2017 جىلى قىركۇيەك ايىندا مەملەكەت باسشىسى استانا قالاسىنىڭ 20 جىلدىعىن مەرەكەلەۋدى تاپسىرعان بولاتىن. باس قالانىڭ مەرەيتويى قالاي تويلانىپ جاتىر؟ Qamshy.kz ءتىلشىسى وسىعان كوز جۇگىرتكەن ەدى.
قالا كۇنىنە دايىندىقتىڭ ءۇش باعىتتا ءجۇرىپ جاتىر. ءبىرىنشىسى شاراعا مادەنيەت جانە سپورت مينيسترلىگى، وزگە دە ارىپتەستەرمەن بىرلەسكەن دايىندىق. ەكىنشىسى - قازاقستان وڭىرلەرىمەن ءوزارا ءىس-قيمىل. ءۇشىنشىسى - شەتەلدىك سەرىكتەستەردىڭ قاتىسۋىمەن وتەتىن شارالار. ءبىرىنشى توپتاما بويىنشا 600-دەن استام شارانى قامتيتىن، جىل بويى وتەتىن ىسكەرلىك، مادەني، سپورتتىق باعدارلامالار جيناقتالعان. ونى ءتۇرلى مينيسترلىكتەر، فەدەراسيالار، تەاترلار جانە باسقالارى وتكىزەدى.
ەلوردامىزدىڭ مەرەيتويىنا وتەتىن ءتۇرلى مادەني شارالار مەن كونسەرتتىك باعدارلامالاردى ايتپاعاندا استانادا حالىق يگىلىگىنە جۇمىس ىستەيتىن كوپتەگەن عيماراتتار مەن ساياباقتار سالىنادى. مىسالى بيىل 6 مەكتەپ پايدالانۋعا بەرىلەدى.
ەڭ اۋەلى astanaday.kz - استانانىڭ 20 جىلدىعىنا ارنالعان ءىس-شارالار سايتى
استانانىڭ 20 جىلدىعىن اتاپ وتۋگە باعىتتالعان مەرەكەلىك شارالار تۋرالى تولىققاندى مالىمەت بەرەتىن رەسمي سايت ىسكە قوسىلدى. «بۇگىننەن باستاپ ەلوردامىزدىڭ 20 جىلدىعىنا ارنايى وتكىزىلەتىن ءىس-شارالاردىڭ رەسمي سايتى ىسكە قوسىلدى. بارشاڭىزدى www.astanaday.kz رەسمي پاراقشاسىنا شاقىرامىز! جوسپار جاساپ، ەلوردامىزدىڭ مەرەيتويىن بىرگە اتاپ وتەيىك»، - دەپ جازدى قالا اكىمىنىڭ باسپا ءسوز حاتشىسى ەلۆيرا جۇرگەنبايەۆا فەيسبۋكتەگى پاراقشاسىندا.
جاڭا سايتتا 2018 جىلدىڭ ماۋسىم ايىنان قىركۇيەگىنە دەيىنگى مەرەكەلىك شارالاردىڭ كەستەسى بەرىلگەن. ولاردىڭ اراسىندا كونسەرتتەر، تەاترلىق قويىلىمدار، جارمەڭكەلەر مەن رەسمي، مادەني-بۇقارالىق، سپورتتىق شارالار بار.
بۇعان دەيىن حابارلانعانىنداي، پورتالدا استانانىڭ 20 جىلدىعىنا ارنالعان شارالاردىڭ ۋاقىتى، وتەتىن ورنى، بيلەتتەر باعاسى، باق-قا ارنالعان باسپا ءسوز پاراقتارى، جولدىڭ جابىلۋى مەن كولىك تۇراقتارى تۋرالى بارلىق مالىمەتتەر جاريالانادى.
ايتا كەتەرلىگى، قالا قوناقتارى مەن تۇرعىندارى ءۇشىن سونىمەن بىرگە استانانىڭ 20 جىلدىعىنا ارنالعان مەرەكەلىك شارالار تۋرالى اقپاراتتى قازاق جانە ورىس تىلدەرىندە قالالىق «iKomek» جەدەل ارەكەت ەتۋ جانە مونيتورينگ ورتالىعىنان (ول جەردە تاۋلىك بويى «109» ءنومىرى جۇمىس ىستەمەك) الۋعا بولادى.
قازاقستاننىڭ بارلىق استاناسىن باسىپ وتەتىن كەرۋەن
«استاناعا 20 جىل»: ورىنبور — اقتوبە — قىزىلوردا — الماتى-استانا اۆتوكەرۋەنى جولعا شىعادى. كەرۋەننىڭ جالپى باسىپ وتەتىن جولى 5500 كم.
بەلگىلى قوعام قايراتكەرلەرى، بەلسەندى جاستار مەن مادەنيەت، سپورت، مەديسينا سالاسى وكىلدەرىنەن قۇرالعان اۆتوكەرۋەن اقتوبە وبلىسىنان باستاۋ الىپ، كورشىلەس رف ورىنبور وبلىسى، سونىمەن قاتار قىزىلوردا، الماتى جانە استانا قالالارىنا دەيىن جالعاساتىن بولادى.
اۆتوكەرۋەن جول بويىندا كەزدەسكەن ەلدىمەكەندەر تۇرعىندارىنا مەرەكەلىك كوڭىل-كۇي سىيلايدى.
بەلسەندى جاستاردان قۇرالعان توپ وكىلدەرى ەلدىمەكەندەر تۇرعىندارىنا پاتريوتتىق تاربيە بەرىگە باعىتتالعان ءتۇرلى ماڭىزداعى شارالاردى ۇيىمداستىرادى. استانا قالاسىن كەڭىنەن دارىپتەۋ، ەلوردامىزدىڭ وڭ ءيميدجىن قالىپتاستىرۋ ماقساتىنداعى ۇلەستىرمە ماتەريالداردى تاراتاتىن بولادى.
ءوز كەزەگىندە، مادەنيەت وكىلدەرى ءان مەن جىردان شاشۋ شاشىپ، ونەر سۇيەر قاۋىمعا «استانا – دوستىقتىڭ مەكەنى» اتتى مەرەكەلىك كونسەرتتىك باعدارلاماسىن ۇيىمداستىرادى. «ايبىندى استاناعا 20 جىل»، «نا يستوكە دۆۋح ستوليس» اتتى سۋرەت كورمەلەرىن ۇسىنادى. جەرگىلىكتى تۇرعىنداردىڭ قاتىسۋىمەن «دەنى ساۋ حالىق، دەنى ساۋ ۇلت» اتتى سپورتتىق سايىستار ويناتىلاتىن بولادى.
زيالى قاۋىم، بەلسەندى جاستار وكىلدەرى تاۋەلسىز قازاقستاننىڭ جەتىستىكتەرىن، ەلوردامىز استانا قالاسىنىڭ الەمدىك ارەناداعى ورنى مەن ەلىمىز ءۇشىن ماڭىزدىلىعىن جەتكىزە وتىرىپ، ەلدىمەكەندەر تۇرعىندارىمەن كەزدەسۋلەر وتكىزەدى. قىزىقتى ترەنينگتەر ۇيىمداستىرىپ، اشىق پىكىر الماسادى.
دەنساۋلىق ساقتاۋ سالاسىنىڭ ماماندارى تۇرعىندارعا قابىلداۋ جۇرگىزىپ، تەگىن مەديسينالىق تەكسەرۋدەن وتكىزەدى.
اۆتوكەرۋەن استانا كۇنى قارساڭىندا ەلوردامىزعا كەلىپ جەتەدى.
ايماقتاردا استانا كۇندەرى ءوتىپ جاتىر
مامىر ايىندا اقتوبە، اتىراۋ، ماڭعىستاۋ، باتىس قازاقستان وبلىستارىندا استانانىڭ مادەني كۇندەرى ءوتتى. استانانىڭ تەاترلارى مەن ونەرپازدارى وبلىستاردى ارالاپ، اپتاعا جالعاسقان قويىلىمدار مەن كونسەرتتەر وتكىزىپ، حالىق ىقىلاسىنا بولەندى. استانا قالاسىنىڭ مادەني كۇندەرى جىل بويى جالعاسادى. سايكەسىنشە ايماقتاردان كەلگەن ونەرپازدار دا جىل بويى استانا تۇرعىندارىنا ونەرلەرىن پاش ەتەدى.
ال، قىزىلوردا وبلىسى استاناعا 1،5 ملرد تەڭگە ءبولىپ، سىيلىق جاساپ وتىر. «بۇل ءبىزدىڭ جاڭا ەلورداعا دەگەن ىزگى نيەتىمىز، ءبىزدىڭ پرەزيدەنتكە دەگەن العىسىمىز. سوندىقتان وسىنداي شەشىم قابىلدادىق»، - دەيدى ءوڭىر اكىمى. وسى قارجىعا زىمىراندىق-عارىشتىق تەحنيكانىڭ اشىق اسپان استىنداعى مۋزەيى سالىناتىن بولادى. «بۇل وتە اسەم نىسان بولادى. اۋەجايدان قالاعا قاراي جولمەن جۇرگەندە وڭ جاقتارىڭىزدان «نۇر الەم» سفەراسى كورىنەدى، ال سول جاقتا تۇران داڭعىلى بويىندا بيىكتىگى 70 مەترلىك زىمىران تاسىعىشتار، ياعني «سويۋز»، «پروتون»، «زەنيت» ورنالاسادى»، - دەدى قىرىمبەك كوشەربايەۆ.
استانانىڭ كوركىنە كورىك قوسىلادى
استانا اكىمى اسەت يسەكەشيەۆ ەلوردا كۇنىنە وراي 7 جاڭا ساياباق پەن گۇلزار اشىلىپ، 40 مىڭنان استام اعاش وتىرعىزىلاتىنىن مالىمدەدى. استانا اكىمى جاۋاپتى تۇلعالارعا 2018 جىلى 1 شىلدەگە دەيىن 7 ساياباق پەن گۇلزاردىڭ قۇرىلىسىن اياقتاۋدى، ال جىل سوڭىنا دەيىن التاۋىن، 2019 جىلى 5 گۇلزار مەن بۋلۆاردىڭ قۇرىلىسىنا كىرىسۋ كەرەكتىگىن تاپسىردى. وسى ايتىلعان ساياباقتار مەن گۇلزارلارعا 120 گەكتار جەر ءبولىندى.
ەلوردانىڭ 20 جىلدىعىنا 2018 جىلى 386 مىڭ اعاش وتىرعىزىلادى، ونىڭ 208 مىڭى استانانىڭ جاسىل بەلدەۋىنە، تاعى 178 مىڭى - گۇلزار مەن ساياباقتاردان ورىن تابادى. وتكەن جىلى جالپى وتىرعىزىلعان اعاشتاردىڭ سانى - 312 مىڭ بولعان.
جازدا ەلوردا كوشەلەرىنە ءپىل، قىران، بارىس، اققۋ جانە كەرىك سياقتى جانۋارلاردىڭ مۇسىندەرى - جاڭا فيگۋرالار ءسان بەرەدى. 2018 جىلى «استانا-جاسىلقۇرىلىس» اق جۇمىسشىلارى 5 ملن-نان استام كوشەت ەگۋدى جوسپارلاپ وتىر. ولاردىڭ ىشىندە شىرايگۇل، تاگەتيس، كەربەزگۇل، ابەليا، ۇلپەك، سالپيگلوسسيس سياقتى ءبىرجىلدىق گۇلدەردىڭ 50 ءتۇرى بار. مۇنىمەن قوسا، قالا كوگالدارىندا ايىلقياق، سارانا، راۋشان سياقتى كوپجىلدىق گۇلدەردىڭ 30-دان استام ءتۇرى وتىرعىزىلادى. سونداي-اق، استانادا الا لەنتا تۇرىندەگى كوپجىلدىق گۇلدەردەن، بۇتالار مەن راۋشانداردان ورىلگەن سان الۋان گۇلزارلار – ميكسبوردەرلەر جاسالادى.
استانا حالىقارالىق فورۋمداردىڭ الاڭىنا اينالدى
استانا وتكەن 20 جىلدا تورتكۇل دۇنيە كوز تىككەن كوپتەگەن الەمدىك جانە حالىقارالىق فورۋمداردىڭ الاڭىنا اينالدى. جەر-جاھانعا استانادان اقجولتاي اقپارات تاراتىلىپ، باس قالامىزدىڭ مارتەبەسى مەن مەرەيى اسقاقتادى.
بۇگىندە استانا حالىقارالىق ماڭىزى بار ءتۇرلى فورۋمدار، كونگرەستەر مەن وزگە دە ءىس-شارالار وتەتىن ەۋرازيا كەڭىستىگىنىڭ ورتالىعىنا اينالدى. ەلوردادا الەمدىك جانە ءداستۇرلى دىندەر ليدەرلەرىنىڭ سەزدەرى، استانا ەكونوميكالىق فورۋمى جانە وزگە دە ماڭىزدى حالىقارالىق وقيعالار تۇراقتى تۇردە ءوتىپ كەلەدى. استانادا ەقىۇ-نىڭ تاريحي ءسامميتى، شىۇ مەن يىۇ-نىڭ مەرەيتويلىق سامميتتەرى بولىپ ءوتتى. 2011 جىلدىڭ باسىندا رەسپۋبليكانىڭ ەلورداسى VII قىسقى ازيا ويىندارىنىڭ قاتىسۋشىلارى مەن قوناقتارىن قابىلدادى. وتكەن جىلى استانادا «Expo-2017» حالىقارالىق كورمەسى ءوتتى.
مامىر ايىندا عانا استانادا «استانا ەكونوميكالىق فورۋمى» مەن V حالىقارالىق «KADEX-2018» قارۋ-جاراق پەن اسكەري تەxنيكا كورمەسى ءوتتى.
مادەنيەت جانە سپورت مينيسترلىگى استانادا ەتنيكالىق اۋىل اشتى
1 ميلليوننان استام تۋريست كەلەدى دەپ كۇتىلگەن استانا مەرەيتويىندا قوناقتارعا قازاق مادەنيەتىن، ءسالت-داستۇرىن تانىتۋ ماقساتىندا استانادا 30 كيىز ۇيدەن تۇراتىن ەتنو اۋىل اشىلدى. ايتا كەتسەك ەتنواۋىل وتكەن جىلى EXPO-2017 كورمەسىنىڭ قوناقتارىنا دا قىزمەت كەتكەن بولاتىن.
جاز سوڭىنا دەيىن اشىق بولاتىن قازاق اۋىلىندا اۋقىمدى وقيعا قازاق مادەنيەتى مەن تاريحىنىڭ كوپ عاسىرلىق جاۋھارىن جيناقتاعان. ەتنواۋىلدى ءوز سالاسىنداعى ايرىقشا جانە العاشقى ۇلتتىق جوبا دەپ ماقتانىشپەن ايتۋعا بولادى. كەشەننىڭ قاقپاسىنا كىرە بەرگەننەن قوناقتاردى باتىر كوشپەندىلەردىڭ، شەكسىز سار دالانى باعىندىرۋشىلاردىڭ ەجەلگى زامانىنا قاس قاعىم ساتتە الىپ بارادى. استانانىڭ مەرەيتويىن اتاپ وتۋگە كەلگەن ءار ادام ءوزى ءۇشىن قىزىقتى جانە ەستە قالارلىق وقيعانى كورۋىنە مۇمكىندىك الادى.
ەتناۋىل اياسىندا ەتنيكالىق مۋزىكا جانە تەاتر ونەرىنىڭ فەستيۆالدەرى، كورمەلەر، قولدانبالى-ساندىك ونەرىنىڭ ءارتۇرلى شەبەرلىك سىنىپتارى، ۇلتتىق سپورت تۇرلەرى بويىنشا سايىستار، اتتى-سپورتتىق ءىس-شارالار وتەدى. 2،5 مىڭ شارشى مەتر الاڭىنا جايىلعان ايماق «شەبەرلەر اۋىلى»، «سپورتتىق-سيركتىك ءىس-شارالار»، «كونسەرتتىك زال»، «دەمالىس اللەياسى»، «ءداستۇرلى قازاق جانە شىعىس تاعامدارى مەيرامحاناسى»، «ۇلتتىق داستۇرلەر مەن سالتتار»، «جىبەك جولى» شىعىس بازارى جانە «اڭشىلىقتىڭ ءداستۇرلى تۇرلەرى» سەكىلدى كوپتەگەن سەكتورلارعا بولىنگەن.
