اقتوبە ايماعىندا اۆتوبۋستاعى ورتتەن قازا تاپقان 52 ادامنىڭ 44ء-ىنىڭ سۇيەكتەرى وبلىس ورتالىعىنا جەتكىزىلدى. قايعىلى وقيعادان امان قالعان 5 ادام اقتوبە اۋرۋحاناسىنىڭ جانساقتاۋ بولىمىنە جاتقىزىلدى. دارىگەرلەر ولاردىڭ ومىرىنە ءقاۋىپ جوعىن ايتادى، دەپ ازاتتىققا سۇيەنە وتىرىپ جازادى Qamshy.kz اقپارات اگەنتتىگى.
44 ءمايىت اقتوبەگە جەتكىزىلدى
قاڭتاردىڭ 18-ىندە اقتوبەدەن 320 كيلومەتر قاشىقتاعى "سامارا-شىمكەنت" تاسجولىندا جولاۋشىلار اۆتوبۋسىندا بولعان ورتتە قازا تاپقان 52 ادامنىڭ 44ء-ىنىڭ سۇيەكتەرى سول كۇنى وبلىس ورتالىعىنا جەتكىزىلدى. باسىم كوپشىلىگى قاتتى كۇيىپ قالعاندىقتان قۇربان بولعانداردىڭ كىم ەكەندەرىن انىقتاۋ قيىن بولىپ وتىر دەپ مالىمدەدى وبلىس اكىمدىگىندە جۇماعا اۋعان ءتۇنى وتكەن بريفينگتە قازاقستان ىشكى ىستەر ءمينيسترىنىڭ ورىنباسارى ەرلان تۇرعىمبايەۆ. ونىڭ ايتۋىنشا، قالعان 8 ادامنىڭ سۇيەكتەرى اقتوبەگە ەكىنشى كولىكپەن جۇما كۇنى جەتكىزىلمەك.
- وقيعا بولعان جەردە كۇشەيتىلگەن تەرگەۋ توبى جۇمىس ىستەپ جاتىر. مامانداردىڭ جۇمىسىنا اۋا رايىنىڭ قولايسىزدىعى جانە وقيعا ورنىندا وتە اۋقىمدى جۇمىستاردىڭ اتقارىلۋى قيىندىق كەلتىرىپ وتىر. كريميناليستەر مەن ساراپشىلار ءتۇنى بويى ماسەلەنىڭ ءمان-جايىن زەرتتەپ، 19 قاڭتار كۇنى ءتۇس اۋا اۆتوبۋستاعى ءورتتىڭ ناقتى سەبەبىن ايتۋلارى ءتيىس، - دەدى ۆيسە-مينيستر.
ەرلان تۇرعىمبايەۆ اقتوبە وبلىسىندا جولاۋشىلار اۆتوبۋسى ورتەنىپ، 52 ادامنىڭ قازا بولۋىنا بايلانىستى استانادا ارنايى قۇرىلعان ۇكىمەتتىك كوميسسيا مۇشەلەرىنىڭ ءبىرى. ىشكى ىستەر ءمينيسترىنىڭ ورىنباسارى سالونىندا 57 ادام بولعان اۆتوبۋس جول اپاتىنا ۇشىراماعانى جانە وقيعا ورنىنان قانداي دا ءبىر قىلمىس بەلگىلەرى بايقالماعانى تۋرالى ايتتى. تاس جولدىڭ بويىندا قاڭقاسى عانا قالعان اۆتوبۋستاعى ءورتتى ەرلان تۇرعىمبايەۆ "وقىس وقيعا" دەپ اتادى.
ورتتەن امان قالعانداردىڭ ايتۋىنشا، سالوننان الدىمەن ءتۇتىن ءيىسى شىققان. جولاۋشىلار سول يىستەن ۋلانعان بولسا كەرەك. جۇرگىزۋشىلەر كولىكتى دەرەۋ توقتاتىپ، جولاۋشىلاردى قۇتقارماق بولعانىن ايتتى. ءبىراق اۆتوبۋستىڭ ەسىگىن اشقاندا سالونعا لاپ ەتكەن وتتەگىنىڭ اسەرىنەن ءورت باستالعان. "سەترا" – قوس قاباتتى اۆتوبۋس. كولىك جۇرگىزۋشىلەرى اۆتوبۋستىڭ ءبىرىنشى قاباتىنا جۇك تيەلگەنىن، جولاۋشىلاردىڭ ەكىنشى قاباتتا وتىرعانىن ايتادى. بىردەن بوي بەرمەي كەتكەن جالىن سالونداعى جۇكتى كۇلگە اينالدىرىپ، ادامداردىڭ سىرتقا شىعۋىن قيىنداتقان، - دەيدى ەرلان تۇرعىمبايەۆ.
ۇكىمەتتىك كوميسسيانىڭ تاعى ءبىر مۇشەسى، قازاقستاننىڭ ينۆەستيسيالار جانە دامۋ ءمينيسترىنىڭ ءبىرىنشى ورىنباسارى رومان سكلياردىڭ ايتۋىنشا، X 335 PCM دەگەن مەملەكەتتىك نومىرمەن تىركەلگەن "سەترا" ماركالى اۆتوبۋس قازاقستاننىڭ شىمكەنت قالاسىنان شىعىپ، رەسەيدىڭ قازان قالاسىنا جولاۋشىلار اپارا جاتقان. حالىقارالىق باعىتتاردا تۇراقتى قىزمەت كورسەتپەگەن، سالونىندا 57 جولاۋشىسى بار كولىك "سامارا-شىمكەنت" تاس جولىنىڭ 1068-شاقىرىمىنا جەتكەندە ورتەنگەن.
اۆتوبۋستاعى 57 ادامنىڭ 52ء-سى سىرتقا شىعا الماي قالعان. ءوز كۇشتەرىمەن شىققان بەس ادامنىڭ ءبىرى – 50 جاستاعى كولىك جۇرگىزۋشىسى نۇرجان قىرعىزبايەۆ وڭتۇستىك قازاقستان وبلىسىنىڭ تۇرعىنى. جۇرگىزۋشىنىڭ 33 جاستاعى كومەكشىسى ماقسات پەرنەبەكوۆ پەن 40 جاستاعى جولاۋشى بولات تاڭاتاروۆ تا سول ايماقتان. ولارمەن بىرگە وزبەكستان ازاماتتارى – 1988 جىلى تۋعان ارور يسكاكوۆ پەن 1980 جىلى تۋعان يسرايلدجون ميرزاحمەدوۆ تە اپاتتان امان قالعان، - دەپ حابارلادى رومان سكليار.
ۇكىمەتتىك كوميسسيامەن بىرگە وقيعا ورنىنا بارىپ كەلگەن اقتوبە وبلىسى اكىمىنىڭ ورىنباسارى سەرىك تولەنبەرگەنوۆ وقيعا ورنىنداعى احۋالدىڭ كۇردەلى ەكەنىن ايتادى.
- اقتوبەدەگى سوت-مەديسينالىق ساراپتاما ورتالىعى تاۋلىك بويى جۇمىس ىستەيتىن بولادى. ويتكەنى، ازىرشە قۇربان بولعانداردىڭ كىم ەكەنى انىقتالعان جوق. مارقۇمداردىڭ ءاتى-جونى بەلگىلى بولعاننان كەيىن عانا ولاردى وزبەكستان جاعىنا بەرۋ تۋرالى شەشىم قابىلدانادى، - دەدى تولەنبەرگەنوۆ.
