ورتالىق كوممۋنيكاسيالار قىزمەتىندە فرانسيانىڭ قازاقستانداعى توتەنشە جانە وكىلەتتى ەلشىسى فرانسيس ەتەن مىرزانىڭ قاتىسۋىمەن «فرانسيا-قازاقستان اراسىنداعى ديپلوماتيالىق بايلانىسقا 25 جىل» اتتى باسپا ءسوز كونفەرەنسياسى ءوتتى دەپ حابارلايدى Qamshy.kz اقپارات اگەنتتىگى.

فرانسيا باتىس ەلدەرىنىڭ اراسىندا ەڭ العاش بولىپ، 1992 جىلى 25 قاڭتاردا قازاقستاننىڭ ەگەمەندىگىن مويىنداعان مەملەكەت. 1992 جىلدىڭ قىركۇيەگىندە پرەزيدەنت نازاربايەۆتىڭ پاريجگە ەڭ العاشقى رەسمي ءىسساپارى بارىسىندا، قازاقستان مەن فرانسيا ەكى جاقتى ديپلوماتيالىق قارىم-قاتىناستىڭ ورناۋى جايىندا پروتوكولعا قول قويدى. ەكى ەل اراسىنداعى ىنتىماقتاستىقتىڭ نەگىزگى باعىتتارى مەن الداعى جوسپارلارى فرانسيا پرەزيدەنتى فرانسۋا ميتتەراننىڭ 1993 جىلى قازاقستانعا ءىسساپارى كەزىندە تالقىلاندى.

قازاقستان – 2008 جىلدىڭ ماۋسىمىندا فرانسيامەن ستراتەگيالىق سەرىكتەستىك ورناتقان ورتالىق ازياداعى جالعىز ەل.

ساياسات، ەكونوميكا، مادەنيەت سالالارىندا تىعىز ءارى مازمۇندى ىنتىماقتاستىقتىڭ ورناۋىنىڭ 25 جىلدىق مەرەيتويى اياسىندا فرانسيا ەلشىلىگى بيىلعى جىلى قازاقستاننىڭ تۇكپىر-تۇكپىرىندە  كوپتەگەن مادەني-ساياسي ءىسشارالار ۇيىمداستىرۋدا. بۇل مادەني ماۋسىم 2016 جىلدىڭ ماۋسىم ايىندا گەنەرال دە گوللدىڭ بايقوڭىرعا ساپارىنىڭ 50 جىلدىعىن اتاپ وتۋمەن باستالىپ كەتكەن ەدى.

ەكى ەل مەملەكەت باسشىلارى، مينيسترلەر جانە پارلامەنتاريلەر اراسىنداعى ەكى جاقتى ساياسي ديالوگ قارقىندى تۇردە دامۋدا. ءبىز ۇنەمى ۇكىمەتارالىق جانە ۆەدوموستۆوارالىق كونسۋلتاسيالار ۇيىمداستىرامىز، كەلەسى ۇكىمەتارالىق كوميسسيا ۇستىمىزدەگى جىلدىڭ 7-قىركۇيەگىندە، استانادا وتەدى دەپ جوسپارلانۋدا. 

2015 جىلدىڭ ناۋرىز ايىندا استانا مەن ءپاريجدى جالعاستىراتىن تىكەلەي اۋە قاتىناسىنىڭ اشىلۋى – ەكى ەل اراسىنداعى ساياسي، ەكونوميكالىق جانە مادەني الىس-بەرىستىڭ دامۋىنا ىقپالىن تيگىزدى.

بۇگىندە فرانسيا – قازاقستاننىڭ نەگىزگى ساۋدا سەرىكتەستەرى تىزىمىندە 6-ورىنعا ورنالاسقان. ال فرانسۋز كومپانيالارى – قازاقستان ەكونوميكاسىنا ەلەۋلى ۇلەس قوسقان ءىرى ينۆەستورلار قاتارىنان تابىلادى. فرانسۋزداردىڭ قازاقستانعا قۇيعان كاپيتالىنىڭ جالپى سوماسى – 13،6 ميلليارد ەۋرونى قۇرايدى.

قازاقستان-فرانسيا ساۋدا-ونەركاسىپ پالاتاسى فرانسيا، فرانكوفون سەرىكتەستەر مەن قازاقستان اراسىنداعى ىسكەرلىك قاتىناستاردى نىعايتۋعا جانە دامىتۋعا ءوز ۇلەسىن تيگىزۋدە.

ەكونوميكالىق جاعىنان الار بولساق، ءبىز ۋران ءوندىرۋ (كاتكو-كازاتومونەركاسىپ پەن اريەۆا اراسىنداعى ورتاق ونەركاسىپ)، تەمىر جول لوكوموتيۆتەرى (الستوم)،  تيتان قۇيمالارىن ءوندىرۋ (AIRBUS)، مۇناي (Total)، سەمەنت (Vicat)، فارماسەفتيكا (سانوفي)، سۋمەن قامسىزداندىرۋ (Veolia)، اگرو-يندۋستريا (Danone، Lactalis-Foodmaster، Soufflet) سالالارىندا قارقىندى بايلانىس ورناتتىق.

استانا ەكسپو-2017 كورمەسىنە دە بەلسەنە قاتىسۋدامىز. فرانسيا ەڭ العاشقىلاردىڭ قاتارىندا باس كوميسسارىن تاعايىنداپ، 2015 جىلدىڭ 5 قاراشاسىندا "استانا ەكسپو-2017-مەن" كەلىسىمگە قول قويدى. ال، ءبىزدىڭ پاۆيلونىمىز 1084 شارشى مەتر اۋماعىمەن ەڭ ۇلكەن ءۇش پاۆيلوننىڭ قاتارىندا.

مادەني جانە ۋنيۆەرسيتەتتىك بايلانىسىمىز دا دامۋ ۇسىتندە: 2014 جىلدىڭ قىركۇيەگىندە الماتىدا ورتالىق ازيا بويىنشا تەڭدەسى جوق «ينستيتۋت سوربوننا-قازاقستان» اشىلدى، سونىمەن قاتار قازاقستاندا ءۇش فرانسۋز اليانسى، ال استانادا ءبىر فرانسۋز مەكتەبى جۇمىس ىستەيدى.

جوعارعى باسقارۋ ماماندارىن دايىنداۋ ماقساتىندا قازاقستان رەسپۋبليكاسى پرەزيدەنتىنىڭ قاسىنداعى مەملەكەتتىك باسقارۋ اكادەمياسى مەن فرانسيانىڭ ۇلتتىق باسقارۋ مەكتەبى اراسىندا بايلانىس ورناتىلعان.