اللا تاعالا جاراتقان قۇلدارىنا تىلمەن، جۇرەكپەن ءارى مۇلىكپەن قۇلشىلىق ەتۋدى مىندەتتەگەن. مۇلىكپەن قۇلشىلىق ەتۋدىڭ ءبىر ءتۇرى قۇرباندىق شالۋ بولىپ تابىلادى، دەپ جازادى Qamshy.kz اقپارات اگەنتتىگى muftyat.kz مالىمەتىنە سۇيەنىپ. 

ناقتى كۇنى، ناقتى جاستاعى جانە ناقتى بەلگىلەرى بار مالدى قۇرباندىققا شالۋ - قۇرباندىق بولىپ سانالادى.  قۇلشىلىقتىڭ بۇل ءتۇرى اللاعا جاقىنداۋدىڭ، ونىڭ رازىلىعى مەن مەيىرىمىنە بولەنۋدىڭ، سونداي-اق، جوعارى دارەجەگە جەتۋدىڭ قۇرالى بولىپ تابىلادى.

بىلايشا ايتقاندا، شاريعات تەرمينولوگياسى بويىنشا، اللا تاعالاعا جاقىنداۋ ماقساتىندا ناقتى ۋاقىتتا قۇرباندىققا شالىناتىن مالدىڭ اتاۋى. 

قۇرباندىقتىڭ ماقساتى - بويسۇنۋشىلىق پەن جاراتۋشىنىڭ بۇيىرعاندارىن ورىنداۋ ارقىلى جاراتىلعان قۇلدىڭ وعان جاقىنداۋى بولىپ تابىلادى.  اقيقات جولىندا ءوزىن-وزى قۇربان ەتۋدىڭ بەلگىسى ءارى اللانىڭ بەرگەن بارلىق نىعمەتى ءۇشىن رازىلىعى  قۇرباندىق بولىپ تابىلادى. ناتيجەسىندە ادام بالاسى مول ساۋاپقا كەنەلىپ، كوپتەگەن اپات پەن بالەدەن قۇتىلادى.

فيكح تەرمينولوگياسىندا قۇربان ايت مەيرامىندا شالىنعان قۇرباندىق «ۋدحييا» دەپ اتالادى، ويتكەنى قۇرباندىق شالۋ نەگىزى تاڭەرتەڭگى دۇعا-نامازىنىڭ ۋاقىتىندا ورىن الادى (شيراتۋل-يسلام، 218 ب.).

قۇرباندىق شالۋ نەگىزگى ءدىني ۇيعارىمداردىڭ ءبىرى بولىپ تابىلادى. سوندىقتان ەگەر الدەكىم قۇرباندىق شالۋدىڭ ورنىنا ساداقا تاراتقىسى كەلسە، وعان تىيىم سالىنعان، سەبەبى قۇرباندىقتىڭ رۋكۋنى اللا رازىلىعى ءۇشىن قۇرباندىققا شالىنعان مالدىڭ قانىن اعىزۋ بولىپ تابىلادى. (شيراتۋل-يسلام، 218  ب.).

پايعامبارىمىز مۇحاممەدتىڭ (وعان اللانىڭ سالاۋاتى مەن سالەمى بولسىن) ۇمبەتىنە قۇرباندىق شالۋ حيجرانىڭ ەكىنشى جىلى بۇيىرىلعان بولاتىن. قۇرباندىق شالۋدىڭ زاڭدىلىعى كىتاپپەن، سۇننەتپەن ءارى ۇمبەتتىڭ كەلىسىمىمەن دالەلدەنگەن.