قاراعاندى وبلىسى جەزقازعان قالاسى مەن ۇلىتاۋ اۋدانىندا 12-14 شىلدە ارالىعىندا ءى حالىقارالىق «جەزكيىك» فولكلورلىق ۇجىمدار فەستيۆالى وتەدى، دەپ حابارلايدى Qamshy.kz اقپارات اگەنتتىگى. 

وبلىس باسشىسى ەرلان قوشانوۆ جەزقازعانعا جۇمىس ساپارى بارىسىندا اۋقىمدى مادەني فورۋمعا دايىندىق ماسەلەلەرى بويىنشا جينالىس وتكىزدى. قازىرگى تاڭدا فەستيۆالدىڭ كونسەپسياسى مەن باعدارلاماسى دايىن. ۇلىتاۋ اۋدانىنىڭ بولاتساي جەرىندە قولونەر شەبەرلەرىنە ارنالعان شاتىرلار مەن كيىز ۇيلەر تىگىلگەن ەتنواۋىل قۇرىلادى. مۇندا 13 شىلدەدە فولكلورلىق مۋزىكا فەستيۆالى وتەدى. وعان مەكسيكا، پەرۋ، پولشا، تۇركيا، فرانسيا، شوتلانديا، جاپونيا، رەسەي، تاجىكستان جانە قازاقستاننان كاسىبي ۇجىمدار كەلىپ ونەر كورسەتەدى.

14 شىلدەدە فەستيۆال جەزقازعان قالاسىنىڭ كەڭگىر سۋ قويماسىنىڭ جاعالاۋىندا جالعاسادى. مۇندا شاراعا ارنالىپ ساحنا ورناتىلىپ جاتىر. وندا ءار ەلدەن كەلىپ باس قوسقان 17 ءسوليستىڭ قاتىسۋىمەن كلاسسيكالىق مۋزىكا فەستيۆالى وتپەك. جەزقازعاننىڭ باستى كوشەلەرىمەن فەستيۆالگە قاتىسۋشىلار شەرۋى جانە گالا-كونسەرت وتەدى دەپ جوسپارلانۋدا. سونداي-اق كەڭگىر سۋ قويماسىندا جەلكەندى كەمەلەر فەستيۆالى ۇيىمداستىرىلادى.

– بۇل شارا حالىقارالىق دەڭگەيدە، جانەدە وعان لايىقتى دايىندالۋ قاجەت. بارلىق تەحنيكالىق ماسەلەلەردى تالقىلاۋ ءۇشىن ءبىر اپتادان سوڭ قاراعاندىدا باس قوسامىز، - دەدى ەرلان قوشانوۆ.