استانا اكىمى مەملەكەتتىك ورگاندارعا قالا تۇرعىندارىنان ءۇي قۇرىلىسىنىڭ ساپاسىنا قاتىستى شاعىمىن مۇقيات زەرتتەۋدى جۇكتەدى. جەكەمەنشىك كاسىپورىنداردىڭ تاراپىنان قانداي دا ءبىر بۇزۋشىلىق انىقتالعان جاعدايدا ءتيىستى قۇقىقتىق شارالاردى قولدانۋدى تاپسىردى، دەپ حابارلايدى Qamshy.kz اقپارات اگەنتتىگى ەلوردا ينفو مالىمەتىنە سۇيەنىپ.

— ءقازىر ۇكىمەتپەن بيزنەستەگى كەدەرگىلەردى جويۋ ءۇشىن «Doing Business» ساياساتى جۇرگىزىلىپ وتىر. بارلىعى كاسىپكەرلىكتى دامىتۋ ءۇشىن جاسالىپ جاتىر. ال ساپاسىز قۇرىلىس ءۇشىن تۇرعىنداردىڭ نارازىلىعىنا مەملەكەت جاۋاپ بەرىپ وتىر. قاراڭىزدار، تۇرعىن ءۇيدى كىم قابىلداپ الادى؟ تاپسىرىس بەرۋشى، باس مەردىگەر – جەكە كومپانيا، تەحنيكالىق قاداعالاۋ – جەكەمەنشىك كومپانيا، اۆتورلىق قاداعالاۋ – جەكە كومپانيا. ياعني، ءتورت جەكە كومپانيا تۇرعىن ءۇيدى قابىلداپ الادى. مەملەكەت بەلگىلى ءبىر بيۋروكراتيانى جويۋ ءۇشىن بۇل سالادان اكىمدىكتى الىپ تاستادى. مسقب تەك كونسترۋكسيانى تەكسەرەدى، ونىڭ وزىندە تەك جوسپارلى تەكسەرىس نەگىزىندە. بارلىق جاۋاپكەرشىلىك بيزنەسكە جۇكتەلەدى. جاۋاپسىز بيزنەسمەندەر نارىقتان كەتۋى كەرەك، ءبىز وعان كومەكتەسەمىز، - دەدى اسەت يسەكەشيەۆ.