وزبەكستاننىڭ مەكتەپكە دەيىنگى ءبىلىم بەرۋ مينيسترلىگىنىڭ سايتىندا حابارلانعانداي، پرەزيدەنت شاۆكات ميرزيايەۆتىڭ كەنجە قىزى شاحنوزا ۋماروۆا مەكتەپكە دەيىنگى ءبىلىم بەرۋ مەكەمەلەرىنىڭ قىزمەتىن ۇيىمداستىرۋ باسقارماسى باسشىسىنىڭ ورىنباسارى بولىپ تاعايىندالعان، دەپ ازاتتىققا سۇيەنە وتىرىپ جازادى Qamshy.kz اقپارات اگەنتتىگى. 

وتكەن جىلى 18 جەلتوقساندا شاۆكات ميرزيايەۆ وتكىزگەن سەلەكتورلىق جيىندا شاحنوزا ۋماروۆا مەكتەپكە دەيىنگى ءبىلىم بەرۋ ءمينيسترى اگريپپينا شينمەن قاتار وتىرعان.

مەكتەپكە دەيىنگى ءبىلىم بەرۋ مينيسترلىگى 2017 جىلى 30 قىركۇيەكتە پرەزيدەنتتىڭ «مەكتەپكە دەيىنگى ءبىلىم بەرۋ جۇيەسىن تۇبەگەيلى جەتىلدىرۋ شارالارى تۋرالى» جارلىعىمەن قۇرىلعان.

وتكەن جىلدىڭ سوڭىندا بيلىك وزبەكستاندا وڭتۇستىك كورەيانىڭ تاجىريبەسى نەگىزىندە بالا باقشالار قۇرىلاتىنىن حابارلاعان بولاتىن.

بۇدان ەرتەرەك ميرزيايەۆتىڭ قىزىنىڭ جاقىن سەرىكتەرىنىڭ ءبىرى شاحنوزا ۋماروۆا اكەسى پرەزيدەنت بولىپ سايلانعانعا دەيىن بىرنەشە جىل وڭتۇستىك كورەيادا تۇرعانىن جانە ەندى ول تاجىريبەسى جاڭا جۇمىسىندا پايداعا اسۋى مۇمكىن ەكەنىن حابارلاعان.

31 جاستاعى شاحنوزا ۋماروۆا وتابەك ۋماروۆقا كۇيەۋگە شىققان. كەيبىر وزبەك باق-ىنىڭ جازۋىنشا، ۋماروۆ ميرزيايەۆتىڭ «جەكە كۇزەتشىسى» سانالادى. وتكەن جىلدىڭ باسىندا Eltuz.com ينتەرنەت باسىلىمى ميرزيايەۆ كىشى كۇيەۋبالاسى وتابەك ۋماروۆتى پرەزيدەنتتىڭ قاۋىپسىزدىك قىزمەتىنە جۇمىسقا العانىن حابارلاعان بولاتىن. سايت اقپاراتىنا قاراعاندا، ۋماروۆ 2017 جىلى قاڭتاردىڭ باسىندا پرەزيدەنت قاۋىپسىزدىك قىزمەتى باسشىسىنىڭ ءبىرىنشى ورىنباسارى بولىپ تاعايىندالعان.