قىرعىزستان پرەزيدەنتى سوورونباي جەەنبەكوۆ 6 ماۋسىمدا مەملەكەتتىك ساپارمەن قىتايعا باردى. ساپار بارىسىندا ول جۇڭگو ءتوراعاسى سي سزينپينمەن كەزدەسپەك.

قىرعىزستان پرەزيدەنتى باسپا ءسوز قىزمەتىنىڭ اقپاراتى بويىنشا، جەەنبەكوۆ ساپارى اياسىندا جۇڭگو مەملەكەتتىك كەڭەسىنىڭ پرەمەرى لي كەسيانمەن جانە بۇكىلقىتايلىق حالىق وكىلدەرى جيىنى تۇراقتى كوميتەتىنىڭ ءتوراعاسى لي چجانچۋمەن كەزدەسەدى. كەلىسسوزدە قىرعىزستان-قىتاي قاتىناسى مەن ىنتىماقتاستىعىنىڭ اسپەكتىلەرى تالقىلانادى دەپ بولجانىپ وتىر.

سوورونباي جەەنبەكوۆ قىتايعا قىرعىزستاندا پەكينمەن قىتايعا گاز قۇبىرىن تارتۋ تۋرالى كەلىسىم جاساسۋ، بىشكەك جىلۋ-ەلەكتر ستانسياسىن مودەرنيزاسيالاۋعا بولىنگەن قارجىنىڭ ءتيىمدى جۇمسالۋى جانە جۇڭگو ديپلوماتيالىق وكىلدىگىنە جەر تەلىمىن بەرۋگە قاتىستى تالقى قىزعان شاقتا بارىپ وتىر.

قىرعىزستان پرەزيدەنتى ساپارى بارىسىندا شانحاي ىنتىماقتاستىق ۇيىمى (شىۇ) ەلدەرى باسشىلارىنىڭ 9-10 ماۋسىمدا سينداو قالاسىندا وتەتىن سامميتىنە قاتىسادى. سامميتتە شىۇ-نى ودان ارى دامىتۋ ماسەلەسى تالقىلانباق.

جەەنبەكوۆ شىۇ ءسامميتى اياسىندا تاجىكستان پرەزيدەنتى ەمومالي راحمونمەن، ءۇندىستان پرەمەر-مينيسترى نارەندرا موديمەن جانە موڭعوليا پرەزيدەنتى حالتمااگيين باتتۋلگامەن كەلىسسوز وتكىزبەك.

شىۇ قۇرامىندا قازاقستان، قىرعىزستان، جۇڭگو، پاكىستان، رەسەي، تاجىكستان، ءۇندىستان جانە وزبەكستان بار. وسى اپتادا سامميتكە قاتىسۋعا قازاقستان پرەزيدەنتى نۇرسۇلتان نازاربايەۆ تا قىتايعا بارادى.

سامميت قورىتىندىسىندا جۇڭگو شىۇ-عا 2018-2019 جىلدارى ءتوراعالىق جاساۋ مىندەتىن قىرعىزستانعا تاپسىرادى.