«سامۇرىق-قازىنا» ءۇاق» اق باسقارما ءتوراعاسى ءومىرزاق شوكەيەۆ «قازاتومونەركاسىپ» ۇاك» اق ۇجىمىنا ۇلتتىق اتوم كومپانياسىنىڭ جاڭا باسقارما ءتوراعاسى عالىمجان ولجا ۇلى ءپىرماتوۆتى تانىستىردى. ول بۇعان دەيىن ق ر ۇلتتىق بانكى ءتوراعاسىنىڭ ورىنباسارى بولىپ جۇمىس ىستەگەن، دەپ حابارلايدى Qamshy.kz اقپارات اگەنتتىگى ۇلتتىق كومپانيانىڭ باسپا ءسوز قىزمەتىنە سىلتەمە جاساپ.

ع.ءپىرماتوۆتىڭ كانديداتۋراسى كومپانيانىڭ جالعىز اكسيونەرى «سامۇرىق-قازىنا» ءۇاق» اق-نىڭ شەشىمىمەن بەكىتىلگەن. قور باسشىسى اتاپ وتكەندەي، ع.ءپىرماتوۆ اتوم ونەركاسىبى سالاسىندا جۇمىس تاجىريبەسى بار كاسىبي باسشى.

2009-2011 جىلدار ارالىعىندا ع. ءپىرماتوۆ «قازاتومونەركاسىپ» ۇاك» اق-نىڭ ەكونوميكا جانە قارجى جونىندەگى ۆيسە-پرەزيدەنتى بولدى. 2011-2015 جىلدارى «Cameco Kazakhstan» تاۋ-كەن كومپانياسىن باسقاردى.

«عالىمجان ءپىرماتوۆ - اتوم يندۋسترياسىندا جاقسى تانىمال جوعارى بىلىكتى مامان. ول سالامەن جاقىن تانىس، سوندىقتان كومپانيا الدىندا تۇرعان ماقسات-مىندەتتەردى تولىق ورىنداپ، ءقازىر سالادا ءجۇرىپ جاتقان جۇيەلى رەفورمالاردى سوڭىنا جەتكىزە الادى»، - دەدى ءو. شوكەيەۆ.

كەزدەسۋگە «قازاتومونەركاسىپ» كومپانياسىنىڭ بۇرىنعى باسشىسى، بۇگىندە ق ر پرەمەر-مينيسترىنىڭ ورىنباسارى اسقار جۇماعالييەۆ قاتىستى. ول قور باسشىلىعى مەن ۇلتتىق اتوم كومپانياسىنىڭ ۇجىمىنا بىرلەسە اتقارعان جەمىستى جۇمىس ءۇشىن ريزاشىلىعىن ايتىپ، جاڭا باسشىعا تابىستار تىلەدى.

ەسكە سالا كەتسەك، ق ر پرەزيدەنتىنىڭ 2017 جىلعى 29 تامىزداعى جارلىعىمەن اسقار جۇماعالييەۆ ق ر پرەمەر-مينيسترىنىڭ ورىنباسارى بولىپ تاعايىندالعان بولاتىن.