رەيتينگ دەگەن بار ءقازىر. سىن مەن ساپانىڭ زاماناۋي ولشەمى بولىپ تۇر. وسى رەيتينگ قازاق باسپاسوزىنە قازىلعان ور ىسپەتتى. سەبەبى مەملەكەتتىك ساتىپ الۋشىلار مەن جارناما بەرۋشىلەرگە وتكىر ايتىپ، وزا جازعانىڭنان، اقيقاتىن ايعايلاتىپ، اشىندىرا ايتقانىڭنان گورى وي قورىتپاسا دا وقىرماننىڭ مەن كورەرمەننىڭ كوپ بولعانى عانا قاجەت. ول ءتىپتى ءسىزدىڭ ءباسپاسوزىڭىزدىڭ نە تۋرالى جازاتىنىن بىلمەۋى دە مۇمكىن. قازىرگى رەيتينگ جۇيەلەرى سونداي، ايتىپ جازعانىڭنىڭ سالماعىن، ىقپالى مەن ناتيجەسىن ەمەس باس سۇققاننىڭ سانىن عانا ولشەيدى. الايدا وكپەمىز رەيتينگ جۇيەسىنە ەمەس، سونداي رەيتينگپەن جۇمىس ىستەيتىندەرگە.

قازاقستاندا ءبىز بىلەتىن رەيتينگ ولشەۋشى — سايتتاردا zero.kz بولسا تەلەارنالاردى TNS Central Asia كومپانياسى. قازاقشا سايتتاردى ولشەپ جۇرگەن «ساناق» جوباسى توقىراپ تىندى. «زەرو-نىڭ» ءبىر كەمشىلىگى تەك قازاقستاندىق پروۆويدەرلەردەن كەلەتىن IP سانىن ەسەپتەيدى دە قازاقستاندىق سايتتاردىڭ شەتەلدىك وقىرماندارىن ەسەپكە المايدى. ونىڭ مالىمەتتەرىنىڭ Google Analytics دەرەكتەرىمەن ىلعي دا قاراما-قايشى شىعاتىنىنان-اق كوپ نارسەنى اڭعارۋعا بولادى. ەكىنشى كەمشىلىگى جازىلۋشىلارىنىڭ وتكەن رەيتينگىن ەسەپكە المايدى. ياعني وعان تىركەلگەن سايت تەك 24 ساعاتتاعى ءوز رەيتينگىن، سوڭعى ءبىر ايعا دەيىنگى بارلىق سايتتاردىڭ جالپى رەيتينگىن عانا كورە الادى.

20 جىلدان بەرى قازاقستاندىق تەلەارنالاردىڭ رەيتينگىن ولشەپ كەلە جاتقان  TNS Central Asia. ونىڭ قۇرىلتايشىلارى Gallup Media جانە Gallup AdFact اتتى رەسەيلىك كومپانيالار. وسىدان سوڭ-اق ارى قارايعى اڭگىمەنىڭ قاجەتى جوق شىعار. اتالعان رەيتينگ ولشەۋشىلەر قانشالىقتى دالدىكپەن، ادىلدىكپەن ولشەيدى؟ ول جاعى ءبىر تاڭىرگە ايان. ۇكىمەتكە دە ايان دەيتىن ەدىك، اقپارات جانە كوممۋنيكاسيالار مينيسترلىگىنىڭ باسپا ءسوز قىزمەتى رەيتينگ ولشەيتىن مەكەمەلەردىڭ ءوز قۇزىرەتى شەگىندە باقىلانبايتىندىعىن حابارلادى. ياعني باعا بەرگىشتەردىڭ بۇيرەگى كىمگە بۇرسا دا، وندىقتى وپىرىپ كىمگە بەرسە دە ءوز ەركىندە.

الايدا، مەملەكەتتىك ساتىپ الۋشىلار نەندەي سەبەپكە نەگىزدەلىپ، جوعارىداعى كومپانيالاردىڭ ستاتيستيكاسىن سۇرايدى؟ ولاردىڭ كورسەتكىشى مەملەكەتتىك تاپسىرىستا نە نارسەگە نەگىزدەلىپ مىندەتتەلەدى؟ بۇل سۇراققا اقپارات مينيسترلىگىنەن تومەندەگىدەي جاۋاپ كەلدى.

«مەملەكەتتىك تاپسىرىس قازاقستان رەسپۋبليكاسى اقپارات جانە كوممۋنيكاسيالار ءمينيسترىنىڭ 2017 جىلعى 28 اقپانداعى № 75 بۇيرىعىمەن بەكىتىلگەن «رەسپۋبليكالىق دەڭگەيدە مەملەكەتتىك اقپارات ساياساتىن جۇرگىزۋ جونىندەگى مەملەكەتتىك تاپسىرىستى ورنالاستىرۋ قاعيدالارىنا» سايكەس بۇقارالىق اقپارات قۇرالدارى اراسىندا ورنالاستىرىلادى.

مەملەكەتتىك تاپسىرىستىڭ ينتەرنەت-رەسۋرستاردى باللدىق باعالاۋ جۇيەسىنە سايكەس، ءار تاپسىرىسقا قاتىسۋشى سايتتىڭ ايلىق قاراۋ سانىن راستايتىن انىقتامانى كونكۋرس قۇجاتتارىمەن قوسا كوميسسيانىڭ قاراۋىنا ۇسىنا الادى. الايدا، كونكۋرستىڭ بۇل تالابى قاتىسۋشىلارعا مىندەتتەلمەيدى، جانە دە بۇنداي انىقتاما ۇسىنىلماعان جاعدايدا، اتالعان كورسەتكىش بويىنشا عانا قاتىسۋشى-ينتەرنەت-رەسۋرس باعالانبايتىندىعىن اتاپ وتەمىز.

سونىمەن قاتار، مەملەكەتتىك تاپسىرىسقا قاتىسۋدىڭ شارتىنا سايكەس ءار قاتىسۋشى سايتتىڭ ايلىق كورسەتكىشىن ءوز تاڭداۋى بويىنشا كەز-كەلگەن رەيتينگ ولشەيتىن مەكەمەنىڭ انىقتاماسىمەن بەكىتە الادى جانە دە بۇل جەردە مينيسترلىكپەن ەشقانداي شەكتەۋ قويىلماعان.

مەملەكەتتىك تاپسىرىستىڭ جوعارىدا اتالعان باللدىق باعالاۋ جۇيەسىندەگى كورسەتكىشى وتاندىق ينتەرنەت كەڭىستىگىندەگى ينتەرنەت-رەسۋرستاردىڭ اراسىنداعى باسەكەگە قابىلەتتىلىكتى ارتتىرۋ ماقساتىندا جاسالىنعان شارا بولىپ تابىلادى»، دەگەن مينيسترلىك جاۋابىندا.

حوش دەڭىز. مەملەكەتتىك ساتىپ الۋ جۇيەسىندە باستى كوزىر ءدال سول ايلىق كورسەتكىش ەكەنىن مينيسترلىك بىلمەي مە؟ ترافيك اعىنى مەن رەيتينگ ءۇشىن سارى باسىلىم دەڭگەيىندەگى كونتەنتكە جۇتىلىپ بارا جاتقان باسىلىمداردىڭ وبالى كىمگە؟ رەيتينگ دەگەنگە باقىلاۋ بولماعان سوڭ ب ا ق ءىرىپ، مەملەكەتتىك ساتىپ الۋ ساسىپ كەتپەسە بولعانى.