ايىم ماجاكەيەۆانىڭ ەڭبەگى قازىرگى جاستار ءۇشىن ۇلگى-ونەگە دەۋگە بولادى. ول بار بولعانى 23 جاستا عانا، ءبىراق 3 توپتىڭ مۇگەدەگى. ءوزىنىڭ دەنساۋلىعىنا قاراماستان العا جىلجىپ، ەڭبەكقورلىعىنىڭ ارقاسىندا، ادەمى، تاماشا دۇنيەلەردى جاساپ شىعارعان. سىرت كوزگە ونىڭ بالا كەزىندە نيەۆرولوگيالىق سىرقاتقا ۇشىراعاندىعى ءتىپتى بىلىنبەيدى دە، سەبەبى بۇگىندە قالا تۇرعىندارىنا شەبەر قولدىڭ يەسى رەتىندە تانىلۋدا. ونىڭ جاساعان دۇنيەلەرى اركىمدى تاڭعالتۋدا، ماسەلەن، قىتايدان كەلگەن قازاق باۋىرلار اتتاي قالاپ سۇراپ العان استاناداعى «بايتەرەك» مونۋمەنتى. ايىم قازىرگى ۋاقىتتا جەڭىل اتلەتيكامەن، سپورتتىڭ قىستىق تۇرلەرىمەن اينالىسادى.

- انامنىڭ ايتۋى بويىنشا 1995 جىلى 3 جارىم جاسىمدا مينينگيتپەن اۋرىپ 1 اي 17 كۇن كومادا، ەس-تۇسسىز جاتىپپىن. سودان ۇزاق جىلدار اۋىرىپ، ەمدەلىپ ءجۇردىم، - دەيدى ايىم، - دەنساۋلىعىما بايلانىستى قوسالقى مەكتەپ ينتەرناتقا باردىم. ءوز دەنساۋلىعىمدى ۇنەمى ەمدەپ، سپورتپەن شۇعىلدانۋمەن بولدىم. سونىڭ ارقاسىندا امەريكانىڭ ايداحو شتاتى، بويسە قالاسىندا ۇيىمداستىرىلعان دۇنيە جۇزىلىك وليمپياداعا شاڭعى جارىسىنا قاتىسىپ كەلدىم. 1 قولا جانە 1 كۇمىس القا تاقتىم. 2008 جىلى رەسپۋبليكالىق «Special Olympics» ۇيىمداستىرعان الماتى قالاسىندا ميني فۋتبولعا قاتىسىپ كوماندالىق III ورىن الدىم. قازان ايىندا قالالىق مۇمكىندىگى شەكتەۋلى جاندار اراسىندا وتكىزىلگەن «كۇز ارۋى -2011» بايقاۋىندا باس جۇلدەنى جەڭىپ الدىم. بوس ۋاقىتىمدا كەستە تىگەمىن، بيسەر جاسايمىن، جۇمساق ويىنشىقتار تىگەمىن. قازىرگى كەزدە سەمەي قالاسىنداعى كاسىپتىك №1 ليسەيدىڭ شاشتاراز ءبولىمىن وقىپ ءبىتىردىم. وسكەمەن قالاسىندا وتكەن «ءبارىمىز بىردەيمىز، كەمسىتۋدى بىلمەيمىز» اتتى مۇگەدەك جاندارعا ارنالعان فەستيۆالگە قاتىسىپ ماقتاۋ قاعاز بەن باعالى سىيلىققا يە بولدىم. سەمەي قالاسىندا وتكىزىلگەن «كۇن الەمى» اتتى فەستيۆالگە قاتىسىپ ءبىرىنشى ورىن الدىم. دەنساۋلىعىمنىڭ سىرقاتىنا قاراماي، سالاۋاتتى ءومىر سالتىن ۇستانامىن. كوپتەگەن ءىس شارالارعا قاتىسا وتىرىپ، جاقسى ادامداردىڭ كومەگىن كوردىم. تاپسىرىستار وتە كوپ، بوس ۋاقىتىم جوق دەۋگە بولادى.

ايىم كۇلىمدەگەن، اشىق كوڭىل، ادەمى قىز. تەك سىرقاتى عانا ارا-تۇرا سىر بەرىپ قالسا، ول ونى ەلەمەۋگە تىرىسادى. وعان دەم بەرەتىن جۇمىسى. اتاپ ايتقاندا بيسەردەن ءتۇرلى دۇنيەلەر، قازاقشا تويباستار، سىي-كادە، مونشاقتار جاساپ شىعارۋ سۇيىكتى ءىسى. بيسەردى قازاقشا جاساندى ءىنجۋ-مارجان دەپ اتايدى، سەبەبى ناعىز ءىنجۋ-مارجان تەڭىزدىڭ تۇبىندە جاتادى. بۇل كۇندەرى كوپتەگەن شەبەرلەر قولداناتىن ءىنجۋ-مارجاندار پلاستماسسا، شىنى، اعاش، مەتاللدان دا الىنادى. ءوز دەنساۋلىعىنا وراي ايىم ارنايى ينتەرناتتا ءتالىم الىپ، وندا جاساندى ءىنجۋ-مارجاندى تىزبەكتەپ، ءارتۇرلى نارسە جاساۋدان حاباردار بولادى. كەستە تىگىپ ۇيرەنەدى. وسىنىڭ ءبارى ونىڭ شەبەرلىگى شىڭدالا تۇسۋىنە ىقپال ەتكەن. 2014 جىلى مامىر ايىندا «دامۋ» كاسىپكەرلەر ۇيىمداستىرۋ قورىنىڭ جوباسىنا قاتىسىپ «قۇس جولى» ، «جۇلدىزدارعا قارا» جوباسىن جەڭىپ العان جاس كاسىپكەر رەتىندە تانىلدى. گرانت ەسەبىنەن وعان تىگىن ماشيناسى مەن 120 مەتر قاجەتتى بۇل بەرىلدى. پاتەنت العان ايىم ماجاكەيەۆا قازىرگى كەزدە ءوزى ۇيىنەن بيزنەس اشىپ، تۇرمىستىق زاتتار مەن توسەك جابدىقتارىن تىگىپ جاتىر. ول ەڭبەكقور بولعانى سونشالىق، جەتىستىكتەرى دە ءار سالادان، اتاپ ايتقاندا، «ءسوز مەرگەن» سايىسىندا III ورىن السا، «تۋعان تىلگە تاعزىم» اتتى شاراعا قاتىسىپ قول ونەر سايىسىندا ءبىرىنشى ورىندى يەمدەنگەن. سونداي-اق، مۇمكىندىگى شەكتەۋلى جاندار اراسىنداعى قالالىق شاحمات سايىسىندا III ورىنعا يە بولعانى تاعى بار.

راۋشان قابجانىزى. سەمەي