ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ مىسىردا ۇستالعان قازاقستاندىق ستۋدەنتتەرگە قاتىستى  پىكىر ءبىلدىرىپ، قازاقستاندىقتاردى شەتەلگە وقۋعا رەسمي جولداماسىز بارماۋعا شاقىردى. استانادا بەيسەنبىدە جۋرناليستەرمەن كەزدەسكەن ەرمەكبايەۆ شەتەلگە "كۇماندى" وقۋ ورىندارىندا ءدىني ءبىلىم الۋعا كەتكەندەرمەن بيلىك جۇمىس ىستەيتىنىن دە ايتتى، دەپ حابارلايدى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

"قازاقستان مۇسىلماندارى ءدىني باسقارماسىنىڭ (قمدب) جولداماسىنسىز ءدىني ءبىلىم الىپ، قمدب قۇرىلىمىنا جۇمىسقا ورنالاسۋعا بولمايدى" دەدى مينيستر.

مىسىردا بىرگە پاتەر جالداپ تۇرىپ جاتقان التى قازاقستاندىق 20 شىلدەدەن بەرى بايلانىسقا شىقپاعان. 25 شىلدەدە مينيسترلىك ولاردى پوليسيا ۇستاعانىن حابارلاعان.

ال 2 تامىزدا ەگيپەتتە قاماۋدا وتىرعان قازاقستاندىق التى ستۋدەنتتىڭ قازاقستانعا دەپورتاسيالاناتىنى حابارلانعان. بيلىك ولاردىڭ نە سەبەپتى ۇستالعانىن ايتپاي وتىر. بۇعان دەيىن قازاقستان سىرتقى ىستەر مينيسترلىگىنىڭ باسپا ءسوز حاتشىسى ءانۋار جايناقوۆ بيلىك ۇستالعان قازاقستاندىقتاردى ەكسترەميستەر دەپ سانامايتىنىن ايتقان.

رەسمي مالىمەت بويىنشا، ءقازىر شەتەلدەردە بىرنەشە ءجۇز قازاقستاندىق ءدىني ءبىلىم الىپ جاتىر. بيلىكتىڭ دەرەگىنشە، سوڭعى بىرنەشە جىلدا قازاقستاننىڭ جۇزدەگەن ازاماتى سيريا مەن يراكتاعى ەكسترەميستىك توپتار قاتارىنا قوسىلعان.