الەمدەگى ەڭ ۇلكەن بەس بانك ازيادا ورنالاسقان. ونىڭ تورتەۋى قىتايعا تيەسىلى.
ءقازىر ازيالىق بانكتەر جوعارى تابىسىنىڭ ارقاسىندا ينۆەستورلاردى تارتىپ وتىر. كەز كەلگەن ەلدىڭ ۇكىمەتى ەلدەگى بانك يندۋسترياسىنىڭ دامۋىن ءجىتى قاداعالاپ، قولداۋ كورسەتىپ وتىرادى. ازياداعى قارجى ينستيتۋتتارىنىڭ قالاي جۇمىس ىستەيتىنىن ايتىپ كورەلىك.
الەمدەگى ەڭ ءىرى بەس بانكتىڭ ازيادا ورنالاسۋىنىڭ سىرى نەدە؟ وڭىردەگى ءوز ىسىنە بەرىلگەن قىزمەتكەرلەردىڭ كۇندىز-تۇنى جۇمىس ىستەگەن ەڭبەگىنىڭ ناتيجەسى مە؟
ارينە، جوق! ازيا بانكتەرى جىلدار بويى جيناعان ابىرويىنىڭ ارقاسىندا اۋقىمىن ۇلعايتىپ، قاناتىن كەڭگە جايىپ كەلەدى.
ازياداعى بانكتەردەن قارجى الىپ وتىرعان جەرگىلىكتى كومپانيالار، كاسىپورىندار مەن شارۋاشىلىقتار دا وسىپ-وركەندەپ جاتىر.
بۇل بانكتەر مەن كاسىپورىندار قالاي جۇمىس ىستەيدى؟ بۇلاردىڭ باتىستاعى مەكەمەلەردەن قانداي ايىرماشىلىعى بار؟
ازياداعى بانك اكتيۆتەرى مولايىپ، قۇنى دا كۇن سايىن قىمباتتاپ بارادى
1980 جىلدان 2010 جىلعا دەيىنگى ارالىقتا بانكتەردىڭ قارجى قورى قىتايدا 20 ەسە، جاپونيادا 15 ەسە، وڭتۇستىك كورەيادا 13 ەسە ارتقان.
تومەندەگى كەستەدەن 2010-2016 جىلدار ارالىعىندا ازيا ەلدەرىندەگى بانكتەردىڭ قىزمەتى قالاي وسكەنىن بايقاۋعا بولادى.
سونىڭ ىشىندە: قىتايدا 9 پايىز، ءۇندىستاندا 5 پايىز، يندونەزيادا 7 پايىز، گونكونگتا 8 پايىز، مالايزيا 4 پايىز، سينگاپۋردا 5 پايىز، فيليپپيندە 9 پايىز، وڭتۇستىك كورەيادا 6 پايىز، تايۆاندا 4 پايىز، تايلاندتا 5 پايىز، ۆەتنامدا 12 پايىز جانە باسقا ەلدەردە 12 پايىز ءوسىم تىركەلسە، جاپونيادا 2 پايىز تومەن تۇسكەن.
ازيا ەلدەرىندەگى بانكتەردىڭ 2010 جىلدان 2013 جىلعا دەيىنگى ورتاشا جىلدىق ءوسىمى – 10،5 پايىز. ال 2014 جىلدان 2016 جىل ارالىعى 6،9 پايىزدى كورسەتىپ وتىر.
تومەندەگى كەستەدە كورسەتىلگەندەي، ازيا-تىنىق مۇحيتى ايماعىنداعى ەلدەردىڭ جيىنتىق اكتيۆتەرى مەن كىرىس ءوسىمى الەمنىڭ قالعان بولىگىن باسىپ وزعان.
دەرەكتەرگە سۇيەنسەك، ازيا-تىنىق مۇحيت ايماعىنداعى ەلدەردە بانك سالاسى قارقىندى دامۋدا.
ال مىنا كەستەدە ازيا-تىنىق مۇحيت ايماعىنداعى (جۇڭگو، تايلاند، ۆەتنام، يندونەزيا جانە ت.ب.) دامۋشى ەلدەر اكتيۆ قورى جاعىنان دۇنيەجۇزىندە ءۇشىنشى ورىنعا تۇراقتايدى دەپ بولجانعان.
اكتيۆتەر مەن نەسيەلەردىڭ بايلانىسى
بانكتە جيناقتالعان اكتيۆتەر كوپ بولعان سايىن ول كوبىرەك پايدا تۇسىرەدى. ادەتتە نەسيە ءوسىمىنىڭ 1 پايىز ارتۋى ەكونوميكالىق وسىمگە 0،57 پايىز تابىس اكەلۋى مۇمكىن. بايقاعانىمىزداي، نەسيەلەۋدىڭ ءوسۋى مەن ءجىو ءوسۋى اراسىندا مىقتى كوررەلياسيا بار.
قىتايداعى نەسيەلەۋدىڭ ءوسۋى مەن ءجىو ءوسۋىنىڭ اراسىنداعى بايلانىس تومەندەگى كەستەدە كورسەتىلگەن.
