سۇلەيمەنوۆ ولجاس سەرىكباي ۇلى ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆتىڭ جاستار ساياساتى ماسەلەلەرى بويىنشا شتاتتان تىس كەڭەسشىسى بولىپ تاعايىندالدى، دەپ حابارلايدى Qamshy.kz اقپارات اگەنتتىگى. 

ولجاس سۇلەيمەنوۆ 1990 جىلعى 24 مامىردا قاراعاندى وبلىسىندا دۇنيەگە كەلگەن. بۇگىندە «CentrAsia Group» كومپانياسىنىڭ  ءونىدىرىس جونىندەگى ديرەكتورى بولىپ قىزمەت ەتۋدە.  

«بولاشاق» باعدارلاماسىمەن وقۋعا ءتۇسىپ، قىتايدىڭ تونگجي ۋنيۆەرسيتەتىن «ينجەنەر-قۇرىلىسشى» ماماندىعى بويىنشا  بىتىرگەن. 2012-2013 جىلدار ارالىعىندا تونگجي ۋنيۆەرسيتەتىندەگى «International Students Association» حالىقارالىق ستۋدەنتتەر قاۋىمداستىعىنىڭ پرەزيدەنتى.  قىتايدىڭ سيان قالاسىنداعى «Kazakhstan Students Association in China»  قازاقستاندىق ستۋدەنتتەردىڭ جاستار ۇيىمىنىڭ نەگىزىن قالاۋشى.

«Drexler & Partner Construction Group» جانە  «PMJ Asia Construction Group  حالىقارالىق كومپانيالارىندا قىزمەت ەتتى، «ناتر» اق-نىڭ قىتايداعى باس وكىلى بولىپ جۇمىس ىستەدى. 2016-2017 جىلدارى «SHEBERBUILD» قۇرىلىس كومپانياسىنىڭ باس ديرەكتورى لاۋازىمىندا بولعان.

 «دارىن» مەملەكەتتىك جاستار سىيلىعىنىڭ يەگەرى،  «بولاشاق» قاۋىمداستىعىنىڭ،  بۇۇ  جانىنداعى جاس كوشباسشىلار قاۋىمداستىعىنىڭ مۇشەسى.

2015 جىلى بۇۇ (بىرىككەن ۇلتتار ۇيىمى) ۇيىمداستىرعان «منوگو يازىكوۆ - ودين مير» ەسسە بايقاۋىندا جەڭىمپاز اتاندى جانە بۇۇ باس اسسامبلەياسىنىڭ مىنبەرىندە  «سۋ - تىرشىلىك كوزى» تاقىرىبىندا بايانداماسىن وقىعان.

ولجاس سۇلەيمەنوۆ ءمينيستردىڭ شتاتتان تىس كەڭەسشىسى رەتىندە "قازاقستان 2020: بولاشاققا جول" مەملەكەتتىك جاستار ساياساتىنىڭ 2020 جىلعا دەيىنگى تۇجىرىمداماسىن ىسكە اسىرۋ شەڭبەرىندە مەملەكەتتىك جاستار ساياساتىنىڭ ءتيىمدى ۇلگىسىن قالىپتاستىرۋعا ءوز ۇلەسىن قوساتىن بولادى.