قازاقستاندا "7-20-25" باعدارلاماسى بويىنشا بەرىلەتىن نەسيەلەردىڭ ماكسيمالدىق سوماسى بەلگىلى بولدى، - دەپ حابارلايدى Tenginews.kz.
ق ر ۇلتتىق بانك ءتوراعاسىنىڭ ورىنباسارى ولەگ سمولياكوۆتىڭ ايتۋىنشا، ءىرى قالالاردا تۇرعىن ءۇيدىڭ ماكسيمالدىق باعاسى - 25 ميلليون تەڭگە، ال وڭىرلەردە - 15 ميلليون تەڭگە بولادى.
"ءقازىر ءبىز تۇرعىن ءۇيدىڭ ماكسيمالدىق باعالارىن بەكىتتىك. ءىرى قالالاردا تۇرعىن ءۇي باعاسى 25 ميلليون تەڭگەگە دەيىن بارادى دەپ وتىرمىز. ياعني، الماتى، استانا، اتىراۋ، اقتاۋ قالالارىندا. قالعان وڭىرلەردە - 15 ميلليون تەڭگە. وسى مالىمەتتەرگە قاراي وتىرىپ جانە العاشقى جارنانىڭ تولەنگەنىن ەسكەرسەك، قازاقستاندىق پاتەردى 25 ميلليون تەڭگەگە الاتىن بولسا ونىڭ نەسيەسى 20 ميلليون تەڭگە، ال 15 ميلليون تەڭگەگە الاتىن بولسا، نەسيە سوماسى 12 ميلليون تەڭگە بولاتىنىن كورىپ وتىرمىز"، - دەدى ق ر ۇلتتىق بانك ءتوراعاسىنىڭ ورىنباسارى.
سونداي-اق، ولەگ سمولياكوۆ باعدارلامانىڭ وسى جىلدىڭ ەكىنشى جارتىسىندا جۇزەگە اسىرىلاتىنىن ايتتى.
"باعدارلاما مامىر ايىندا قابىلدانادى دەپ كۇتىپ وتىرمىز. ءقازىر ءبىز جالپى بانكتەرمەن شارتتارعا قاتىستى ماسەلەلەردى تەكسەرىپ جاتىرمىز. وسى جىلدىڭ ەكىنشى جارتىسىنان باستاپ باعدارلاما جۇزەگە اسىرىلادى دەپ وتىرمىز. سول ۋاقىتقا دەيىن وسى نەسيەلەردى الاتىن ەنشىلەس ۇيىمداردى قۇرامىز دەپ ويلايمىن"، - دەيدى ولەگ سمولياكوۆ.
ەسكە سالا كەتەيىك، ناۋرىز ايىنىڭ باسىندا قازاقستان پرەزيدەنتى نۇرسۇلتان نازاربايەۆ تۇرعىن ءۇي يپوتەكاسىن قولجەتىمدى ەتە الاتىن جاڭا "7-20-25" باعدارلاماسىن تانىستىرعان بولاتىن.
"(...) جۇمىس ىستەيتىن ءاربىر قازاقستاندىق تومەندەگىدەي شارتتار بويىنشا تەڭگەمەن نەسيە الۋ مۇمكىندىگىنە يە بولادى. نەسيە ءوسىمىنىڭ مولشەرلەمەسى قازىرگىدەي 14-16 ەمەس، جىلىنا 7 پروسەنتتەن اسپايتىن بولادى. ءقازىر بانكتەر باستاپقى جارناعا باسپانا قۇنىنىڭ 30 پروسەنتىنە دەيىن، كەيدە ءتىپتى 50 پروسەنتىن سالۋدى تالاپ ەتسە، بۇل باعدارلاما بويىنشا ول 20 پروسەنتتەن اسپاۋعا ءتيىس. نەسيە الۋشىنىڭ اي سايىنعى تولەمىن ازايتۋ ءۇشىن ونىڭ مەرزىمى 10-15 ەمەس، 25 جىلعا دەيىن بولادى. ول ءۇشىن ۇلتتىق بانكتىڭ، ەكىنشى دەڭگەيلى بانكتەر مەن قور نارىعىنىڭ مۇمكىندىكتەرىن ىسكە قوسۋ كەرەك."، - دەپ تۇسىندىرگەن ەدى نازاربايەۆ.
سونداي-اق، وسىعان دەيىن "7-20-25" يپوتەكاسى قاشان بەرىلە باستايتىنى ايتىلعان ەدى.
پىكىر قالدىرۋ