پاۆلوداردا № 29 مەكتەپتىڭ 2-سىنىپ وقۋشىسى حاليدا اۋباكىروۆانى مەكتەپكە باسىنا اق ءتۇستى ورامال تارتىپ بارعانى ءۇشىن ساباققا كىرگىزبەي قويدى دەپ حابارلايدى Qamshy.kz اقپارات اگەنتتىگى azattyq.org سايتىنىڭ دەرەگىن نەگىزگە الا وتىرىپ. وقۋشىنىڭ اكەسى ەرقانات اۋباكىروۆ پروكۋراتۋراعا شاعىمدانىپ، قىزىنىڭ ءبىلىم الۋىنا «زايىرلى اق ءتۇستى ورامال تارتقانى ءۇشىن» كەدەرگى كەلتىرمەۋدى سۇرادى.

اۋباكىروۆتىڭ ايتۋىنشا، قىزىن ورامال تارتقانى ءۇشىن 9 ناۋرىز كۇنى دە ساباققا كىرگىزبەي قويعان. مۇنىڭ الدىندا قىزى ساباققا ورامالمەن بارىپ جۇرگەن. «قازاقستاندىق مادەنيەتپەن تاربيەلەنگەن قىزىم ءوز ىنتاسىمەن كادىمگى جۇقا اق ءتۇستى ورامال تارتادى. بۇعان بايلانىستى كەز-كەلگەن وسەك-اياڭ، كەمسىتۋ ونىڭ جان-دۇنمەسىنە كەرى اسەر ەتىپ، پسيحولوگيالىق سوققى بولىپ تيەدى»، — دەلىنگەن ەرقانات اۋباكىروۆتىڭ پروكۋراتۋراعا جازعان شاعىمىندا.

№ 29 مەكتەپ ديرەكتورى ۆلاديسلاۆ ەلەنيچ وقۋشىنىڭ ساباققا كىرگىزىلمەگەنىن راستادى. ول وقۋشى مەكتەپ فورماسىنا قويىلاتىن تالاپتى بۇزعاندىقتان كىرگىزىلمەگەنىن ايتتى. ەلەنيچ مەكتەپتە ءبىر عانا قىز ورامال تارتاتىنىن جانە ونىڭ اتا-اناسىنا مەكتەپتە ورامال تارتۋعا بولمايتىنى تۋرالى بىرنەشە رەت ەسكەرتىلگەنىن ايتادى.

— ولاردىڭ مەكتەپكە ورامال تاعىپ كەلۋىنە بايلانىستى ءبىلىم سالاسىنداعى قاداعالاۋ دەپارتامەنتىمەن سويلەستىك. اتا-اناسى اكىمشىلىك جاۋاپقا تارتىلىپ، ەسكەرتۋ جاسالدى، ولاردى كامەلەتكە تولماعاندار ءىسى بويىنشا كوميسسياعا شاقىردىق. ءبىراق ول وتباسى وعان قىڭق دەمەيدى جانە بالالارىن ءوز قالاۋى بويىنشا كيىندىرۋگە قۇقىعىمىز بار دەپ ويلايدى، - دەدى ۆلاديسلاۆ ەلەنيچ.

ديرەكتور سونىمەن قاتار اتا-انانىڭ ءبىلىم جانە عىلىم ءمينيسترىنىڭ مەكتەپ فورماسىنا قويىلاتىن تالاپ تۋرالى 2016 جىلى 26 قاڭتاردا شىعارعان № 26 بۇيرىعىن بۇزىپ وتىرعانىن دا ايتادى.

توعىز جاستاعى حاليدا اۋباكىروۆا ءبىرىنشى سىنىپتان بەرى ورامال تاعادى. اكەسىنىڭ ايتۋىنشا، وتباسىندا ايەلى مەن قىزدارى تۇگەل ورامال تارتادى.