استانادا ءىرى كولەمدە پارا الۋ ۇستىندە 32 شەندىنىڭ تۇتقىندالعانى بەلگىلى بولدى، دەپ جازادى Qamshy.kz اقپارات اگەنتتىگى.

بۇل تۋرالى استاناداعى جەمقورلىققا قارسى كۇرەس ۇلتتىق بيۋرو دەپارتامەنتىنىڭ باسشىسى شىڭعىس قابدۋللا مالىمدەدى. ونىڭ ايتۋىنشا قازىرگى تاڭدا 5 مەملەكەتتىك دەڭگەيدەگى جانە 15 مەملەكەتتىك ورگان باسشىلارى تۇتقىندالعان. ازىرگە ءىستى بولعان شەندىلەردىڭ ەسىمدەرى قۇپيا قالىپ وتىر.

- شەندىلەر اسا ءىرى كولەمدەگى پارا الۋ كەزىندە ۇستالدى. زاماناۋي قۇرالداردىڭ كومەگىمەن سىبايلاس جەمقورلىق قىلمىستارىن انىقتاۋدا وڭ اسەر مەن ديناميكاعا قول جەتكىزىپ وتىرمىز. بەس ايدا 4 ميلليارد تەڭگە مەملەكەتكە قايتارىلدى.  بۇل تەك قالالىق دەپارتامەنتتىڭ كورسەتكەن ناتيجەسى، - دەدى دەپارتامەنت باسشىسى.

بەلگىلى ساياساتتانۋشى تالعات قالييەۆ اتالمىش وقيعا بويىنشا ءوزىنىڭ تەلەگرام پاراقشاسىندا پىكىر ءبىلدىردى. 

"32 شەندىنىڭ تۇتقىندالۋى نەنى بىلدىرەدى؟ قۇپيانى ۇزاق ساقتاۋدى ادەت قىلماعان سول جاق جاعالاۋدىڭ تۇرعىندارى تۋرالى ايتىلعاندا ءار كۇدىكتىنىڭ جاساعان قىلمىسىن اشكەرەلەيتىن ايعاقتاردى جيناۋ وڭاي شارۋا ەمەس. ءىستى بولعانداردىڭ ەسىمى ءالى جۇمباق كۇيدە قالىپ وتىر. ياعني، ۇلتتىق بيۋرو ءوتىپ جاتقان جەدەل تەرگەۋ شارالارىندا تولىق قۇپيا رەجيمدى ساقتاپ وتىر دەگەن ءسوز.

بۇل ءتاسىلدى سىبايلاس جەمقورلىققا قارسى كۇرەس اگەنتتىگىنىڭ جاڭا باسشىسى اليك شپەكبايەۆ پەن ۇلتتىق بيۋرو ءتوراعاسى قايرات سۋنتايەۆتىڭ ەرەكشە قولتاڭباسى دەپ باعالاۋعا بولادى. بۇل ءتاسىل سول جاعالاۋداعىلاردى ەسەڭگىرەتىپ تاستادى. 

پرەزيدەنتتىڭ اگەنتتىك باسشىسىمەن جۋىردا وتكىزگەن كەزدەسۋىندە وسى تەرگەۋ جۇمىستارى تۋرالى تاپسىرما بەرىلگەنىن جوققا شىعارا المايمىز. قازىرگى جاعدايدا بۇل تاپسىرما ىقپالدى قورعاۋشىسى، مىقتى تۋىستارى بار شەندىلەرگە قارسى باعىتتالعان ساياسي ارەكەتكە اينالىپ وتىرعانى ءسوزسىز. 

تۇتقىندالعان شەندىلەر مەن ولاردىڭ قورعاۋشىلارى كىمدەر؟ بۇل تۋرالى كەشىرەك بىلەمىز. ءقازىر اگەنتتىكتىڭ ەل قىزىعۋشىلىعىن تۋدىرىپ جاتقان ارەكەتىنە كەدەرگى كەلتىرۋگە بولمايدى. ماعان ولاردىڭ بۇل ءستيلى ۇنايدى"، - دەپ جازدى ساياساتتانۋشى.

ەستەرىڭىزگە سالساق، وسىعان دەيىن مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ باسشىسى اليك شپەكبايەۆ Facebook-تا جەمقورلىق ارەكەتتەرى تۋرالى حابارلاعان قازاقستاندىقتارعا 730 دوللار كولەمىندە سىياقى بەرۋدى ۋادە ەتكەن بولاتىن. سونىمەن قاتار، جەلىدە كۆازيمەملەكەتتىك سەكتوردىڭ ءىرى كوشباسشىلارى تۇتقىندالعانى ءسوز بولعان ەدى.