بۇل وقيعا رەسەيدىڭ ۆولگوگراد قالاسىندا بولعان. اتا-انا 7 جىل بويى بالاسىن ءولدى دەپ ويلاعان. بالانىڭ اتا-اناسى جايلى سوت ورىنداۋشىلارى اليمەنت تولەۋىن تالاپ ەتىپ حابارلاسقان. بەلگىلى بولعانداي جەتى جىل بويى دەنى ساۋ بالا جەرگىلىكتى ينتەرناتتا تۇرعان. بۇل جايىندا Life.ru جازادى.
2011 جىلى ۆولگوگرادتىق ەرلى-زايىپتىلاردىڭ وتباسىندا ۇل دۇنيەگە كەلگەن. الايدا دارىگەرلەر بالانىڭ قاتەرلى اۋرۋمەن تۋعانىن ايتقان. دارىگەرلەر بۇل اۋرۋمەن بالا ءبىر اپتادان ارتىق ءومىر سۇرمەيدى دەپ اناسىن كوندىرگەن. سول كەزدە اتا-انا جۇرەكتەگى قورقىنىشپەن بالادان باس تارتقان.
الايدا ءبىر اپتا وتكەن سوڭ اتا-انا ءوز شەشىمدەرىنەن اينىپ، بالانى قايتارىپ الماق بولادى. اۋرۋىنان ايىقتىرىپ، ءوسىرۋدى ويلايدى. پەرزەنتحاناعا كەلگەن ساتتە دارىگەرلەر بالانىڭ شەتىنەپ كەتكەنىن ايتقان.
التى جىل وتكەن سوڭ ايەلگە بانكتەن حات كەلگەن. سوت ورىنداۋشىلارىنىڭ شەشىمىمەن ايەلدىڭ ەسەپشوتى 230 مىڭ رۋبلگە بۇعاتتالعان. ول ءوزىنىڭ ەش قارىزى بولماعانىن ايتىپ فەدەرالدى سوت ورىنداۋشىلارىنىڭ فيليالىنا كەلگەن.
انىقتالعانداي ايەل ءوزىنىڭ «ولگەن» بالاسى التى جىل ءومىر سۇرگەن ينتەرنات-ۇيىنە اليمەنت تولەمەگەن. ينتەرنات باسشىلىعى سوت ورىنداۋشىسىنا شاعىم جاساپ كەلگەن. ەرلى-زايىپتىلار وزدەرىنىڭ ۇلدارى ءۇشىن اليمەنت تولەمەگەنىن ايتقان.
سول كۇننەن كەيىن ەرلى-زايىپتىلار ءوز بالالارىن قولدارىنا العان. اتا-انالىق قۇقىعىن قايتارعان. الايدا پەرزەنتحانا قىزمەتكەرلەرىنىڭ نەگە بالانى ولدىگە بالعانى ءالى دە بولسا بەلگىسىز.
