قىتايدا ەسىرتكى كونترابانداسى ءۇشىن سوتتالعان قازاقستاندىق اقجارقىن تۇرلىباي قىتايلارعا اعىلشىن ءتىلىن ۇيرەتىپ ءجۇر، دەپ حابارلايدى Sputnik قازاقستان. 

قازاقستاننىڭ قىتايداعى ەلشىلىگىنىڭ قىزمەتكەرى 22 مامىردا تۇرلىبايمەن كەزدەسىپ قايتتى. ايتۋىنشا، وتانداسىمىزدىڭ دەنساۋلىعىنا، تۇرمەنىڭ تاماعى مەن تۇرۋ شارتتارىنا ەشقانداي شاعىمى جوق.

قازاقستان سىرتقى ىستەر مينيسترلىگىنىڭ حابارلاماسىندا كورسەتىلگەندەي، اقجارقىن ءوزىن جاقسى سەزىنەدى. تۇرمەدە وتىرعان ۋاقىتىندا جۇڭگو ءتىلىن جاقسى مەڭگەرىپ الدى، ءقازىر قىتايلارعا اعىلشىن ءتىلىن ۇيرەتىپ ءجۇر ەكەن. دەنە شىنىقتىرۋمەن اينالىسادى. ەلشىلىكتىڭ كونسۋلدىق قىزمەتكەرلەرى ونىمەن ۇنەمى بايلانىستا، قاجەتتى كومەك كورسەتىپ جاتىر. قالاعان كەزدە كىتاپتار اپارىپ، جەكە قولدانۋعا قاجەتتى زاتتاردى ساتىپ الۋ ءۇشىن مەكەمەنىڭ ەسەپشوتىنا اقشا اۋدارادى.

ايتا كەتەيىك، اقجارقىن تۇرلىباي 2014 جىلدىڭ ناۋرىزىندا ەسىرتكى تاسىمالدادى دەگەن كۇدىكپەن گۋانچجوۋ قالاسىنىڭ اۋەجايىندا ۇستالعان بولاتىن. ول كەزدە وتانداسىمىز 20 جاستا بولدى. 2015 جىلدىڭ ماۋسىمىندا جۇڭگو سوتى ونى ءومىر بويىنا باس بوستاندىعىنان ايىردى. سوتتا اقجارقىن شەتەلدىك دوسى الداپ كەتكەنىن ايتىپ، كىناسىن مويىنداعان جوق. 

كەيىن اپەللياسيالىق ينستانسيا سوتى ءومىر بويىنا باس بوستاندىعىنان ايىرۋ تۋرالى ۇكىمدى جويدى.

2016 جىلدىڭ قاراشاسىندا تۇرلىبايدىڭ ءىسى بويىنشا اپەللياسيالىق تىڭداۋ ءوتتى. 

اقجارقىن تۇرلىبايدىڭ اپەللياسيالىق القا شەشىمىن كۇتىپ جۇرگەنىنە ءبىر جارىم جىل بولدى.