الماتىدا كولىك ۇرلىعىمەن اينالىسىپ، ۇيىمداسا  قىلمىس جاساپ جۇرگەندەر قۇرىقتالدى. بۇل تۋرالى قالالىق ءىىد باسپا ءسوز قىزمەتى حابارلايدى.

34 جاستاعى وزبەكستان رەسپۋبليكاسىنىڭ ازاماتى مەن 32 جاستاعى الماتى تۇرعىنى بىرلەسىپ، الماتىداعى «ۆاز»، «لادا» ماركالى كولىكتەردى ۇرلاۋمەن اينالىسىپ كەلگەن. بۇگىندە پوليسياعا كولىگىنەن ايرىلعان 8 ادام ارىز تۇسىرگەن.

تەرگەۋشىلەر اتالعان قىلمىستارعا وزبەكستاندىق ازامات پەن الماتى تۇرعىنىنىڭ قاتىسى بارىن انىقتادى. 4 ماشينا شىمكەنت قالاسىنان، وقو-دان، 1 كولىك الماتى وبلىسىنان تابىلدى. جانە ءبىر كولىك استاناعا جەتكىزىلگەنى انىقتالدى. ءقازىر 6 ماشينا دا زاتتىق ايعاق رەتىندە تاركىلەندى. تەرگەۋشىلەر كۇدىكتىلەردىڭ باسقا دا قىلمىستارعا قاتىستىلىعىن تەكسەرىپ جاتىر.