ارقالىق پوليسياسى مازاردىڭ تالقاندالعانى جايىندا جالعان اقپارات تاراتقان 33 جاستاعى تۇرعىنعا قاتىستى ءىس قوزعادى. قازىرگى ۋاقىتتا سوتقا دەيىنگى تەرگەۋ جۇرگىزىلىپ جاتىر. بۇل تۋرالى قوستاناي وبلىستىق ءىىد حابارلادى.

30 مامىردا WhatsApp-تا «مازارلاردى شەتەلدىكتەر قازىپ تاستاپتى» دەگەن اقپارات تارالعان. پوليسەيلەر اقپارات تاراتقان ادام 33 جاستاعى ارقالىقتىڭ تۇرعىنى ەكەنىن انىقتادى.

«جەلىدە تارالعان جالعان اقپاراتقا بايلانىستى 33 جاستاعى ايەلگە قاتىستى ق ر قك 274-بابى، 2ء-بولىمى، 3-پۋنكتىندەگى «تەلەكوممۋنيكاسيا جەلىلەرىن پايدالانىپ، جالعان اقپاراتتاردى تاراتۋ» بويىنشا سوتقا دەيىنگى تەرگەۋ باستالدى. باپ سانكسياسى بەس مىڭعا دەيىنگى ايلىق ەسەپتىك كورسەتكىش مولشەرىندە ايىپپۇل تۇرىندەگى نەمەسە ەكى جىلدان بەس جىلعا دەيىن باس بوستاندىعىنان ايىرۋ جازاسىن كوزدەيدى»، - دەلىنگەن ءىىد باسپا ءسوز حابارلاماسىندا.

بۇعان قوسا، پوليسيا تۇرعىنداردى دالەلدەنبەگەن اقپاراتتاردى تاراتپاۋعا شاقىردى.

ەسكە سالا كەتەيىك، بۇدان بۇرىن مەكتەپ وقۋشىلارى ارقالىقتاعى مازاردىڭ كۇل-تالقانىن شىعارعانى جايلى حابارلانعان. وقيعا 25 مامىردا اشۋتاستى اۋىلىندا بولعان. پوليسيا ارقالىقتىڭ 2007 جىلعى ەكى وقۋشىسىن انىقتاپ، ولار كىنالارىن مويىنداعان.