جيىندى باستاعان قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆ ەكى مەملەكەتتىڭ بايلانىسى تەرەڭدە جاتقانىن، وسى ۋاقىت ارالىعىندا بەرىك  رۋحاني نەگىز قالىپتاسىپ ۇلگەرگەنىن، شيرەك عاسىر ارالىعىندا قازاقستان مەن رەسەي اراسىندا 300-گە تارتا ماڭىزى جوعارى، سەرىكتەستىكتى نىعايتاتىن ەكىجاقتى كەلىسىم جاسالعانىن ەرەكشە اتاپ ءوتتى.

"ەكىجاقتى بايلانىستىڭ ورناۋى ەكى ەلدىڭ ماسەلەنى شەشۋدە قولداناتىن ارەكەت امالدارىنا بايلانىستى. وزگە ەلدەردە وڭ شەشىمىن تاپپاعان تۇيتكىلدى ماسەلە قازاقستان مەن رەسەي اراسىندا بولعان ەمەس"، – دەدى جيىن بارىسىندا يمانعالي تاسماعامبەتوۆ. وسى رەتتە ەلشى مىرزا «تۋىسى جاقىن جاقىن ەمەس، قونىسى جاقىن جاقىن»"، – دەگەن ماقالدى تىلگە تيەك ەتتى.

ءوز كەزەگىندە ءسوز العان ممحقي رەكتورى اناتوليي توركۋنوۆ رەسەي مەن قازاقستان بۇرىڭعى كەڭەس مەملەكەتتەرى اراسىندا قاۋقارىن مىقتاعان مەملەكەتتەر ەكەنىن ايتا كەلە،  تاۋەلسىزدىك العالى بەرى ەڭ جاقىن سەرىكتەس بولعانىنا دا ەرەكشە توقتالدى.

"ءبىزدىڭ مەملەكەتتەر 25 جىل ارالىعىندا حالىقارالىق دەڭگەيدە تىعىز قارىم-قاتىناس ورناتتى. سونداي-اق قازاقستان وسى جىلدار ارالىعىندا سىرتقى ساياساتتىڭ نەگىزگى قۇرالى رەتىندە ديپلوماتيالىق قىزمەتتى جاقسىلاپ جاساقتاي الدى. سونىڭ ايقىن دالەلى رەتىندە قازاقستاننىڭ حالىقارالىق دەڭگەيدە بەدەلى جوعارى بۇۇ قاۋىپسىزدىك كەڭەسىندە تۇراقتى ەمەس وكىلى رەتىندە سايلانۋىن ايتۋعا بولادى"، – دەدى اناتوليي توركۋنوۆ.

رف سىرتقى ىستەر ءمينيسترىنىڭ ورىنباسارى گريگوريي كاراسين يمانعالي تاسماعامبەتوۆتىڭ سوزىمەن كەلىسە وتىرا، قوس مەملەكەت اراسىندا قانداي دا ماسەلە بولماسىن ەكى جاقتى، كوپجاقتى كەلىسسوزدەر ارقىلى شەشىلىپ جۇرگەنىن ەرەكشە اتاپ ءوتتى.

"قازاقستان مەن رەسەي اراسىنداعى جاڭاشا قارىم-قاتىناستار جوق جەردەن پايدا بولعان جوق. كەڭەس ۇكىمەتى ىدىراعان سوڭ تاۋەلسىز مەملەكەتتەر توسىننان شىعاتىن ماسەلەلەردى اينالىپ وتۋگە مەيلىنشە تىرىستى"، – دەدى رەسەي ديپلوماتى.  ونىڭ پايىمداۋىنشا، قوس ەل دە بايلانىستىڭ تەرەڭدەي ءتۇسۋىن قالايدى. قازاقستان پرەزيدەنتى نۇرسۇلتان نازاربايەۆتىڭ باستاماسىمەن قۇرىلعان تمد، ودكب، بۇۇ، ەقىۇ، شىۇ ۇيىمداردىڭ بەلدى مۇشەلەرى.

گ.كاراسيننىڭ پىكىرىنشە، قازاقستان مەن رەسەي اراسىنداعى ستراتەگيالىق بايلانىستىڭ ارتۋى ەڭ الدىمەن ەكى ەل باسشىلارى اراسىنداعى ساياسي سەنىمدىلىك پەن ءداستۇرلى دوستىق قارىم-قاتىناسقا نەگىزدەلىپ وتىر.

اتالعان كونفەرەنسياعا قاتىسقان ازاماتتار قازاقستان مەن رەسەيدىڭ ىنتىماقتاستىعىنا جول اشاتىن كوپتەگەن فاكتورلار بار ەكەنىن ايتتى. بۇل ورتاق تاريح، 7 مىڭ كم-گە ۇزاقتىققا سوزىلاتىن ورتاق شەكارا، ورتاق ءتىل جانە ۇقساس ءدىل. سوندىقتان تاتۋ كورشىلىك پەن تەڭ قۇقىقتى ىنتىماقتاستىقتان باسقا قانداي دا ءبىر وزگە ساياسات ەكى مەملەكەتتىڭ ءتۇبىرلى مۇددەلەرىنە قايشى كەلەدى.

ونىڭ ۇستىنە ەكى ەلدىڭ ءوزارا ءىس-قيمىلىنىڭ تەرەڭ قاتپارلى فاكتورلارى استانا مەن ماسكەۋدىڭ كوپتەگەن كوكەيتەستى حالىقارالىق پروبلەمالارعا كوزقاراستارىنىڭ جاقىندىعىن ايقىندايدى. مۇنىڭ ءوزى عالامدىق جانە ايماقتىق قاۋىپسىزدىكتى قامتاماسىز ەتۋگە باعىتتالعان سىرتقى ساياسي ءوزارا ءىس-قيمىلعا، باستامالاردى ەكى جاقتى قولداۋعا جاردەمدەسەدى. حالىقارالىق ساحناداعى ىنتىماقتاستىق ءوزارا قارىم-قاتىناستىڭ ساپالى جاڭا دەڭگەيىنە – ستراتەگيالىق ارىپتەستىك دەڭگەيىنە كوتەرىلۋگە مۇمكىندىك بەرەدى، بۇل دەگەنىمىز ەكى مەملەكەت باسشىلارىنىڭ تۇراقتى بايلانىستارىن قوسا العاندا، بارلىق دەڭگەيلەردەگى جان-جاقتى بايلانىستاردى بىلدىرەدى.

اتالعان شاراعا رف پرەزيدەنت اكىمشىلىگىنىڭ وكىلدەرى قوس ەلدىڭ ديپلوماتتارى، بەلدى ساراپشىلارى مەن جۋرناليستەرى قاتىستى.