بۇگىن شىمكەنت قالاسىنىڭ اكىمى نۇرلان ساۋرانبايەۆ تاعى دا سوزىنەن جاڭىلدى دەپ جازادى Qamshy.kz اقپارات اگەنتتىگى rgmedia.kz سايتىنا سىلتەمە جاساي وتىرىپ. بۇگىن شىمكەنت قالاسى قاراتاۋ اۋدانىنىڭ اكىمى عابيت ماۋلەنقۇلوۆ حالىق الدىندا ءۇشىنشى رەت ەسەپ بەردى. بۇل قورىتىندى ەسەپ بەرۋ كەزدەسۋىنە قالا اكىمى نۇرلان ساۋرانبايەۆ ارنايى قاتىستى.

عابيت پاتشاحان ۇلى 15 مينۋتتىق بايانداماسىن 100 پايىز مەملەكەتتىك تىلدە جاسادى. اۋدان اكىمى وتكەن جىلى اتقارىلعان جۇمىستاردى جىلىكتەپ، الداعى ۋاقىتتاعى جوسپارلارىمەن ءبولىستى. كەزدەسۋ كەزىندە نۇرلان ساۋرانبايەۆ مەملەكەتتىك تىلدە سويلەگىسى كەلسە دە، ورىسشا ءسوزدى ارالاستىرىپ جيىندى قورىتىندىلادى. حالىقتان كوپ ءسوز ەستىگەننەن كەيىن نۇرلان ساۋرانبايەۆ كەشەگىدەن تاۋىرلەۋ سويلەدى. 

جيىن سوڭىندا قالا اكىمى نۇرلان ساۋرانبايەۆ:

– سىزدەردىڭ الدارىڭىزدا ەلباسى تاپسىرماسى بويىنشا اۋدان اكىمى بۇگىن ءوز ەسەپ بايانداماسىن جاسادى. مەنىڭ ويىمشا، نەگىزى كوپ جۇمىس جاسالدى. ءبىراق جاڭاعى كوبىسى ايتىپ جاتقانداي الدىمىزدا كوپ جۇمىس بار. وعان ەندى تەك قانا قاراجات كەرەك ي سودان كەيىن بىرلىك كەرەك. وسى جەردە كوبىسى وتىرعاندار – اسار تۇرعىندارى. اسار دەپ ويلاعاندا ەسكە كەلەتىن سوزدەر ول – بىرلىك، اۋىلداس، رۋلاس دەگەن… وسىلاي بىرلەسىپ جۇمىستىڭ ءبارىن اتقارايىق. راحمەت سىزدەرگە! – دەپ ويىن مەملەكەتتىك تىلدە قورىتىندىلادى.

ەسكە سالا كەتەتىن بولساق، نۇرلان ساۋرانبايەۆ ورىسشا سويلەمەگىنى ءۇشىن اۋىل اكىمى باۋىرجان احمەتالىۇلىنا ەسكەرتۋ جاساعان بولاتىن.