2019 جىلعى حالىق ساناعىن زاماناۋي اقپاراتتىق تەحنولوگيالاردى پايدالانۋ ارقىلى وتكىزۋ جوسپارلانىپ وتىر. 

تاۋەلسىز قازاقستان تاريحىندا ءۇشىنشى رەت جالپىۇلتتىق حالىق ساناعى بولماق. 2019 جىلعى حالىق ساناعى قالاي وتەدى؟ 2009 جىلعى قايشىلىقتار قايتالانباي ما؟ ساناققا قانشا قارجى بولىنەدى؟ Qamshy.kz اقپارات اگەنتتىگىنىڭ ساۋالىنا ق ر ۇلتتىق ەكونوميكا مينيسترلىگىنىڭ ستاتيستيكا كوميتەتى جاۋاپ بەردى.

مينيسترلىكتىڭ سوزىنشە، ەل تۇرعىندارى ينتەرنەت ارقىلى ونلاين رەجىمدە ەلەكتروندى ساناق پاراقتارىن تولتىرادى.

«ساۋالناما جۇرگىزۋشى مەن ساۋالناماعا جاۋاپ بەرۋشى اراسىنداعى بايلانىس پلانشەت نەمەسە پلانشەتتى قولدانۋ مۇمكىندىگى بولماعان جاعدايدا قاعاز جەتكىزگىشتى پايدالانۋ ارقىلى ورنايدى»، - دەلىنگەن مينيسترلىكتىڭ جاۋابىندا.

2019 جىلى حالىق ساناعىن ۇيىمداستىرۋ مەن جۇرگىزۋ ءۇشىن رەسپۋبليكالىق بيۋدجەتتە كوزدەلگەن قاراجات شەگىندە مىناداي قىزمەتكەرلەر تارتىلادى:

-ەڭبەك شارتى بويىنشا ۇلتتىق ساناقتارعا دايىندىق جانە وتكىزۋ جونىندەگى باسشى؛

-ەڭبەك شارتى بويىنشا ۇلتتىق ساناقتارعا دايىندىق جانە وتكىزۋ جونىندەگى نۇسقاۋشى؛

-وتەۋلى قىزمەت كورسەتۋ شارتى بويىنشا ۇلتتىق ساناقتارعا دايىندىق جانە وتكىزۋ جونىندەگى نۇسقاۋشى؛

-وتەۋلى قىزمەت كورسەتۋ شارتى بويىنشا ينتەرۆيۋەر.

بۇل قىزمەتكەرلەر قر-نىڭ حالىقتى جۇمىسپەن قامتۋ ورتالىقتارىندا تىركەلگەن جۇمىسسىز ازاماتتاردان قۇرالماق.

ايتا كەتەيىك، قازاقستاندا سوڭعى جالپىۇلتتىق حالىق ساناعى 2009 جىلى 25 اقپان مەن 6 ناۋرىز ارالىعىندا ءوتتى. ول ساناقتىڭ قايشىلىعى كوپ بولعان ەدى.  2009 جىلى اقپاننىڭ 24-نەن 25-نە قاراعان تۇندەگى ەسەپتەۋ بارىسىندا قازاقستان تۇرعىندارىنىڭ سانى 16 ميلليون 4 مىڭ 800 ادام بولعان. 2010 جىلدىڭ 11 قاڭتارىندا سول ۋاقىتتاعى ستاتيستيكا اگەنتتىگىنىڭ ءتوراعاسى ءاليحان سمايىلوۆ قازاقستان حالقىنىڭ سانى 16 ميلليون 196 مىڭ 800 ادامدى قۇراعانىن حابارلاعان.

ەلدەگى قازاقتار سانى العاشىندا 67% دەپ كورسەتىلدى. ودان كەيىن 63،1% دەلىنسە، 2010 جىلى 1 قاڭتاردا رەسپۋبليكاداعى قازاقتاردىڭ ۇلەسى 63،6%-دى قۇراعانى حابارلاندى. ياعني تۇسىنىكسىز سەبەپتەرمەن ەلدەگى قازاقتاردىڭ سانى كەمىگەن. ال 67% نەمەسە 63%-دىڭ ايىرماشىلىعى ساناقشىلاردىڭ قاتەلىگىنەن دەپ ايتىلدى. ءبىر قىزىعى، قاتەلىك تەك قازاقتاردىڭ سانىنان كەتكەن.

بۇۇ باس اسسامبلەياسىنىڭ 1960 جىلعى شەشىمىنە سايكەس، ەلدەگى تيتۋلدى ۇلتتىڭ ۇلەسى 67%-دان اسسا، ول كوپۇلتتى مەملەكەت بولىپ سانالمايدى.

2009 جىلى حالىق ساناعىنا 1 ميلليارد 144 ميلليون تەڭگە بولىنگەن. سونىڭ تەك 379 ميلليون تەڭگەسى عانا بەلگىلەنگەن ماقساتقا جۇمسالدى. جىمقىرىلعان 764،8 ميلليون ءۇشىن ستاتيستيكا اگەنتتىگىنىڭ ءتورايىمى انار مەشىمبايەۆاعا، ونىڭ ورىنباسارلارى نۇرمان بايانوۆ پەن بىرلىك مەڭدىبايەۆقا جانە كاسىپكەر سەرىك تۇرجانوۆقا قاتىستى قىلمىستىق ءىس قوزعالعان.

ال 2019 جىلعى حالىق ساناعىنا جۇمسالاتىن قارجى مولشەرىن مينيسترلىك جاۋاپسىز قالدىردى.