الماتىدا «اتامەكەنگە ورال، الاش بالاسى» اتتى دوڭگەلەك ۇستەل ءوتتى. جيىندا شەتەلدەگى قازاقتاردىڭ جاپپاي كوشۋىنە كەدەرگى بولىپ وتىرعان كورشى ەلدەردەگى ساياسي جانە الەۋمەتتىك ماسەلەلەر تالقىلاندى. قىتايداعى قانداستارىمىزدىڭ قازىرگى جاي-كۇيى دە ايتىلدى، دەپ حابارلايدى Qamshy.kz اقپارات اگەنتتىگى.

باسقوسۋ بارىسىندا «بولاشاق» جاستار قوزعالىسى سىرتتاعى قانداس باۋىرلارعا ۇندەۋ جاريالاپ، ەلگە ورالۋعا شاقىردى. «ازاماتتار، اتاجۇرتقا قايتاتىن ۋاقىت بولدى، كوشتىڭ باسىن بۇرىڭدار»، - دەدى قوزعالىس جەتەكشىسى داۋرەن بابامۇرات.

ساياساتتانۋشى دوس كوشىمنىڭ ايتۋىنشا،  پوليتولوگيادا «تاڭداۋ قۇقىعى» دەگەن باعىت بار. بۇل باعىت بويىنشا ادامدار ءوز تاعدىرىن وزدەرى شەشەدى. شەتەلدە قالىپ، جات جۇرتقا جۇتىلىپ كەتە مە، سوندا وتىرىپ ۇلتتىق قۇندىلىعىن ساقتاي ما، الدە تاريحي وتانىنا ورالا ما – ول اركىمنىڭ ءوز ەركىندە. «ءبىراق ءبىز ءۇشىن قايىرلىسى وسى سوڭعى نۇسقا بولار ەدى»، - دەيدى دوس كوشىم.

ال «جاس قازاق» گازەتى باس رەداكتورىنىڭ ورىنباسارى ەلدوس ءومىرزاق سىرتتاعى قازاقتاردى ەلگە تارتۋدىڭ ءتيىمدى امالدارىن ويلاستىرۋدى ۇسىندى.

«الەۋمەتتىك جەلىدە قىتايدان تراكتورمەن كوشىپ كەلگەن قانداسىمىز تۋرالى ۆيدەو تارادى. سول كىسىنى نەگە ۇلگى ەتىپ كورسەتپەسكە؟ كىشىگىرىم روليك ءتۇسىرىپ دەگەندەي. ويتكەنى ول – ءوز ەلىنە شىنايى پاتريوتتىق سەزىممەن، اق-ادال نيەتپەن كەلگەن ازامات»، - دەدى جۋرناليست.

ايتا كەتەيىك، جۇڭگو، موڭعوليا، وزبەكستان، رەسەي، تۇركىمەنستان، يران، تۇركيا، اۋعانستان ەلدەرىندە ميلليونداعان ەتنيكالىق قازاق ءومىر ءسۇرىپ جاتىر.  تاۋەلسىزدىك العان ساتتەن باستاپ قانداستارىمىز قارقىندى تۇردە ەلگە قايتسا، سوڭعى جىلدارى اتامەكەنگە سىرتتان كەلەتىن قازاقتىڭ لەگى سايابىرلاعان. ستاتيستيكاعا سۇيەنسەك، شەتەلدەگى قازاقتاردىڭ 15-18 پايىزى عانا قازاقستانعا ورالعان.

قامشىگەر – ەرلان تولەۋباي