ەلباسى ساپارىنىڭ ساپىندا قىتايعا بارعان Qamshy.kz اقپارات اگەنتتىگىنىڭ جەتەكشىسى ءبىلال قۋانىشتىڭ ايتۋىنشا، ق ر پرەزيدەنتى نۇرسۇلتان نازاربايەۆ پەن قحر ءتوراعاسى شي جين پيڭ بىرلەسكەن مالىمدەمەگە قول قويعان.

بۇعان قوسا ق ر قارجى ءمينيسترى باقىت سۇلتانوۆ پەن جۇڭگو وكىلى ۆان سياوتاو، ق ر ينۆەستيسيالار جانە دامۋ ءمينيسترى جەڭىس قاسىمبەك جانە جۇڭگو وكىلى حە ليفەن اراسىندا جەڭىلدىكتى نەسيە بەرۋ تۋرالى نەگىزدەمەلىك كەلىسىمىنە؛

قازاقستان ينۆەستيسيالار جانە دامۋ مينيسترلىگى مەن جۇڭگو دامۋ جانە رەفورامالاۋ جونىندەگى مەملەكەتتىك كوميتەتى اراسىندا بىرلەسكەن جوبالار تىزبەسىن بەكىتۋ تۋرالى مەموراندۋمعا؛

ق ر قارجى ءمينيسترى باقىت سۇلتانوۆ پەن جۇڭگو وكىلى ني يۋەفەن، ق ر سىرتقى ىستەر ءمينيسترى قايرات ءابدىراحمانوۆ جانە چجۇڭ شان اراسىندا وندىرىستىك قۋاتتار مەن ينۆەستيسيالار سالاسىنداعى ىنتىماقتاستىق جوسپارىن بىرلەسىپ ازىرلەۋ تۋرالى مەموراندۋمعا؛

يادرولىق ماتەريالداردى، راديواكتيۆتى قالدىقتاردى جانە ءرادياسيالىق-قاۋىپتى زاتتاردى زاڭسىز وتكىزۋدى بولعىزباۋ جونىندەگى كەلىسىمگە؛

ەلەكتروندى ساۋدا سالاسىنداعى ىنتىماقتاستىق تۋرالى مەموراندۋمعا؛

ق ر قارجى ءمينيسترى باقىت سۇلتانوۆ پەن ليۋ كۋن جانە ق ر اۋىل شارۋاشىلىعى ءمينيسترى ءومىرزاق شوكەيەۆ پەن ني يۋەفەن اراسىندا قازاقستان قارجى مينيسترلىگى مەن جۇڭگو قارجى مينيسترلىگى اراسىنداعى ءوزارا تۇسىنىستىك پەن ىنتىماقتاستىق تۋرالى مەموراندۋمعا؛

قازاقستان اۋىل شارۋاشىلىعى مينيسترلىگى مەن جۇڭگو باس كەدەن باسقارماسى اراسىنداعى قىتايعا ەكسپورتتالاتىن سيىر ەتىنە كارانتين مەن ۆەتەرينارلىق تالاپتار تۋرالى حاتتاماعا، قىتايعا ەكسپورتتالاتىن جوڭىشقا پىشىنىنە فيتوسانيتارلىق تالاپتار تۋرالى حاتتاماعا؛

بارلىعى 9 قۇجاتقا قول قويىلدى.

6 ماۋسىمدا رەسمي ساپارمەن بەيجىڭگە بارعان نۇرسۇلتان نازاربايەۆتى بۇگىن جۇڭگو بيلىگى حالىق جينالىسى ءۇيىنىڭ الدىندا سالتاناتتى تۇردە قابىلدادى. ساپ تۇزەگەن اسكەريلەر قازاقستاننىڭ مەملەكەتتىك ءانۇرانىن وركەسترمەن ورىنداپ، نۇرسۇلتان نازاربايەۆقا زور قۇرمەت كورسەتتى.

شي جين پيڭ ەلباسىنا العىس بىلدىرە وتىرىپ، جارقىن بولاشاق ماقساتىندا قازاقستانمەن بىرگە جۇرۋگە دايىن ەكەنىن مالىمدەدى. ءوز كەزەگىندە نۇرسۇلتان نازاربايەۆ ءوزىن قارسى العان جۇڭگو ءتوراعاسىنا العىس ءبىلدىرىپ، قۇتتىقتاۋ ءسوزىن جەتكىزدى.

بۇل – ەكى ەل باسشىسىنىڭ 18ء-شى رەت جۇزدەسۋى.