ەلىمىزدىڭ كەز كەلگەن قالاسىندا كوزگە ءتۇرپى، كورىنگەنگە كۇلكى بولىپ تۇرعان كەمشىلىكتەر كوپ-اق. سونداي سوراقىلىقتاردى سۋرەتكە ءتۇسىرىپ الىپ، كوپشىلىك نازارىنا ۇسىنۋدى داستۇرگە اينالدىرساق يگى. ال ءتيىستى مەملەكەتتىك مەكەمەلەر ءوز كەزەگىندە مۇندايعا بەيجاي قاراپ وتىرا بەرمەۋى ءتيىس.
مىسالى، ءبىز استانانىڭ ءبىراز كوشەسىنەن مەملەكەتتىك ءتىلدى شۇلدىرلەتىپ قويعان جايتتاردى كەزىكتىردىك. ابايشا ايتقاندا، «بەتتى باسىپ، قاتتى ساستىق». ءبىراق، «تۇرا قاشقان» جوقپىز. وقىرماندار نازارىنا ۇسىنۋ ءۇشىن نىساناعا الدىق. بۋراباي دەمالىس ايماعىنىڭ حايۋاناتتار باعىنا سوققاندا دا قورشاۋ سىرتىنداعى جازۋدى وقىپ، جاعا ۇستاعانبىز...
سودان، وسىنىڭ ءبارىن ادەتتەگىدەي قارا سوزبەن «تۇيرەگەنشە»، ءبىر-بىر شۋماق ولەڭمەن اشكەرەلەيىك دەپ شەشتىك.
تەلەفوننىڭ ساتىلاتىن ءتۇر-تۇرى
مىنا جەرگە بارىپ قالدىق ءبىر كۇنى...
اۋدارماعا شورقاقتاردىڭ وسىلاي،
ماعىناعا ءمان بەرمەۋى كۇلكىلى!
نامىسسىزدار، مىنالارىڭ نە، ءتىپتى؟!
ۇسىنعاندا، قاي بىلىكسىز بەكىتتى؟
ەكەۋىنىڭ قازاقشاسى كىشكەنتاي،
ال بىرەۋى «زانگەر» بولىپ كەتىپتى.
اۆتوبۋستى توسىپ تۇرار سايام-اي،
ورنىڭدى كىم شۇلدىرلەتتى اياداي؟!
«كوزمەرگەننىڭ» كوزى ءتىرى بولعاندا،
نىساناعا الار ەدى اياماي!
ءتىلبۇزاردا جوق ۇيات تا، ورە دە!
ۇلكەندەردەن الماعان-اۋ ونەگە!
«ەركەك كيىم» دەگەن ەكەن،
وۋ، سوندا
ءتوستارتقىشتى «ۇرعاشى» دەپ بولە مە؟!
«ەڭ جوعارى»؟!. تۇسپەيتىن ەسە كەمگە،
تاڭسىق بولدى مىنا ءبىر ەسەپ ەلگە.
وتىز بەس، وتىز التى، وتىز جەتى...
استارىندا سۇراقتىڭ نەشە تەڭگە؟
ورىن بەرىپ وتىرعانداي توردەن ءبىز،
قازاقشاعا «قاتتى» كوڭىل بولگەنبىز!
مىنا جەردە «ك» ورنىنا «ق»قويسا،
«كولىك ءجۇۇ» دەگەندى دە كورگەنبىز.
ماڭگۇرتتەر شىعارماققا ەلدىڭ ەسىن،
تاعى دا كورسەتەدى ەندى نەسىن؟!
يت-قۇسقا نەكە تاڭعان مىنا تۇرمەن،
ادامدى «شاعىلىستى» دەپ جۇرمەسىن!
جانە دە قورەقتەنبەس، قورەكتەنەر...
بۇل اۋدارماسىماققا سەندىرمەسىن!
بانكتەردىڭ قازاقشاسىن كورسەڭىز،
«ەكىلىككە» سۇرانعانداي ول سەمىز!
الاقانداي چەكتىڭ ءوزى سوراقى،
ءنول بولىپ تۇر، ءبىر ءسات كوڭىل بولسەڭىز!
P.S. ءتىلدىڭ جايىن ايتا سالماي قاقساپ قۇر،
تۇزەتەلىك ۇلتتىق رۋحپەن اسقاق ءبىر!
باسقالارعا ۇلگى بولۋ ورنىنا،
باس قالادا قازاقشامىز اقساپ تۇر...
ەركەعالي بولات ۇلى
