مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى قايرات قوجامجاروۆ بۇرىنعى شەنەۋنىكتەردىڭ ەلدەن 8 ميلليارد دوللاردان اسا اقشا الىپ كەتكەنىن ايتتى، - دەپ حابارلايدى Qamshy.kz اقپارات اگەنتتىگى Tengrinews.kz-كە سىلتەمە جاساپ.

"سوڭعى 10 جىلدا قازاقستاننان تىس جەردەگى 205 جەمقوردىڭ 152ء-سى ەلگە قايتارىلدى. الايدا ەلدەن 8 ميلليارد دوللاردان اسا اقشا الىپ كەتكەن بۇرىنعى مينيسترلەر مەن اكىمدەر شەتەلدە ءالى دە جاسىرىنىپ ءجۇر. ءبىرىنشى كەزەكتە ولار - ءابليازوۆتىڭ ۇيىمداسقان قىلمىستىق توبى مەن حراپۋنوۆتار"، - دەدى قايرات قوجامجاروۆ. استاناداعى كونفەرەنسيا بارىسىندا.

قوجامجاروۆتىڭ ايتۋىنشا، ولاردىڭ بارلىعى جازالانادى.

"ءبىز ساياساتتاندىرۋعا قاراماستان ولاردىڭ بارلىعىنىڭ جاۋاپكەرشىلىككە تارتىلاتىنىنا سەنىمدىمىز. شەتەلدىك ارىپتەستەرىمىزبەن سەرىكتەستىگىمىزدىڭ ارقاسىندا ەلدەن قاشىپ كەتكەن ءاربىر جەمقور سۋديا تاعايىنداعان جازاعا تارتىلادى"، - دەدى قايرات قوجامجاروۆ. 

ونىڭ ايتۋىنشا، مۇندا مەملەكەتتىڭ اقشاسىن قىلمىستىق جولمەن جۇمساعان جانە ەلدەن اقشا الىپ كەتكەندەردىڭ ارەكەتىن ەرتەرەك انىقتاۋ ماڭىزدى.

"قاشىپ جۇرگەن قىلمىسكەرلەر مەن ۇرلانعان اكتيۆتەردى باسقا قۇزىرەتتەن قايتارىپ الۋ - ءاربىر مەملەكەت ءۇشىن وزەكتى ماسەلە. قازىرگى ۋاقىتتا الەمدىك قاۋىمداستىقتا دەوففشوريزاسيعا جانە شەتەلدىك بانكتەگى ەسەپشوت يەلەرىنە قاتىستى مالىمەتتەردى انىقتاۋ ماقساتىندا جەدەل شارالار جۇرگىزىلىپ جاتىر. قازاقستان مۇنداي شارالاردى قولدايدى جانە ءوزارا ارەكەتتەسۋگە دايىن"، - دەدى ۆەدومستۆو باسشىسى.

سونداي-اق، قايرات قوجامجاروۆ 40-تان اسا مەملەكەتپەن اكتيۆتەردى بەرۋ جانە قايتارۋ تۋرالى شارتتاردىڭ جاسالعانىن ەسكە سالدى.