كۇن ساناپ ەمەس، ساعات ساناپ جاڭارعان وزىق تەحنولوگيالار الەمدى ۇلكەن وزگەرىسكە ۇشىراتىپ وتىرعانى بايقالادى. وسى وڭ وزگەرىستەرگە بارلىق جاعىنان دايىن، ءارى باسەكەگە قابىلەتتى بولۋى ءۇشىن بۇگىننەن باستاپ ورتا جانە شاعىن بيزنەس وكىلدەرى جاۋاپكەرشىلىكتەرىن تۇسىنگەنى ءجون. ەلباسى «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى حالىققا ارناعان جولداۋىندا وسىنى الدىعا قويدى. سونداي-اق، جۇزەگە اسىرۋعا ون جاڭا مىندەتتى جۇكتەگەنىن بىلەمىز.

ەلىمىز الەمگە بەيبىتشىلىك سۇيگىشتىگىمەن تانىلىپ وتىر. ەندى ساپالى، تابيعي دارۋمەنگە باي ونىمدەرىمەن دە كوزگە تۇسە باستاعانى قۋانتادى. اسىرەسە، اۋىل شارۋاشىلىعى سالاسىنداعى الەۋەتىمىز وتە جوعارى. ەلباسى نۇرسۇلتان نازاربايەۆ جولداۋىندا اگروونەركاسىپ كەشەنىن زاماناۋي تەحنولوگيامەن جابدىقتاۋعا كەڭىنەن توقتالسا، بۇعان تولىق نەگىز بار. ويتكەنى،  قازاقستاننىڭ جەرى كەڭ-بايتاق، توپىراعى قۇنارلى، كليماتى ءتۇرلى داقىلداردى وسىرۋگە وتە قولايلى. ءبىز وسى مۇمكىنشىلىكتەردى تولىعىمەن يگەرۋىمىز كەرەك. جولداۋدىڭ ەرەكشەلىگى سول، «قازاقستاندا جاسالعان» دەگەن برەندتى تەز ارادا قالىپتاستىرۋ ءۇشىن نە ىستەۋ كەرەكتىگى ناقتى مىندەتتەرمەن كورسەتىلگەن.

جامبىل اۋدانىندا سوڭعى جىلدارى  سالانى دامىتۋدا جوسپارلى جۇمىستار جۇزەگە اسىرىلىپ كەلەدى. مال باسىن اسىلداندىرۋ، ونىمدەرىن وڭدەۋ قولعا الىندى. ينۆەستورلاردىڭ باستاماسىمەن ءبىرشاما تىڭ جۇمىستار جۇيەلەنگەنى قۋانتادى. ءالى دە ءداندى-داقىلداردى قايتا وڭدەۋ كەشەنىن دامىتىپ، ساپالى ءونىم ۇسىناتىن زاۋىتتار سالىنسا دەگەن وي كەلەدى. بۇل قادامدى باستاۋ ءۇشىن اگرارلىق سالانىڭ بىلىكتى ماماندارىن دايارلاعان ءجون  سياقتى. ەلباسى تەز ارادا اگرارلىق ۋنيۆەرسيتەتتەردىڭ بازاسىن قايتا جاساقتاۋدى، ءسويتىپ وزىق ءبىلىم ورتالىقتارىن قۇرۋدى ۇسىنعانى تەگىن ەمەس. «اقىلدى» تەحنولوگيالاردى دامىتۋدى مىندەتتەگەن دە ۇتىمدى. بۇل دالا توسىندەگى سان سالالى جۇمىستاردى ادام كۇشىمەن ەمەس، تەحنولوگيانىڭ وزىق تۇرلەرى اتقاراتىن بولادى دەگەن ءسوز. قازىرگى تاڭدا ادام اتقاراتىن سۋارۋ، ءدان ەگۋ، تىرمالاۋ، جەر جىرتۋ، تىڭايتۋ سەكىلدى دالا جۇمىستارىنا تەحنيكانى پايدالانعان ءجون. دامىعان ەلدەردە بۇل تاجىريبە كەڭىنەن قولدانىلىپ جۇرگەنى بەلگىلى.

قازىرگى تاڭدا اۋىل شارۋاشىلىعى دەسە، كوز الدىمىزعا كۇن استىندا قارا جۇمىس ىستەپ، تەرلەپ-تەپشىپ جۇرگەن ديقان ەلەستەيتىنى جاسىرىن ەمەس. جاستاردىڭ ساناسىندا وسى تۇسىنىك قالىپتاسقان. بۇل جولداۋ اۋىل شارۋاشىلىعى باعىتىنداعى ءبىز اتاپ كورسەتكەن كەدەرگىلەردى جويىپ، جاڭا مىندەتتەر ارقىلى الەمدىك وزىق تەحنولوگيالاردى ءتيىمدى پايدالانۋعا ۇندەيتىنىمەن قۇندى. ءىسساپارعا شىققان سايىن ەلدى مەكەندەردەگى شارۋالارىن شالقىتقان ەڭبەك ادامدارىنىڭ كۇش-جىگەرىنە كوڭىلىم تولادى. ولار جەر ەمشەگىن ەمىپ، ءتورت تۇلىككە قاجەتتى جەم-شوپ دايىنداپ، جاز بويى تەر توگەدى. ال، كۇز بەن قىستا مال بورداقىلاپ، تۇتىنۋشىنى ساپالى ەت ونىمدەرىمەن قامتاماسىز ەتەدى. كوكتەمدە دالا ءتوسىن دۋماندى ەڭبەككە بولەيتىنى تاعى بار. ولار ەڭبەكپەن تاپقان دۇنيەنىڭ ءقادىرىن بىلەتىنىن بايقادىم. بۇعان ەلباسى ەڭبەك ەرىنىڭ جوعارى بەلگىسىن توسىنە قاداعان كاسىپكەر، جەرلەسىمىز جاقسىلىق ۇشكەمپىروۆتىڭ قول جەتكىزگەن جەتىستىگى كۋا. وليمپيادا جانە الەم چەمپيونى ج.ۇشكەمپىروۆ ءقازىر مىڭبايەۆ اۋىلىندا تۇرادى. ونىڭ اۋىل تۇرعىندارىنىڭ الەۋمەتتىك-تۇرمىستىق جاعدايىن، ەكونوميكالىق ءوسۋىن جاقسارتۋ ءۇشىن كوپتەگەن تىڭعىلىقتى جۇمىستار اتقارىپ كەلە جاتقانى بارشامىزعا ءمالىم. سانالى عۇمىرىنىڭ سوڭعى 20 جىلىن كاسىپكەرلىككە ارناعان جاقسىلىق ۇشكەمپىروۆتىڭ باسشىلىعىمەن مىڭبايەۆ اۋىلىندا جاسوسپىرىمدەردىڭ سالاۋاتتى ءومىر سالتىن ۇستانىپ، سپورتتىڭ سامبو، دزيۋدو، بوكس، فۋتبول سياقتى بىرنەشە تۇرلەرىمەن اينالىسۋىنا مۇمكىندىك بەرەتىن سپورت مەكتەبى، ۇي-كۇيسىز جۇرگەن وتباسىلارىن باسپانامەن قامتاماسىز ەتۋ ءۇشىن 38 بولمەلى «جاقسىلىق» جاتاقحاناسى، اۋىل بۇلدىرشىندەرىنىڭ مەكتەپكە دەيىنگى دايارلىعىن جەتىلدىرۋگە ارنالعان «جاقسىلىق» بالاباقشاسى سالىنىپ، كوپشىلىك پايدالانۋىنا بەرىلدى. بۇل دا اتپال ازاماتتىڭ ەلىنە، جەرىنە دەگەن سۇيىسپەنشىلىگىن، پاتريوتتىق اسقاق سەزىمىن كورسەتەدى. جاقسىلىق اعانىڭ «جاقسىلىق» اتتى شارۋا قوجالىعى 1998 جىلى قۇرىلعان بولاتىن.  يەلىگىندەگى 20 مىڭ گەكتار جەرى، 8000 ءىرى قارا مالى بار، سونداي-اق ەگىن شارۋاشىلىعىن دا دوڭگەلەتىپ وتىرعان كاسىپكەردىڭ العا قويعان ماقساتتارى اسۋدا-اسۋ.  جولداۋعا – قولداۋ دەگەن وسى عوي. ءالى دە ونىڭ بيىك بەلەسىن باعىندىراتىندار قاتارى كوبەيسە دەگەن تىلەك تە ويىما ورالادى.

مايرا الدابەرگەنوۆا