ديزاينەر ءارى ساۋلەتشى، قازاقستان ۆاليۋتاسى – تەڭگە مەن مەملەكەتتىك رامىزدەردىڭ اۆتورى تيمۋر سۇلەيمەنوۆ 76 جاسىندا قايتىس بولدى. ول 10 مامىر كۇنى تاڭەرتەڭ ۇزاققا سوزىلعان سىرقاتتان كوز جۇمدى.

تيمۋر سۇلەيمەنوۆ 1943 جىلى 14 اقپاندا تۋعان. لەنين اتىنداعى قازاق پوليتەحنيكالىق ينستيتۋتىن (ءقازىر قانىش ساتبايەۆ اتىنداعى قازۇتۋ) "ساۋلەتشى" ماماندىعى بويىنشا بىتىرگەن. سوۆەت وداعى جىلدارى جوبالاۋ ينستيتۋتتارىندا ("كازگورسترويپروەكت"، "المااتاگيپروگور") ساۋلەتشى، الماتىنىڭ بۇرىنعى كالينين اۋدانىندا (قازىرگى بوستاندىق اۋدانى) باس ساۋلەتشى، قازاقستان سۋرەتشىلەر قورىنىڭ باس سۋرەتشىسى بولعان. 1987 جىلى قازاقستان ديزاينەرلەر وداعىن قۇرىپ، سودان بەرى ونىڭ پرەزيدەنتى بولعان.

قازاقستان تاۋەلسىزدىك العان جىلدارى تيمۋر سۇلەيمەنوۆ العاشقى تەڭگەنىڭ، مەملەكەتتىك رامىزدەردىڭ، رەسپۋبليكالىق ۇلان اسكەري فورماسىنىڭ ديزاينىن جاساۋعا قاتىستى. كەيىن الماتىنىڭ قالا قۇرىلىسى كەڭەسىنىڭ قۇرامىندا بولدى، اباي مەن دوستىق داڭعىلدارىن، تولە بي كوشەسىن قايتا قۇرۋ جانە اباتتاندىرۋ جوبالارىن جاسادى. قالاداعى جەلتوقسان مەن ساتبايەۆ كوشەلەرىنىڭ قيىلىسىنداعى الماتىداعى 1986 جىلعى جەلتوقسان وقيعاسىنا قاتىسقاندارعا ارنالعان "بوستاندىق تاڭى" ەسكەرتكىشى تيمۋر سۇلەيمەنوۆتىڭ جوباسى بويىنشا جاسالعان.

تيمۋر سۇلەيمەنوۆتىڭ تۋىستارىنىڭ حابارلاۋىنشا، مارقۇممەن قوشتاسى 11 مامىر كۇنى ساعات 10-دا الماتىداعى ءبىلحان قاستەيەۆ اتىنداعى ونەر مۇراجايىندا وتەدى.