ەلىمىزدىڭ ۇلتتىق رۋحاني قۇندىلىعىن وزگە ەل الدىندا تانىتاتىن بىردەن-بىر ەسكەرتكىشتەرگە از-كەم توقتالساق. تۇركىستان قالاسىنان وڭتۇستىككە قاراي 4 شاقىرىم جەردە تۇركىستان-شاۋىلدىر اۆتوكولىك جولىنان سولعا قاراي 500 مەتر قاشىقتىقتا گاۋھار انا كەسەنەسى ورنالاسقان.  اڭىز سارىنىنا، شەجىرە دەرەكتەرىنە سۇيەنسەك قوجا احمەت ءياساۋيدىڭ قىزى گاۋھار انامىزدىڭ بەيىتىنىڭ باسىنا ءوز زامانىندا كۇيگەن كىرپىشتەن كىشىگىرىم كەسەنە تۇرعىزىلىپتى، دەپ حابارلايدى Qamshy.kz اقپارات اگەنتتىگى "ازىرەت-سۇلتان" قورىق مۇراجايىنىڭ باسپا ءسوز قىزمەتىنە سىلتەمە جاساپ.

الايدا، حح عاسىردىڭ باسىنداعى سۇرقيا ساياساتتىڭ سالدارىنان كەسەنە بۇزىلىپ، كىرپىشى تونالعان ەكەن. بۇل ولقىلىقتى ءىستىڭ ورىنىن تولتىرۋ ماقساتىندا «ازىرەت سۇلتان» مەملەكەتتىك تاريحي-مادەني قورىق مۇراجايى 2015 جىلى گاۋھار انا باسىنا قايتا كەسەنە ورناتتى. كەلبەتىنە كوركى ساي كەسەنە اۋماعىنداعى نەگىزگى جۇمىستار 2016 جىلدان باستاپ قولعا الىندى. جانتاق، شەڭگەل باسقان اۋماق گۇلزارلارمەن اباتتاندىرىلىپ جۇيەلى تۇردە اعاش كوشەتتەرى وتىرعىزىلدى. ەسكەرتۋ، بەلگى تاقتايشالارى قايتا جاڭارتىلىپ، جارىق شامدار، گاۋھار انا كەسەنەسى تۋرالى 3 تىلدە جازىلعان اقپاراتتىق تاقتايشا ورناتىلدى. كەسەنە الدىنداعى اۆتوتۇراق اۋماعى تەگىستەلىپ، اينالاسى تەمىر شارباقپەن قورشالىپ، تاس توسەۋ جۇمىستارى جۇرگىزىلدى. الىس-جاقىننان اعىلاتىن تۋريستەردىڭ اق-قاراسى كوپ بولاتىن بولعاندىقتان زاماناۋي تالاپقا ساي دارەتحانا سالىندى.