قىتايدا شىۇ سامميتىندە جىبەك جولى حالىقارالىق عىلىم اكادەمياسىن قۇرۋ جونىندەگى قۇجاتقا قول قويىلدى دەپ حابارلايدى Qamshy.kz اقپارات اگەنتتىگى. 

شىۇ ەلدەرىنىڭ مادەني، گۋمانيتارلىق جانە عىلىمي ىنتىماقتاستىعى اياسىندا نازاربايەۆ پەكيندە وتكەن جىلى قوزعالعان حالىقارالىق جىبەك جولىنىڭ حالىقارالىق عىلىم اكادەمياسىن قۇرۋ جونىندەگى باستاماسىن جۇزەگە اسىرۋعا باسا نازار اۋداردى.

«بۇگىن 30-عا جۋىق ەلدەردىڭ عىلىمي ينستيتۋتتارىنىڭ وكىلدەردى اتالمىش عىلىم اكادەمياسىن قۇرۋ جونىندەگى قۇجاتقا قول قويدى. سونىمەن قاتار، عالىمدار «ءبىر بەلدەۋ، ءبىر جول» جوباسىن عىلىمي-ساراپتامالىق تۇرعىدان قولداۋعا دايىن»، - دەدى ەلباسى شىۇ-عا مۇشە مەملەكەتتەر باسشىلارىنىڭ كەڭەيتىلگەن وتىرىسىندا.

نۇرسۇلتان نازاربايەۆ قازاقستان رەسپۋبليكاسىنىڭ كونفەسسياارالىق كەلىسىم سالاسىنداعى ماڭىزدى تاجىريبەسى مەن ءتۇرلى مادەنيەت پەن وركەنيەتتەر ديالوگىن دامىتۋعا قوسقان ۇلەسىن اتاي وتىرىپ، سامميتكە قاتىسۋشىلاردى بيىل استانادا 10-11 قازاندا «ءدىن ليدەرلەرى ءقاۋىپسىز الەم ءۇشىن!» اتتى ۇرانمەن وتەتىن VI الەمدىك جانە ءداستۇرلى ءدىن ليدەرلەرىنىڭ سەزىنە شاقىردى.

سونىمەن قاتار، نازاربايەۆ جيىن بارىسىندا قازاقستان جاھاندىق جانە وڭىرلىك تۇراقتىلىقتى قامتاماسىز ەتۋ ءۇشىن ۇنەمى كۇش جۇمساپ جاتقانىن اتاپ ءوتتى.

«قازاقستان اۋعانستاننىڭ ەكونوميكالىق تۇرعىدان تۇراقتى جانە ءقاۋىپسىز دامۋىن قولدايدى. وسىعان بايلانىستى ءبىز كوپتەگەن جىلدار بويى كابۋلعا قارجىلاي كومەك كورسەتىپ كەلەمىز»، - دەدى مەملەكەت باسشىسى.

جيىن بارىسىندا سيرياداعى داعدارىستى رەتتەۋ جونىندەگى استاناداعى كەلىسسوزدەر پروسەسى وسى ەلدە بەيبىتشىلىككە قول جەتكىزۋدىڭ ءتيىمدى تەتىگى ەكەنى ايتىلدى.

«قازاقستان كورەيا تۇبەگىنىڭ يادرولىق قارۋسىزدانۋىن تەك قانا  بەيبىت جولمەن جۇزەگە اسىرۋدى قولدايدى. يران يادرولىق باعدارلاماسى بويىنشا كەلىسىم جاساسۋعا تۇراقتى تۇردە قولداۋ كورسەتىپ وتىرامىز. ءبىز بىرلەسكەن كەشەندى ءىس-قيمىل جوسپارىن قولدايمىز جانە ودان ءارى ىسكە اسىرۋ جولىندا جۇمىس جاسايمىز»، - دەدى ن.نازاربايەۆ.

مەملەكەت باسشىسى شىۇ ءتوراعاسى شي جين پيڭ-گە شىۇ-داعى تابىستى باسشىلىعى ءۇشىن العىس ايتتى جانە قىرعىزستانعا وسى لاۋازىمنىڭ جەمىستى بولۋىنا تىلەكتەستىك ءبىلدىردى.

«ۇيىمنىڭ تابىسى نەگىزىنەن كەلىسىلگەن ىس-ارەكەتتەرىمىزگە، الەمدىك جانە ايماقتىق كۇن تارتىبىندەگى وزەكتى ماسەلەلەرگە كوزقاراستارىمىزعا بايلانىستى. وسى بايلانىس ارقىلى ءبىز ءوز زامانىمىزدا تۋىنداعان كەز كەلگەن ءقاۋىپ قاتەرگە دەر كەزىندە جاۋاپ بەرە الامىز دەپ سەنەمىن»، - دەدى قازاقستان پرەزيدەنتى.