بۇگىن پارلامەنت ماجىلىسىندە «جەكەشەلەندىرۋدى جۇزەگە اسىرۋ بارىسى تۋرالى» تاقىرىبىندا ق ر ۇلتتىق ەكونوميكا ءمينيسترى تيمۋر سۇلەيمەنوۆتىڭ قاتىسۋىمەن ۇكىمەت ساعاتى وتۋدە، دەپ جازادى Qamshy.kz اقپارات اگەنتتىگى.
مينيستر سۇلەيمەنوۆ جەكەشەلەندىرۋ ىسىنە قاتىستى ءوزىنىڭ بايانداماسىندا 90-شى جىلداردىڭ باسىندا جەكەشەلەندىرۋدىڭ ءبىرىنشى تولقىنى بولعانىن اتاپ ءوتتى.
«مەملەكەتتىك مەنشىكتى وزگەرتۋ جانە ونى جەكەشەلەندىرۋ پروسەسىنىڭ 90-شى جىلداردىڭ باسىندا باستالعانى بارشاڭىزعا ءمالىم. بۇل كەزەڭدى جەكەشەلەندىرۋدىڭ «ءبىرىنشى تولقىنى» دەپ اتاۋعا بولادى.
«ءبىرىنشى تولقىننىڭ» ءتۇيىندى مىندەتى جەكە بيزنەستى دامىتۋ ءۇشىن نارىقتىق ەكونوميكا مەن بازالىق شارتتاردى جاساۋ بولىپ تابىلادى. بۇل باعدارلاما شەڭبەرىندە 43 مىڭنان استام مەملەكەتتىك مەنشىك وبەكتىلەرى جەكەشەلەندىرىلىپ، كىرىستەر شامامەن 360 ملرد. تەڭگەنى قۇرادى.
90-شى جىلدارداعى جەكەشەلەندىرۋ نارىقتىق ەكونوميكانىڭ مىقتى ىرگەتاسىن قالىپتاستىرۋعا، جەكە باستاما مەن مەنشىكتىڭ نىعايا تۇسۋىنە مۇمكىندىك بەردى»، - دەدى مينيستر.
ونىڭ ايتۋىنشا، بۇگىنگى كۇنگە دەيىن مەملەكەتتىك سەكتور ەل ەكونوميكاسىنىڭ ەداۋىر بولىگىن الادى. قارجى جانە ادامي رەسۋرستار ءۇشىن كۆازيمەملەكەتتىك سەكتورمەن تەڭ ەمەس باسەكەلەستىك جاعدايىندا جەكەمەنشىك كاسىپورىنداردىڭ ودان ءارى دامۋى قيىنداۋى مۇمكىن ەكەندىگىن دە ايتىپ ءوتتى.
«مەملەكەتتىك ورگاندار ەلىمىزدىڭ باسشىلارى بەرگەن ءاربىر تاپسىرما، مىندەتتەر بويىنشا ۇيىمدار قۇرادى، بۇل كۆازيمەملەكەتتىك سەكتور سۋبەكتىلەرى سانىنىڭ وسۋىنە، قىزمەتتىڭ قايتالانۋىنا الىپ كەلەدى جانە تۇتاستاي العاندا ەل بيۋدجەتىنىڭ جۇكتەمەسى ۇلعايادى.
ەگەر كۆازيمەملەكەتتىك سەكتور سۋبەكتىلەرىنىڭ 2010 - 2014 جىلدار ارالىعىنداعى ءوسۋ سەرپىنىن تالدايتىن بولساق، جىل سايىنعى ءوسىم ورتاشا ەسەپپەن 5% قۇرادى جانە 2014 جىلدىڭ سوڭىنا قاراي ونىڭ سانى 7،7 مىڭنان استام بولدى.
ناتيجەسىندە، باسەكەلەستىكتى جانە جەكە بيزنەستى دامىتۋ، ەل ەكونوميكاسىنىڭ سالالارىن جاڭعىرتۋ جانە دامىتۋ ءۇشىن ينۆەستورلاردى تارتۋ ماقساتىندا مەملەكەت باسشىسى ۇكىمەتتىڭ 2014 جىلعى 14 اقپانداعى كەڭەيتىلگەن وتىرىسىندا اۋقىمدى جەكەشەلەندىرۋ جۇرگىزۋ ارقىلى مەملەكەتتىڭ ەكونوميكاداعى ۇلەسىن ەكونوميكالىق ىنتىماقتاستىق جانە دامۋ ۇيىمى ەلدەرىنىڭ دەڭگەيىنە دەيىن، ياعني جالپى ىشكى ءونىمنىڭ 15%-نا دەيىن قىسقارتۋ مىندەتىن قويدى»، - دەيدى تيمۋر سۇلەيمەنوۆ.
