وڭتۇستىك كورەيادا ءوتىپ جاتقان قىسقى وليمپيادا ويىندارىندا قازاق قىزى دينارا الىمبەكوۆا التىن مەدال الدى. ول بەلارۋس قۇراماسى ساپىندا بياتلوننان 4ح6 شاقىرىمدىق ايەلدەر ەستافەتاسىنىڭ جەڭىمپازى اتاندى. قازاق قىزدارىنان شىققان تۇڭعىش وليمپيادا چەمپيونى كىم؟ قايدا ءتۋىپ-وستى؟ قانداي ادام؟ Qamshy.kz اقپارات اگەنتتىگى اشىق دەرەككوزدەن الىنعان مالىمەتتەردى ۇسىنادى.

قازاق تەكتى بەلارۋس قىزى

دينارا الىمبەكوۆا 1996 جىلى قاراعاندى وبلىسىنداعى اباي قالاسىندا دۇنيەگە كەلگەن. ءۇش جاسىندا اتا-اناسىمەن بەلارۋسكە قونىس اۋدارعان. اكەسى – قازاق، اناسى – بەلارۋس (كەيبىر دەرەكتەردە ورىس). وزىنەن كەيىن ەۆگەنيي جانە ۋليانا ەسىمدى ءىنىسى مەن ءسىڭلىسى بار. «مەنىڭ سانالى عۇمىرىم بەلارۋستە ءوتتى. ءوزىمدى ءجۇز پايىز بەلارۋس قىزىمىن دەپ سانايمىن»، – دەيدى دينارا.

بەلارۋس پرەزيدەنتى الەكساندر لۋكاشەنكو بياتلون ەستافەتاسىندا جەڭىسكە جەتكەن دينارا الىمبەكوۆا، نادەجدا سكاردينو، داريا دومراچيەۆا، يرينا كريۆكونى «جەكە ەرلىگى ءۇشىن» وردەنىمەن ماراپاتتاۋ تۋرالى قاۋلىعا قول قويدى.

دينارا الىمبەكوۆا – بەلارۋس رەسپۋبليكاسىنىڭ ەڭبەك سىڭىرگەن سپورت شەبەرى. 2015 جىلى جاستار اراسىنداعى الەم چەمپيوناتىندا التىننان القا تاققان.

فورتەپيانودا وينايدى، سنوۋبوردپەن سىرعانايدى

دينارا الىمبەكوۆا حالقىنىڭ سانى 10 مىڭنان ءسال-اق اساتىن چاۋسى قالاسىندا ءوستى. حورەوگرافيامەن اينالىسىپ، ونەر مەكتەبىندەگى فورتەپيانو سىنىبىندا وقىدى. 11 جاسىندا  العاش رەت اياعىنا شاڭعى كيدى. «سپورتقا جان-تانىممەن بەرىلگەنىم سونشالىق، ساباقتان گورى جاتتىعۋدى جاقسى كورەتىنمىن»، – دەيدى دينارا. باسىندا بارىنە ۇلگەرۋگە تىرىسىپ، سپورت جارىستارىنا دا، مۋزىكا بايقاۋلارىنا دا قاتىساتىن. كەيىن بياتلونعا ءبىرجولا دەن قويادى.

وتباسىندا سپورتشىلار جوق. «اتام عانا سالاۋاتتى ءومىر سالتىن ۇستانادى، قىستا جالاڭاياق جۇگىرىپ شىنىعادى»، – دەيدى دينارا. ءوزى كونكي مەن سنوۋبوردقا قىزىعادى. ادرەنالينگە جانى قۇمار.

جوعارى ءبىلىمدى بياتلونشى

22 جاستاعى دينارا الىمبەكوۆا – جوعارى ءبىلىمدى بياتلونشى. بەلارۋس مەملەكەتتىك دەنە شىنىقتىرۋ ۋنيۆەرسيتەتىنىڭ شاڭعى سپورتى جانە بياتلون كافەدراسىندا وقىعان. اتالمىش وقۋ ورنىن 2017 جىلى ءبىتىرىپ شىققان.