الماتى اكىمى باۋىرجان بايبەك كەرەڭدەردىڭ حالىقارالىق سپورت كوميتەتىنىڭ پرەزيدەنتى ۆالەريي رۋحلەديەۆپەن كەزدەستى. تاراپتار قالادا 2019 جىلى قىسقى XIX سۋردليمپيادا ويىندارىن وتكىزۋ مۇمكىندىكتەرىن تالقىلادى، دەپ حابارلايدى Qamshy.kz اقپارات اگەنتتىگى الماتى قالاسى اكىمدىگىنىڭ مالىمەتىنە سۇيەنىپ.
لوزاننادان دەلەگاسيامەن بىرگە كەلگەن ۆالەريي رۋحلەديەۆ قالادا قىسقى سپورت تۇرلەرى، سونىڭ ىشىندە سۋردليمپيادا ويىندارىن وتكىزۋ بويىنشا قاجەتتى ينفراقۇرىلىمداردىڭ بار ەكەنىن جانە سول ارقىلى مۇمكىندىگى شەكتەۋلى جانداردى بۇقارالىق سپورتقا كەڭىنەن تارتۋعا بولاتىندىعىن ايتتى.
«ءبىز الماتى قالاسىندا سالىنعان تاماشا سپورت ينفراقۇرىلىمىمەن تانىستىق. نىسانداردىڭ ساۋلەتى جانە زاماناۋي ستاندارتقا ساي جابدىقتالعانى عانا ەمەس، وبەكتىلەردىڭ ءىشىن تولتىرعان بەلسەندى سپورتتىق ءومىر دە ءتانتى ەتتى. ءبىز كەرلينگ پەن تاۋ شاڭىعىسى بويىنشا وتكەن رەسپۋبليكالىق جارىستاردى، بالالاردىڭ مانەرلەپ سىرعاناۋ مەن حوككەي ويناۋ بارىسىنداعى جاتتىعۋلارىن، سونىمەن قاتار كونكيي مەن شاڭعىدان جاپپاي سىرعاناۋ سياقتى شارالاردى كوردىك. وسىنىڭ بارلىعى جانە وتە جوعارى دەڭگەيدە وتكەن 28ء-شى بۇكىلالەمدىك قىسقى ۋنيۆەرسيادا بۇگىنگى كۇنى الماتىنىڭ الەمدىك قىسقى سپورت ورتالىعى ەكەنىن دالەلدەيدى»، - دەپ اتاپ ءوتتى ول.
ونىڭ ايتۋىنشا، سۋردليمپيادالار ويىن وتەتىن قالالاردىڭ قوعامدىق كەڭىستىگىن جاسقارتادى. مۇمكىندىگى شەكتەۋلى جاندار ءۇشى ارنايى پاندۋستار، ليفتار، تروتۋارلار، باعدارشامدار پايدا بولادى نەمەسە بۇرىننان بارلارى قايتا جاڭعىرادى، ارنايى بەلگىلەر، ۆيزۋالدى كورسەتكىشتەر جانە كوپتەگەن باسقالارى ورناتىلادى.
«كەرەڭدەردىڭ حالىقارالىق سپورت كوميتەتىنىڭ قۇرىلعانىنا 94 جىل ىشىندە قىسقى سۋردليمپيادا ويىندارى ازيا كونتينەنتىندە بىردە – ءبىر رەت وتپەگەن ەكەن. كوپ جىلدىق تاجىريبەدەن بايقاعانىمىز، سۋردليمپيادا ويىندارى وتكەن سوڭ مۇمكىندىگى شەكتەۋلى جانجداردىڭ بويىندا دەنەشىنىقتىرۋ مەن سپورتقا دەگەن بەلسەندىلىك ارتا تۇسەدى. ويىندار ولاردىڭ ەرىك-جىگەرىن، الەۋمەتتىك ومىرگە دەگەن قىزىعۋشىلىعىن ارتتىرادى. الماتىدان ءوتىنىم تۇسكەن جوق، ءبىراق ءبىز قالانى وسى ويىنداردىڭ بولىپ قالۋى مۇمكىن استاناسى سانايمىز»، - دەپ تولىقتىردى ول ءوزىنىڭ ءسوزىن.
ايتا كەتەرلىگى، قازىرگى كەزدە قالادا 44،1 مىڭ مۇگەدەك تۇرادى، ولاردىڭ 5-مىڭعا جۋىعى قۇلاعى ناشار ەستيتىندەر. 2017 جىلى مۇگەدەكتەرگە الەۋمەتتىك كومەك رەتىندە 4،1 ملرد. تەڭگە ءبولىندى
سۋردليمپيادا ويىندارى – قۇلاعى ساڭىراۋ ادامداردىڭ سپورتتىق جارىسى، كەرەڭدەردىڭ العاشقى بۇكىلالەمدىك ويىندارى 1924 جىلى پاريجدە وتكەن بولاتىن.
