الماتى اكىمدىگى ۇلىستىڭ ۇلى كۇنى – ناۋرىز مەيرامىنا دايىندىق شارالارىن ءالى باستاماعان، دەپ جازادى Qamshy.kz اقپارات اگەنتتىگى.

كۇن مەن ءتۇن تەڭەلىپ، قىس بويى قار قۇرساۋىندا بولعان تىرشىلىك وياناتىن، جەر مەن كوك جاڭاراتىن مەزگىلگە نەبارى بىرەر اي قالدى. الايدا تىرپ  ەتكەن قالا باسشىلىعى جوق. ناۋرىزعا دايىندىق بارىسىنا بايلانىستى جىبەرگەن ساۋالىمىزعا اكىمدىك «ناۋرىز مەيرامىنىڭ كونسەپسياسى ازىرلەنۋ ۇستىندە» دەگەن جاۋاپ قاتتى.

2017 جىلدىڭ قازانىندا كالەندار بويىنشا اۋىساتىن جاڭا جىلعا دايىندىق بارىسىن اكىمدىكتەن سۇراستىرعانىمىزدا وزىمىزگە كەرەكتى جاۋاپتى سول ايدا-اق الدىق. وندا مەرەكەگە دايىندىقتىڭ تاۋەلسىزدىك كۇنىنەن كەيىن باستالاتىنى، جەرگىلىكتى بيۋدجەتتەن 600 ميلليونداي قارجى بولىنگەنى، قالانى بەزەندىرۋ ءۇشىن قانداي ديزاين ەلەمەنتتەرىنىڭ قولدانىلاتىنى بۇگە-شۇگەسىنە دەيىن جازىلعان.

ال بىلتىر جاڭا جىلعا دايىندىقتىڭ شىن مانىسىندە قاشان باستالعانى قالا تۇرعىندارىنا ءمالىم. تاۋەلسىزدىك كۇنى بىلاي تۇرسىن، جەلتوقسان باستالماي قالا ءتۇرلى-تۇستى جىلتىراقتارعا تۇنىپ تۇردى. دۇكەندەر مەن ءىرى ساۋدا ورتالىقتارىنىڭ ءىشى-سىرتى بەزەندىرىلىپ، شىرشالار ورناتىلدى. جاڭا جىلدىق كوڭىل-كۇيدى كۇزدىڭ قارا سۋىعىندا-اق سەزىنگەن ەدىك. مەرەكەگە وراي ءتۇرلى جەڭىلدىكتەر جاسالىپ، بايقاۋلار وتكىزىلدى. سوندا الماتى اكىمدىگىنىڭ ەكى سولەگەنى مە؟ مۇنى تۇسىنە المادىق.

بۇل ءار جىل سايىن ايتىلىپ جۇرگەن اڭگىمەنىڭ ءبىر سارىنى. ايتىپ شارشاعان حالىقتىڭ قاراسى كوپ. عاسىرلار بويى  اتا-بابامىز اسىر سالىپ تويلاپ كەلە جاتقان ءوز مەيرامىمىز رەسەي پاتشالىعى تۇسىندا كەلگەن جاڭا جىلدىڭ تاساسىندا قالىپ قويعالى ءبىراز بولدى. وعان دالەل – بۇگىندە ەلىمىزدىڭ كەي وڭىرىندە ۇلىستىڭ ۇلى كۇنى ءبىر كۇن عانا تويلانادى. قالا تۇرعىندارى مەرەكەنى تەك 22 ناۋرىزدا سەزىنە الادى. وندا دا الاڭعا بارىپ، جارتى كۇندىك كونسەرت تاماشالايدى. ءبىر كەسە ناۋرىز كوجەسىن ءىشىپ، قازاق ەستراداسى انشىلەرىنىڭ اندەرىن تىڭداۋمەن-اق ۋاقىتى وتەدى. ال اۋىلدى ايماقتاردا تەك سول كۇنى ەرلەرىمىز شاپان جامىلىپ، ايەلدەرىمىز كومزولىن كيەدى. بالالار اسىق ويناپ، كۇرەسىپ، التىباقان تەۋىپ سول ءبىر كۇننىڭ قىزىعىنا باتىپ قالۋعا تىرىسىپ باعادى. ارينە، ءبىر كۇندىك شاراعا دايىندىقتى اسىقتىرماۋعا بولاتىنىن قالا باسشىلىعى دا جاقسى ءبىلىپ العان.

ناۋرىز مەيرامى جونىندە مەملەكەت باسشىسى نۇرسۇلتان نازاربايەۆ: «تاريحى تەرەڭدە جاتقان ناۋرىز مەرەكەسى قازاق جەرىندە ءارقاشان تويلانعان، الايدا، ءبىر زامانداردا حالقىمىز ونى جوعالتىپ الدى. ەلىمىز تاۋەلسىزدىك العاننان كەيىن ءتول مەرەكەمىزدى ءبىز قايتادان جاڭعىرتتىق. بۇل كۇنى ۇرىسقان اعايىن تابىساتىن، رەنجىسىپ قالعان جاستار قايتادان تابىسىپ، ماحابباتتارىن ارتتىرىپ، باس قوساتىن، بارلىق جامانشىلىق ۇمىتىلاتىن، جاقسىلىققا قاراي بەت بۇراتىن كەز بولعان. تۇبىندە ءبىزدىڭ ناعىز جاڭا جىلىمىز وسى ناۋرىز مەيرامى بولۋى قاجەت. جۇڭگو ءوزىنىڭ جاڭا جىلىن اقپاننىڭ ورتاسىندا ءبىر اپتا تويلايدى. شىعىستىڭ بارلىق حالقىنىڭ ءوز جاڭا جىلدارى بار. ءبىز دە تۇبىندە ءوز مەرەكەمىزگە كەلۋىمىز كەرەك» دەگەن بولاتىن. ياعني ناۋرىز مەرەكەسىنىڭ ماڭىزىن تۇسىنە ءبىلۋىمىز كەرەك. الايدا ءتول مەرەكەمىز تۋرالى ساۋالىمىزعا باسشىلىقتان ماردىمدى جاۋاپ الا المادىق.