ش.ايمانوۆ اتىنداعى «قازاقفيلم» كينوستۋدياسى «مۇزبالاق» اتتى تولىقمەترلى كوركەم انيماسيالىق ءفيلمنىڭ ترەيلەرىن جاريالادى. بۇركىت پەن ادامنىڭ دوستىعى تۋرالى باياندايتىن بۇل مۋلتفيلم ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن. ءفيلمدى رەجيسسەر-انيماتور – تۇردىبەك مايدان جانە تىلەك تولەۋعازى جاساپ شىققان، دەپ جازادى Qamshy.kz اقپارات اگەنتتىگى. 

ەكى جىل كولەمىندە جاسالعان بۇل فيلمدە 40-قا جۋىق كينەماتوگرافيانىڭ وسى جانرىندا ەڭبەك ەتىپ جۇرگەن وتاندىق ماماندار ىستەگەن.  ۇزاقتىعى 65 مينۋت قۇرايتىن مۋلتفيلم 2D جانە 3D فورماتىندا جاسالعان جانە ءار سەكۋندىندا 24-25 كادر سۋرەت سالىنعان. كەيىپكەرلەردى دىبىستاۋعا ەرجان جارىلقاسىن ۇلى، جانات تىنىبايەۆ، سامات قورداباي، تولەبايەۆ ەرعالي دۇيسەن ۇلى، الما ءادىل قىزى ەسىمدى تەاتر جانە كينو اكتەرلەرى قاتىسقان.

ء-بىز وسى «مۇزبالاقتى» جاساۋدان بۇرىن «تاستۇلەك»  اتتى قىسقا مەترلى انيماسيالىق ءفيلمدى اياقتاعان كەزىمىز، «قازاقفيلمگە» باقىت عافۋ ۇلى  باسشى بولىپ  كەلگەن بولاتىن. ول كىسى انيماسيا بولىمىنە كەلىپ ءبىزدىڭ «تاستۇلەك» انيماسيالىق ءفيلمىمىزدى كورىپ، ۇناتىپ، كوڭىلىنەن وتكەننەن كەيىن، وسى ءفيلمدى ارى قاراي تولىقمەتراجدى ەتىپ جاساۋدى تاپسىرىپ، قولدايتىنىن ايتتى. سودان باستاپ وسى تاقىرىپ نەگىزىندە جاڭا تولىقمەتراجدى «مۇزبالاق» ءمۋلتفيلمىنىڭ سەناريىن جازدىق، جاڭا كەيىپكەرلەردى قوستىق جانە ەكشن جانرىندا تۇسىرەمىز دەپ شەشتىك. مادەنيەت جانە سپورت مينيسترلىگىنىڭ قولداۋىمەن وسى ءمۋلتفيلمدى جاساپ شىقتىق، - دەدى تىلەك تولەۋعازى.

اۆتورلار «مۇزبالاق» اتتى انيماسيالىق ءفيلمى ارقىلى تاريح قويناۋىنا ەنىپ، جوعالىپ بارا جاتقان،  قازاقتىڭ عاسىرلار بويى قالىپتاسقان ساياتشىلىق مادەنيەتىن كورسەتۋ ارقىلى، اداممەن بۇركىت اراسىنداعى سەنىم نەگىزىنە قۇرالعان دوستىقتى جاس ۇرپاق ساناسىنا ءسىڭىرۋدى كوزدەيدى.

-بەس جاسار بۇركىتتى قازاق مۇزبالاق دەيدى. قازاق بۇل تاكاپپار قۇسقا جاس ەرەكشەلىگىنە قاراي ات قويادى. ءبىز اڭعا شىقپاساق تا، اڭشىلاردىڭ اڭگىمەسىن تىڭداپ وستىك. ۇلكەندەرمەن ەرىپ، اڭدى قالاي تۇزاققا تۇسىرۋگە بولاتىنىن دا شەت جاعالاپ كوزىمىزبەن كوردىك. قىراندى قالاي قوندىرىپ، تۇعىرىنا قالاي وتىرعىزۋ قاجەتتىگىن، اتتى قالاي باپتاپ، قالاي جاراتاتىنىن، قۇستى قالاي قولعا ۇستاۋعا بولاتىنىن بىزدەي ەشكىم بىلمەسى انىق، - دەدى تۇردىبەك مايدان.

ەستەرىڭىزگە سالا كەتەيىك، كينوستۋديا 2017 جىلى ەكى تولىقمەترلى انيماسيالىق ءفيلمدى ءوندىردى. سونىڭ ءبىرى «مۇزبالاق» بولسا، ەكىنشىسى رەجيسسەر اداي ءابىلدانىڭ تاريحي تۇلعا، قولباسشى كۇلتەگىن تۋرالى كارتيناسى. اتالعان فيلمدەر تولىققاندى اياقتالعان جانە پروكاتى مەن تۇساۋكەسەرى ۇستىمىزدەگى جىلدىڭ كوكتەمىنە جوسپارلانعان.

اننوتاسيا:

ەرتە زاماندا ادامدار كەسىرىنەن جەر استىنداعى ايداھارعا اينالاپ كەلە جاتقان ابجىلان ويانىپ، جەر بەتىنە شىعىپ، ماڭايىن جالماپ، قازاق اۋىلىنا ۇلكەن اپات اكەلىپ، ۇرەي تۋعىزادى. ول اۋىلدى وتقا وراپ، قارسى كەلگەندى جالماپ كەلە جاتقاندا، ءبىر قىران بۇركىت بالاپانىن قورعاپ، ونىمەن ايقاسادى. اقىرى ابجىلان قايتا جەر استىنا قاشىپ جوق بولادى. ال قىران وتقا ورانعان ۇيادان بالاپانىن الىپ، الىسقا ۇشىپ كەتەدى. ادام جۇتىپ دانىككەن ابجىلان كۇن تۇتىلىپ، ءوزىنىڭ ايداھارعا اينالار ءساتىن اسىعا كۇتەدى...