ونىڭ ءومىرى گولليۆۋدتىڭ «اۆياتور» ءفيلمىن ەسكە سالادى دەپ جازادى qamshy.kz ءتىلشىسى.
سيۋجەت بويىنشا گوۆارد حيۋز اكەدەن قالعان مول مۇرانى ۇشاق قۇراستىرۋعا جۇمسايدى. تۇتاس مەملەكەت بولىپ قولعا الاتىن جوبانى ءوز اقشاسىنا جۇزەگە اسىرعان اۆياتور امەريكالىقتاردىڭ ساناسىندا ۇلت باتىرى رەتىندە قالدى. ال ءبىزدىڭ كەيىپكەر سەرىكقازى قۇرمانعالييەۆتىڭ گوۆاردتان ايىرماشىلىعى، اكەسى ايگىلى ونەرتاپقىش تا، ميليونەر دە ەمەس. سەرىكقازى قۇرمانعالييەۆ توقسانىنشى جىلدارداعى قاربالاستا رەسەي مەن قىتايدان ەنەرگەتيكا سالاسىنا قاجەت قوندىرعىلار تاسىمالداپ، ازدى-كوپتى داۋلەت جيعان. قازاقستاننىڭ العاشقى ۇشاعىن كوككە كوتەرۋ ارمانى ونى ءساتتى باستالعان كاسىپكەرلىك جولدان بۇرىپ، اۆياسياعا اۋدارىپ جىبەرسە كەرەك.
«1999 جىل. مەملەكەت داعدارىستان ءالى ەس جيا قويماعان كەز. «اسكەر، اۆياسيا، فلوتقا ەرىكتى كومەك» قوعامىنىڭ (دوسااف) بەلدى مۇشەلەرى گەنناديي شاركۋتوۆ، سەرگەي نەتۋنايەۆ، ۆلاديسلاۆ پاري اعايىندى بولاتحان ەكەۋىمىزدىڭ يدەيامىزدى جۇزەگە اسىرۋعا اتسالىستى. اۆياسيا سالاسىندا ديپلومىمىز بولماسا دا، تەحنيكاعا دەگەن اۋەستىك ءبىزدى ۇلكەن ماقساتتارعا جەتەلەدى. اسكەردە دە ستراتەگيالىق ماڭىزدى تەحنيكالاردىڭ تىزگىنىن ۇستاپ ماشىقتانعاندىقتان، ۇشاق قۇراستىرۋعا قاجەت تەحنولوگيانى ءوزىمىز دايىندادىق» - دەپ ەسكە الادى سەرىكقازى قۇرمانعالييەۆ. ءسويتىپ، تىنىمسىز ەڭبەكتىڭ ناتيجەسىندە ەكى جىل دەگەندە ەكى كىسىلىك ۇشاق دايىن بولادى.
ءتىپتى وسكەمەننىڭ شەتىندە سىناقتان ءساتتى وتەدى دە. وسى جوباسىن تاۋەلسىزدىكتىڭ 10 جىلدىعىنا ارناۋ ءۇشىن كەيىپكەرىمىز بالا-شاعاسىنىڭ اۋزىنان جىرىپ، جيناعان قارجىسىنىڭ ءبارىن سالعان ەكەن. «ۇشاققا سەرتيفيكاتتى رەسەيدەن الۋ كەرەك بولاتىن. ول جاقتان كەلگەن ساراپشىلار «قارلىعاشتان» جالعىز ءمىن تاپتى. ءبىز پايدالانعان بۇراندالاردىڭ ارنايى سەرتيفيكاتى جوق بولاتىن. وعان ءتىپتى ءمان دە بەرمەپپىز. وسىلايشا، ساراپشىلاردىڭ كەڭەسىمەن بارلىق بۇراندانى «ۆاز» زاۋىتىنىڭ ونىمدەرىمەن الماستىردىق. 50 ساعات اۋەدە قالىقتاپ، ءار قاناتى 20 ادامنىڭ سالماعىنا شىداس بەرەتىنى دالەلدەنگەن سوڭ، رەسەيلىك ساراپشىلار سوڭعى تەكسەرۋ ءۇشىن وزدەرىنە شاقىردى» - دەپ ەسكە الادى ونەرتاپقىش.
ول جاقتاعى تەكسەرۋدەن سەرىكقازىنىڭ «قارلىعاشى» ساۋ قايتپايتىنى الدىن الا ەسكەرتىلىپتى. ۇشاقتى باستان-اياق تەكسەرۋ ءۇشىن تۇگەلدەي شاشىپ، قيراتۋ قاجەت-تۇعىن. سەرىكقازى مەن جولداستارى وعان دا كونەدى.
الايدا، اۋە تەحنيكاسىن رەسەيدىڭ شەكاراسىنا كىرگىزۋ ءۇشىن رەسمي ماسكەۋدىڭ رۇقساتى قاجەت ەدى. سەرىكقازىنىڭ جولداعان حاتتارىنا جوعارى جاقتان جاۋاپ بولماي، جوبا اياقسىز قالدى. ەل اراسىندا «سەرىك-سامولەت» دەگەن لاقاپ اتقا يە بولعان ونەرتاپقىش قاڭقۋ ءسوز بەن مىسقىلعا شىداي الماي، قاڭتارۋلى قالعان ۇشاعىن تانىسىنا سىيلاپ جىبەرەدى. «قارلىعاشتىڭ» ودان كەيىنگى تاعدىرى بەيمالىم. «قولىمىزدا ەكى كىسىلىك ۇشاقتان جولاۋشى تاسىمالداۋشى ۇشاققا دەيىن جەتۋدىڭ جوسپارى بولدى. سول كەزدە تەحنولوگيامىز سەرتيفيكاتقا يە بولسا، ينۆەستور تابار ەدىك. بۇگىن اسپانىمىزدا وتاندىق ۇشاقتار دا سامعاپ جۇرەر مە ەدى؟
ءبىزدىڭ ەكى كىسىلىك ۇشاقتارمەن ەگىس القاپتارىن تىڭايتىپ، زالالسىزداندىرۋ جۇمىستارىن جۇرگىزۋگە بولاتىن. اۋەدەن پاترۋلدەۋ تىكۇشاق قىزمەتىنەن الدەقايدا ارزانعا تۇسەر ەدى. ىشكى ءتۋريزمدى دامىتۋعا دا شاعىن ۇشاقتار اسا ىڭعايلى. ءبىراق جولىمىز بولمادى. ءقازىر سول ءبىر شابىتتى شاقتاردان ەستەلىك رەتىندە سارعايعان فوتوسۋرەتتەر عانا قالدى» - دەپ كۇرسىنەدى سەرىكقازى قۇرمانعالييەۆ.
ونەرتاپقىش ماڭدايى تاسقا تيسە دە، قارسى كەلگەن قيىندىققا قاسقايىپ تۇرىپتى. ولاي دەيتىنىمىز، بۇگىندە 6،3 توننالىق قۇرىلىس كراندارىن قۇراستىرۋدى قولعا العان. ءبىراق، ەكى جىلدىڭ ىشىندە ول «وندىرگەن» كراننىڭ ەكەۋى عانا ءوتىپتى. ءومىرىنىڭ جارتىسىنا جۋىعىن ونەرتابىسقا ارناعان سەرىكقازىنىڭ بۇل كۇندە وتكەنگە وكىنىشى كوپ. ءبىر جۇبانارى، ول «مەن قۇراعان «قارلىعاش» قازاقستان تاريحىنداعى تۇڭعىش وتاندىق ۇشاق رەتىندە قالادى» دەپ ويلايدى.
