مەملەكەت باسشىسىنىڭ تاپسىرماسىمەن ق ر پرەمەر-مينيسترى باقىتجان ساعىنتايەۆ جۇمىس ساپارىمەن اقمولا وبلىسىنا باردى، وندا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى مىندەتتەردى ىسكە اسىرۋ بارىسىمەن تانىسادى دەپ حابارلايدى Qamshy.kz اقپارات اگەنتتىگى ق ر پرەمەر-مينيستىرىنىڭ باسپا ءسوز قىزمەتىنە سىلتەمە جاساي وتىرىپ.

وڭىرگە بارعان باقىتجان ساعىنتايەۆ ءبىرىنشى كەزەكتە «ەسىل اگرو» ج ش س ءسۇت-تاۋار فەرماسى مەن ەگىس القاپتارىن ارالادى، وندا اۋىل شارۋاشىلىعى ءوندىرىسىنىڭ تەحنولوگيالىق ەرەكشەلىكتەرىمەن جانە كاسىپورىندى ودان ءارى دامىتۋ كەلەشەگىمەن تانىستى.  

باقىتجان ساعىنتايەۆ ءسۇت فەرماسىن ارالاۋ كەزىندە كاسىپورىننىڭ وندىرىستىك ۇدەرىستەرىمەن جانە دايىن ونىمدەر كورمەسىمەن تانىستى. ق ر پرەمەر-مينيسترىنە مۇندا وندىرىستىك قۋاتتىلىقتى 2 ەسەگە دەيىن ۇلعايتۋ جانە ساۋىن تابىنىن 2 400 باسقا دەيىن جەتكىزۋ كوزدەلىپ وتىرعانى تۋرالى اقپارات بەرىلدى. 

بۇدان كەيىن باقىتجان ساعىنتايەۆ «ەسىل اگرو» ج ش س ەگىستىگىندە بولدى، وندا اقمولا وبلىسىنىڭ اۋىل شارۋاشىلىعى باسقارماسىنىڭ باسشىسى مۇرات بالپاننىڭ ەگىن جاعدايى تۋرالى بايانداماسىن تىڭدادى. 

ايتا كەتۋ كەرەك، ق ر پرەزيدەنتى ن. نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنا سايكەس وسىنداي كاسىپورىنداردى اشۋ ەلىمىزدە ەكونوميكالىق ءوسىمنىڭ جاڭا مودەلىن قالىپتاسىرۋ كەزىندە ماڭىزدى باعىتتاردىڭ بىرىنە اينالۋى ءتيىس. وسىعان وراي، بۇگىنگى كۇنى اوك دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى اياسىندا وتاندىق اۋىل شارۋاشىلىعى وندىرۋشىلەرىنە كەشەندىك قولداۋ كورسەتىلىپ جاتىر. وندا جەڭىلدىكپەن نەسيەلەندىرۋ مەن قولداۋ كورسەتۋدىڭ وزگە دە تەتىكتەرى قاراستىرىلعان. 

بۇگىن باقىتجان ساعىنتايەۆ وندىرىستىك جانە اۋىل شارۋاشىلىعى كاسىپورىندارىنىڭ، سپورت جانە تۋريستىك ينفراقۇرىلىم نىساندارىنىڭ جۇمىسىمەن تانىسادى، ولاردىڭ ىشىندە «ەسىل-اگرو» ج ش س، «تىنىس» اق، ششۋچينسك قالاسىنىڭ شاڭعى سپورتىنىڭ رەسپۋبليكالىق بازاسى، سونداي-اق بۋراباي اۋىلىنىڭ تۋريستىك نىساندارى بار.   

ق ر پرەمەر-مينيسترى ششۋچينسك-بۋراباي كۋرورتتىق ايماعىن دامىتۋ ماسەلەلەرى جونىندە كەڭەس، «اتامەكەن» كاسىپكەرلەر پالاتاسىنىڭ وڭىرلىك كەڭەسىنىڭ مۇشەلەرىمەن كەزدەسۋ، سونداي-اق ءونىمدى جۇمىسپەن قامتۋ جانە جاپپاي كاسىپكەرلىك باعدارلاماسى مەن «Cەرپىن» الەۋمەتتىك جوباسىن ىسكە اسىرۋ تۋرالى كەڭەس وتكىزەدى دەپ كۇتىلۋدە.

بۇدان وزگە، باقىتجان ساعىنتايەۆ كوكشەتاۋ قالاسىنىڭ جۇمىسپەن قامتۋ ورتالىعىنىڭ جۇمىسىمەن جانە «ششۋچينسك – بۋراباي» اۆتوجولىن جوندەۋ ساپاسىمەن تانىسادى.