتكەرلەرى وزدەرى جايعاستىراتىن. سونداي-اق، باگاجدىڭ قايدا بارا جاتقانىن انىقتاۋ مۇمكىن ەمەس ەدى.

«11 شىلدەدەن باستاپ جۇيە تەستىلىك رەجىمدە جۇمىس جاساپ تۇر. وسى ۋاقىت ارالىعىندا بەلگىلى ءبىر اقاۋلار بولسا جوندەپ جاتىرمىز. بىزدەرمەن 25 اۋە كومپانياسى جۇمىس جاسايدى. ءار كومپانيامەن ولاردىڭ تىركەۋ ءنومىرى مەن BRS (Bag Reconciliation System) جۇيەسىنىڭ سايكەستىگىن تەكسەرىپ، كەلگەن تەلەگراممالاردى وڭدەپ جاتىرمىز»، - دەدى «الماتى حالىقارالىق اۋەجايى» اق جولاۋشىلاردى تاسىمالداۋدى ۇيىمداستىرۋ قىزمەتىنىڭ باسشىسى اناتوليي يۋزەفوۆيچ.

«الماتى حالىقارالىق اۋەجايى» اق فەيسبۋكتەگى پاراقشاسىندا جاريالانعان اقپاراتقا سايكەس، BRS (Bag Reconciliation System)  جۇيەسى تىركەلگەن جۇكتەردىڭ  ۇشاق بورتىنا ەنۋىن باقىلاپ وتىرادى. جاڭا جۇيە جۇكتەردىڭ جوعالۋىن ازايتىپ، اۋەجايداعى جۇك جەتكىزۋ جۇمىسىن جەدەلدەتۋگە سەپتىگىن تيگىزبەك.