Halyk Bank يەلىگىندەگى Qazkom بانكى مەن Visa كومپانياسى قازاقستاندا ينتەرنەت-بانكينگتەگى Homebank Pay سەرۆيسىن ىسكە قوسقاندىعىن مالىمدەدى. وندا تمد مەن ەۋروپادا ءالى جوق تولەم جۇيەسى تانىستىرىلدى دەپ جازادى Qamshy.kz.

اتالعان تولەم جۇيەسى تۇتىنۋشىلارعا QR كودتى سكانەرلەۋ ارقىلى تولەم جۇرگىزۋگە، ال ساۋدا ورىندارى مەن قىزمەت كورسەتەتىن كاسىپورىندار ءۇشىن ۋاقىت ۇنەمدەۋگە، POS تەرمينالدارعا شىعىندانباۋعا سەپتىگىن تيگىزەدى. ول ءۇشىن تۇتىنۋشى كەز-كەلگەن ءوندىرىس يەسىنىڭ بىرەگەي QR كودىن سكانەرلەۋى، سايكەسىنشە قاجەتتى تولەم سوماسىن ەنگىزۋى جەتكىلىكتى. ال، ءوندىرىس ورىندارى مەن قىزمەت كورسەتۋشىلەر بانكتەن ءوز شوتىمەن بايلانىستى مەنشىكتى QR كود الادى.

تولەم جۇيەسىنە ارنالعان باسپا ءسوز كونفەرەنسياسىندا Halyk Group باسقارما ءتورايىمى ءۇمىت شاياحمەتوۆا «ءبىز شاعىن بيزنەس سالاسىنداعى كاسىپكەرلەردى قولما-قولسىز اقشا تولەمىنە ءوتۋدى جەڭىلدەتەتىن ەكۆايرينگتەگى جەتەكشى بانكتىڭ شەشىمىن قۋانا ۇسىنامىز»، دەپ تانىستىردى. ونىڭ ايتۋىنشا QR كودتى تولەم جۇيەسى مەملەكەتكە دە پايدالى. وسى ارقىلى كولەڭكەلى اقشا اينالىمى ازايادى.

كونفەرەنسيا بارىسىندا Qazkom بانكىنىڭ باسقارۋشى ديرەكتورى نۇرلان جاعىپاروۆ سوڭعى جىلداعى بانك تۇتىنۋشىلارىنىڭ ينتەرنەت-بانكينگ پەن قولما-قولسىز تولەم جاساۋدا بەلسەندىلىك تانىتقانىن اتاپ ءوتتى. «ەلدەگى كەز كەلگەن جەكە كاسىپكەر كونتاكتىسىز تولەمدەردى قابىلداي الادى. سونىمەن قاتار بۇل سەرۆيس تولەم قابىلداۋ ينفراقۇرىلىمدارىنا ەشقانداي ينۆەستيسيانى قاجەت ەتپەيدى. Android نەمەسە iOS جۇيەسىندەگى سمارتفوندارعا ورناتىلاتىن قوسىمشا ارقىلى قازاقستاننىڭ كەز كەلگەن ساۋدا نۇكتەسىندە وڭاي ءارى ءقاۋىپسىز تۇردە قالاعان تولەمىڭىزدى جاساي الاسىز»، - دەدى ول ءوز سوزىندە.

جۋرناليستەر سۇراقتارىنا جاۋاپ بەرگەن بانك باسشىلارىنىڭ سوزىنشە، اتالعان قىزمەتتى الماتى مەن استانا قالاسىنىڭ تۇرعىندارى قاراشا ايىنان باستاپ، ال تۇتاس قازاقستان جانە رەسەي، تاجىكستان سياقتى تمد ەلدەرى 2018 جىلدىڭ باسىنان پايدالانا الادى. Qazkom تۇتىنۋشىلارى ءۇشىن QR كود ارقىلى تولەم جاساۋ الداعى ۋاقىتتا Halyk Bank كليەنتتەرىنە دە قولجەتىمدى بولادى. تولەم جاساۋ مەن قابىلداۋ دا كوميسسياسىز.

Visa-نىڭ ورتالىق ازيا ەلدەرىندەگى ايماقتىق مەنەدجەرى عالىم تابىلدييەۆ قازاقستان نارعىنىڭ قارقىندى دامىپ جاتقانىن اتاي كەلە، «اتالعان  تولەم جۇيەسى EMVC سەرىكتەستىگىمەن الەمنىڭ ءتۇرلى ەلدەرىندە QR كود تەحنولوگياسىنىڭ تاجىريبەسى ەسكەرىلە وتىرىپ، Visa-مەن ازىرلەنگەن بولاتىن. بۇل اشىق ستاندارتتارمەن جۇمىس ىستەيتىن يندۋستريانىڭ دامۋىنا، مەملەكەتتىڭ ساندىق ەكونوميكاعا تەز وتۋىنە ىقپال ەتەدى»، - دەپ اتاپ ءوتتى.

ايتا كەتسەك، QR-كود ارقىلى تولەم جاساۋ كورەيا، جۇڭگو ەلدەرىندە، وڭتۇستىك ازيادا قولدانىستا بار.