اقش پرەزيدەنتى دونالد ترامپ كانادادا وتكەن "ۇلكەن سەگىزدىك" ءسامميتىنىڭ قورىتىندى كومميۋنيكەسىنە قول قويماۋ تۋرالى اقش وكىلدەرىنە تاپسىرما بەرگەن. ترامپتىڭ Twitter الەۋمەتتىك جەلىسىندەگى جازباسىنا قاراعاندا، مۇنداي شەشىمدى ول سامميت قورىتىندىسى بويىنشا وتكەن باسپا ءسوز ءماسليحاتىندا كانادا پرەمەر-مينيسترى دجاستين تريۋدونىڭ اقش-تىڭ حالىقارالىق ساۋدا ماسەلەلەرىنە قاتىستى ۇستانىمىن، سونىڭ ىشىندە مەتالل ونىمدەرىنە باج سالىعىن ەنگىزۋىن تاعى دا سىناعان سوڭ قابىلداعان.
تريۋدونىڭ مالىمدەمەسىن "ادىلەتسىز" دەپ اتاعان ترامپ، اقش الگىندەي شارانى كانادا مەن باسقا ەلدەردە امەريكالىق تاۋارعا شەكتەۋ قويىلعاندىقتان سولارعا جاۋاپ رەتىندە قابىلداعانىن ايتقان.
G7 سامميتىندە اقش پەن سەرىكتەس ەلدەر اراسىندا حالىقارالىق ساۋدا ماسەلەلەرىنەن بولەك عالامدىق كليماتقا قاتىستى دا كەلىسپەۋشىلىك بولعان. سامميتكە قاتىسۋشىلار ترامپتىڭ "ۇلكەن جەتىلىك" قاتارىنا رەسەيدى قايتا قوسۋ تۋرالى يدەياسىن دا قولداماعان.
بۇعان دەيىن كانادا پرەمەرى تريۋدو "ۇلكەن جەتىلىك" ەلدەرى – اقش، كانادا، فرانسيا، گەرمانيا، يتاليا، ۇلىبريتانيا مەن جاپونيا ءسامميتتىڭ قورىتىندى كومميۋنيكەسىنە قاتىستى كەلىسىمگە كەلگەنى تۋرالى مالىمدەگەن. قۇجاتتا بارلىق ەلدەردىڭ ءبىرىڭعاي ەرەجەگە سۇيەنەتىن ەركىن ساۋداعا بەيىل ەكەندىگى ايتىلعان.
الايدا پرەزيدەنت ترامپ ءسامميتتىڭ اياقتالۋىن كۇتپەستەن كەتىپ قالعان. مۇنى ول ماۋسىمنىڭ 12-ىندە سينگاپۋردە وتەدى دەپ جوسپارلانعان سولتۇستىك كورەيا ليدەرى كيم چەن ىنمەن كەزدەسۋىنە دايىندالۋ قاجەتتىگىمەن تۇسىندىرگەن.
