ادۆوكات دجوحار وتەبەكوۆ قازاق ارنايى قىزمەتتەرىنىڭ مەسسەندجەرلەردەگى حاتتارعا قول سۇعا المايتىنىن ايتتى. بۇل تۋرالى ول ءوزىنىڭ Telegram كانالىندا جازدى.

– بىرەۋدىڭ قۇدىرەتىنە سەنۋگە قۇمارتىپ تۇرادى ەكەنسىزدەر! مەن جازدا اقپاراتتىق قاۋىپسىزدىككە ارنالعان حالىقارالىق سەمينارعا قاتىستىم. Telegram، Signal، Viber، Facebook Messenger مەن WhatsApp جەلىلەرى ماتىندىك حابارلامالاردى بۇرىننان ەكىجاقتى شيفرلاۋمەن قورعايدى. WhatsApp-تان وزگە بارلىعىندا سەرۆەرلەردە ساقتالمايتىن قۇپيا چاتتارى جانە بار. ايرىقشا سەنىمدىلىك ءۇشىن سولاردى قولدانۋ كەرەك.

ايتپەسە، تەوريالىق تۇرعىدان قاراعاندا، ارنايى قىزمەتتەر سىزدەردىڭ جازىسقان حاتتارىڭىزدى سەرۆەرلەردەن الۋى مۇمكىن. ءبىراق ءوز باسىم امەريكالىقتاردىڭ ارنايى قىزمەتتەرگە ونداي اقپارات بەرەتىنىنە كۇماندانامىن. ناقتىلاي كەتەيىن. ءيا، تەرروريزممەن كۇرەس دەگەن ۇرانمەن اقپارات بەرۋى ىقتيمال، الايدا وندايدى ەستىمەپپىن. جاقىندا end-to-end شيفرلاۋ جۇيەسى Skype-تا دا پايدا بولادى.

مۇنى ءوز تاجىريبەمنەن دالەلدەي الامىن. مەن نەبىر ماڭىزدى قىلمىستىق ىستەردى كوردىم، ءبىراق مەسسەندجەرلەردىڭ بۇزىلعان مىسالىن كەزدەستىرمەپپىن.

وزىڭىزگە قارسى قولدانىلۋى مۇمكىن قوڭىراۋلارعا جوعارىدا ايتىلعان 5 مەسسەندجەردىڭ بىرەۋىن پايدالانىڭىز. ولاردىڭ تىڭدالعانىن دا ەشقاشان ەستىمەپپىن.

مەن WhatsApp-تان الىنىپ، باسىپ شىعارىلعان مەسسەندجەرلەردەگى حات الماسۋلاردىڭ توم-توم  سكرينشوتتارىن كوردىم. كۇشتىك قۇرىلىمدارعا ءسىزدىڭ مەسسەندجەرىڭىزدى بۇزىپ جاتۋدىڭ قاجەتى جوق.

ورگاندارعا ءسىزدى جەكە چاتتاعى سۇحباتتاسىڭىز نەمەسە توپتىق چاتتاعى قاتىسۋشىلار ۇستاپ بەرەدى. بۇكىل قىلمىستىق ىستەر – جالعان اقپارات تاراتۋ، تەرروريزمدى ناسيحاتتاۋ، بوپسالاۋ، الاياقتىق جانە ت.ب. – سولاردىڭ ارقاسىندا جينالعان.

الدىمەن اينالاڭىزعا جانە تىلىڭىزگە، سودان كەيىن عانا گادجەتتەرىڭىز بەن پارولدارىڭىزعا اباي بولىڭىز، – دەدى ادۆوكات.