قىتايلىق ينۆەستور اقمولا وبلىسىنىڭ اۋىل شارۋاشىلىعى سالاسىنا ينۆەستيسيا سالۋعا قىزىعۋشىلىق تانىتىپ وتىر. بۇل تۋرالى ايماق باسشىسى مالىك ءمىرزاليننىڭ قىتايدىڭ ءىرى مەملەكەتتىك ينۆەستيسيالىق كورپوراسياسىنىڭ وكىلدەرىمەن وتكەن كەزدەسۋىندە ايتىلدى، دەپ حابارلايدى قازاقپارات.

ەسكە سالا كەتەيىك، وتكەن جىلدىڭ كۇزىندە اقمولا وبلىسىنىڭ اكىمى مالىك مىرزالين جۇمىس ساپارىمەن جۇڭگو ەلىنىڭ استاناسى بەيجىڭدە بولىپ، جەرگىلىكتى ينۆەستورلار جانە ونەركاسىپتىك قۇرىلىمداردىڭ وكىلدەرىمەن كەزدەسۋ وتكىزگەن بولاتىن. بۇل جولى سول كەزدەسۋدىڭ جالعاسى رەتىندە قىتايدىڭ «CITIC» ينۆەستيسيالىق كورپوراسياسىنىڭ وكىلدەرىنەن قۇرالعان دەلەگاسيا اقمولا وبلىسىنا كەلىپ وتىر.

ينۆەستيسيا تارتۋ ەلىمىزدىڭ سىرتقى ساياساتتاعى باستى باعىتتارىنىڭ ءبىرى. وسى رەتتە، ەلىمىزدەگى استىقتىڭ 25 پايىزىن وندىرەتىن اقمولا وبلىسىنا قىتايدىڭ ءىرى كومپانيالارى قىزىعۋشىلىق تانىتىپ وتىر.

كەزدەسۋدە ايماق باسشىسى مەن قىتايلىق «CITIC» كوپوراسياسىنىڭ وكىلى گەي كايحۋا وڭىردە مال شارۋاشىلىعى، ەگىنشىلىك سالاسىن ودان ءارى دامىتۋ مۇمكىندىكتەرىن قاراستىردى. قىتايلىقتار ءوڭىر ەكونوميكاسىنا ينۆەستيسيا سالۋعا قىزىعۋشىلىقتارى جوعارى ەكەنىن اتاپ ءوتتى.