التىنشى رەت وتكىزىلىپ وتىرعان «التىن قالام» بايقاۋىنا 590 اۆتوردان 1076 شىعارما كەلىپ تۇسكەن. شىعارمالاردىڭ تەڭ جارتىسى قازاق، جارتىسى ورىس تىلىندە جازىلعان. ارنايى 1 000 000 تەڭگەلىك اقشالاي جۇلدەنى ەسەنقۇل مامانوۆ اتىنداعى پرەميانىڭ يەگەرى، «الاشوردانىڭ 100 جىلدىعىنا» ارنالعان تاقىرىپتىق شىعارمادا توپ جارعان قالامگەر جانە ەڭ مىقتى بالالار مەن جاسوسپىرىمدەرگە ارنالعان «دارابوز» ادەبي شىعارما اۆتورى يەلەندى.
كونكۋرستىڭ سوڭعى قىسقا تىزىمىنە ءاربىر جانر بويىنشا بەس شىعارمادان ەنگىزىلدى. جەڭىمپازداردى ماراپاتتاۋ شاراسى 30 قازاندا Rixos Almaty قوناقۇيىندە ءوتتى. بۇل تۋرالى Qamshy.kz اقپارات اگەنتتىگىنىڭ ءتىلشىسى حابارلايدى.
«بيىلعى جۇلدە ءبىز ءۇشىن ەرەكشە بولدى. ولاي دەيتىن سەبەبىمىز، «الاش» پارتياسىنىڭ قۇرىلعانىنا 100 جىل تولۋىنا وراي «الاشورداعا 100 جىل» اتالىمى جاريالاندى. ساتيرا جانرى بيىلدان باستاپ جازۋشى، ساتيريك، اۋدارماشى ەسەنجول دومباي اتىنداعى «جىلدىڭ ۇزدىك ساتيراسى» بولىپ وزگەرتىلدى. سونىمەن قاتار، بۇعان دەيىن 11 رەت وتكىزىلگەن بالالار جازۋشىلارىنا ارنالعان حالىقارالىق «دارابوز» بايقاۋى بيىل ءبىرىنشى رەت «التىن قالام» ادەبي جۇلدەسى اياسىندا ءوتتى. «بۇل بالالار شىعارماسىنا قامتىعان تۋىندىلاردىڭ سانىن عانا ەمەس، ساپاسىنىڭ دا ارتۋىنا سەپتىگىن تيگىزدى. ءبىزدىڭ akalam.kz سايتى ارقىلى ءاربىر شىعارما ءوز وقىرمانىن تاپتى دەپ ويلايمىز»،-دەدى «التىن قالام» ادەبي جۇلدەسى ۇيىمداستىرۋ كوميتەتىنىڭ ديرەكتورى كەنجە جۇمان ۇلى.
وسى جىلى ۇيىمداستىرۋ كوميتەتىنىڭ جانە قازىلار القاسى قۇرامىنا دوسىم ساتپايەۆ، ايدوس سارىم، ارمان شورايەۆ، نۇرجان مۇحامەدجانوۆا، راسۋل جۇمالى، كەنجە جۇمان ۇلى، قۋات دومباي، ايگەرىم رايىقۇلوۆا، بەكنۋر قيسىقوۆ، تاتيانا فيليپچيك جانە باسقالار ەندى.
«التىن قالام 2017» بايقاۋىنا تەك قازاقستان عانا ەمەس، اقش، گەرمانيا، ۋكراينا، رەسەي، يزرايل جانە بەلورۋسيا ەلىندە تۇراتىن اۆتورلار دا قاتىستى.
بايقاۋعا جۇمىستار اقپاننىڭ 15 مەن قىركۇيەكتىڭ 15 ارالىعىندا قابىلدانىپ، وقىرماندار عالامتور ارقىلى قازان ايىنا دەيىن داۋىس بەرگەن.
باس جۇلدە 1 ملن تەڭگەنى تاريحشى – جازۋشى استانالىق ءامىرجان الپەيىسوۆ يەلەندى. بالالار جازۋشىلارىنا ارنالعان «دارابوز» بايقاۋىنىڭ باس جۇلدەسىن جانە 1 ملن تەڭگەنى جازۋشى قاراعاندىلىق توكەن الجانتەگى جەڭىپ الدى.
— Pulatova Zamyra (@PZamyra) 31 وكتيابريا 2017 گ.
توكەن الجانتەگى ماراپاتىن الا تۇرىپ، ءسوز سويلەدى، ول: «بەلينسكييدىڭ ءسوزى بار عوي، «ابدەن ازعىنداعاندا ادام ادەبيەتكە قايتىپ كەلەدى» دەيدى. ءبىز ءقازىر قانداي زاماندا ءومىر ءسۇرىپ وتىرعانىمىزدى ءوزىمىز دە بىلمەي قالدىق. ال ەندى وسىنداي جاعدايدا ادامنىڭ بەتىن جاقسىلىققا، يگىلىككە، جاسامپازدىققا قاراي بۇرۋ ول مىنا ادەبيەتشىلەردىڭ، سول سياقتى ادەبيەتتى قولداۋشىلاردىڭ ۇلكەن ءبىر ابىرويلى مىندەتى دەپ ەسەپتەۋ كەرەك»،- دەدى. ول «التىن قالام» بولاشاعىنىڭ جارقىن ەكەندىگىنە سەنەتىندىگىن ايتتى.
«جىلدىڭ ۇزدىك فانتاستيكاسى جانە دەتەكتيۆى» نوميناسياسى بويىنشا، جەڭىمپازدى ماراپاتتاۋعا تالانتتى جازۋشى تۇرىسبەك ساۋكەتايەۆ كەلدى. ول: «بىلتىر ءوزىمىز ماراپاتتالىپ ەدىك، بۇگىن وسى باقىتقا كەنەلەتىن كەلەسى ادامنىڭ قۋانىشىنا كۋا بولىپ وتىرمىز. ءبىز سياقتى موسقال ادامدار ەمەس، ادەبيەتكە جاستاردىڭ كەلۋى قۋانىشتى جايت. فانتاستيكا جانرى قازاق ادەبيەتىندە كەشەۋىلدەپ، كەنجەلەپ جاتقان جانر. وسىعان ءبىزدىڭ جاستارىمىزدىڭ، قالامداستارىمىزدىڭ ۇلەس قوسىپ جاتقانى ءبىزدى قۋانتادى. ءقازىر ول زامان تالابى، وقىرماندار بۇگىندە فانتاستيكاعا دەن قويعان. ءقازىر عىلىمنىڭ تەحنيكانىڭ داۋىرلەگەن زامانى، سوندىقتان دا وسى جانردىڭ دامىپ، ادەبيەتتە كورىنىس تابۋى ءبىز ءۇشىن قۋانىش»،- دەدى.
— Pulatova Zamyra (@PZamyra) 31 وكتيابريا 2017 گ.
ماراپاتتاۋ اياقتالىسىمەن، توكەن الجانتەگىنەن سايىستان جەڭىپ العان شىعارماسىنىڭ ەرەكشەلىگىن سۇراعان بولاتىنبىز. ول: «مەن «جايلاۋ قىزىقتارى» دەگەن كىشىگىرىم ءۇش اڭگىمەنى جازدىم، وندا بىرىنشىدەن، بالا پسيحولوگياسى، ەكىنشىدەن دالا پسيحولوگياسى، ءۇشىنشى، قازاقي پسيحولوگيا بار. بالانى قازاقيلىققا تاربيەلەۋگە نەگىزدەلگەن ءۇش اڭگىمە: العاشقىسى «مىسىق پەن جىلان»، ەكىنشىسى – «اق لاق اقىماق پا؟» جانە ءۇشىنشىسى - «توقىمقاعار»، بۇل سوڭعىسى، باستاپقى ەكى اڭگىمەنى قورىتىندىلايدى. شىعارمانىڭ جەڭىمپاز بولۋىنا سەبەپ، ءبىزدىڭ ۇلتتىق مەنتاليتەتتىڭ، سانا-سەزىمنىڭ وندا ايقىن كورىنىس تابۋى دەپ بىلەمىن. بالالاردى ءوز ۇلتىمىزعا دەگەن سۇيىسپەنشىلىككە تاربيەلەۋگە باعىتتالۋى بولعاندىعىنان»،- دەپ ءتۇسىندىردى ول.
وقىرمانداردىڭ قولداۋى جانە قازىلاردىڭ تاڭداۋى بويىنشا ءار اتالىم بويىنشا نوميناسيا جەڭىمپازداردىڭ اتى اتالىپ، ماراپاتتالدى، ولار:
«جىلدىڭ ۇزدىك پوەزياسى» نوميناسياسى بويىنشا - نۇرجان نۇربەك، الماتى
«جىلدىڭ ۇزدىك پروزاسى» - قارعاباي ماقسات، وڭتۇستىك قازاقستان وبلىسى
«جىلدىڭ ۇزدىك كينو سەنارييى جانە دراماتۋرگياسى» - ايداروۆ جومارت، شىمكەنت
«جىلدىڭ ۇزدىك بالالار جانە جاسوسپىرىمدەر ادەبيەتى «دارابوز» - الجانتەگى توكەن، قاراعاندى
«جىلدىڭ ۇزدىك ساتيراسى» - ەرالحان جىلقايدار ۇلى، لەنگەر
«الاشورداعا 100 جىل!» - الپەيىسوۆ ءامىرجان، استانا
«جىلدىڭ ۇزدىك فانتاستيكاسى جانە دەتەكتيۆى» - بەكبولات ورالبەك، كەنتاۋ
«قازاق ادەبيەتىنە قوسقان ەلەۋلى ەڭبەگى ءۇشىن» - شەرحان مۇرتازا
«لۋچشايا پوەزيا گودا» - ابيلدين داستان، كوكشەتاۋ
«لۋچشايا پروزا گودا» - كەنەسوۆا گاۋحار، الماتى
«لۋچشايا دەتسكايا ي پودروستكوۆايا ليتەراتۋرا گودا «دارابوز» - مۋفتاحۋتدينوۆا ديليارا، كوكشەتاۋ
«لۋچشايا ساتيرا گودا يمەني ەسەنجولا دومباي» - سۋسلوۆا الەكساندرا، كوستاناي
«لۋچشايا فانتاستيكا ي دەتەكتيۆى گودا» - ۆورونكوۆا ولگا، سەمەي
«لۋچشيي كينو سەناريي ي دراماتۋرگيا گودا» - سانجار نۋرلان ي رامازانوۆا بانۋ، الماتى
«لۋچشيي زارۋبەجنىي اۆتور گودا» - شابلينسكيي ۆلاديمير، بەلارۋس
«100-لەتيە الاش وردى» - مۋفتاحۋتدينوۆا ديليارا، كوكشەتاۋ
اتاپ وتەرلىگى، «التىن قالام 2017» بايقاۋىنا كوپتەگەن ۇيىمدار قولداۋ كورسەتتى، ولار: «جەرسۋ» ينۆەستيسيالىق كورپوراسياسى، «رۋسسكوە راديو»، «كازكوم» بانكى، «قازاقستان باسپا ءسوز ورتالىعى» كتك، 31 تەلەارنا، «مەلومان» ساۋدا جەلىسى، «ايقىن»، «جاس الاش» باسىلىمدارى جانە «ارۋنا» باسپاسى.
قورىتىندىلاي كەلە، سايىسقا تۇسكەن بارلىق شىعارما www.akalam.kz رەسمي سايتىنا ورنالاستىرىلاتىنىن ەسكەرتەمىز.
پىكىر قالدىرۋ