قازاقستان پرەزيدەنتى نۇرسۇلتان نازاربايەۆ ءۇش كۇنگە جالعاسقان قىتايعا ساپارىن قورىتىندىلاپ، جۋرناليستەرمەن بريفينگ وتكىزدى، دەپ حابارلايدى Qamshy.kz اقپارات اگەنتتىگىنىڭ ءتىلشىسى.
بريفينگ بارىسىندا ەلباسى ساپاردىڭ ماڭىزى مەن ونداعى تالقىلانعان ماسەلەلەرگە توقتالىپ ءوتتى. بيىلعى جىلى اقش-تان باستاپ، رەسەيگە جالعاسقان ساپارلارىنىڭ قورىتىندىسىن ايتا كەتىپ، قىتايعا ساپارىنىڭ ءساتتى اياقتالعانىن مالىمدەدى.
– بيىلعى جىلدىڭ جارتىسى اياقتالىپ كەلەl3. بىرنەشە ساپار بولدى. العاشقىسى قاڭتارداعى اقش-قا ساپار. ول ەستە قالاتىن ەلەۋلى ماسەلە. ءىرى كاسىپكەرلەرمەن كەزدەسىپ، ەكى ەلدىڭ اراسىندا 9 ملرد-قا جۋىق قاراجاتقا قول قويىلدى. ىلە-شالا سولاردىڭ كاسىپكەرلەرى قازاقستانعا كەلىپ، ءبىزدىڭ ءىس جالعاسىن تاپتى. كەيىن رەسەي پرەزيدەنتىمەن كەزدەستىك. ەكى ارادا بىرنەشە ماسەلە، اسىرەسە بايقوڭىرداعى قازاقستاننىڭ قاتىناسۋى ءسوز بولدى. بايقوڭىردىڭ ءبىر بولىگىندە "بايتەرەك" دەگەن باعدارلامانى جۇزەگە اسىرىپ، 2022 جىلدان باستاپ ءتيىستى زىمىران ىسكە قوسىلادى. قازاقستاندا جەر سەرىگىن جاسايتىن زاۋىت سالىنىپ جاتىر. ونىڭ ۇستىنە رەسەيدىڭ باسىنا تۇسكەن قيىنشىلىقتارعا بايلانىستى باتىستىڭ كوپ كومپانياسى قازاقستان ارقىلى جۇمىس ىستەۋدەن ءۇمىتتى، بۇل ءبىز ءۇشىن اسا ءتيىمدى، - دەدى نازاربايەۆ.
سونىمەن قاتار قىتايمەن اراداعى قارىم-قاتىناستىڭ ماڭىزدىلىعىنا توقتالىپ ءوتتى.
– وسى جولى قىتايعا كەلدىك. تاۋەلسىزدىك العانعا دەيىن ەكى ەل اراسىندا ەشقانداي قارىم-قاتىناس بولعان جوق. كەرىسىنشە سوۆەت وداعى مەن جۇڭگو اراسى شيەلەنىسىپ تۇردى. ەكى اراداعى شەكارادا، اسىرەسە جالاڭاشكولدە بىرنەشە ادام ءولدى. سوڭعى 20 جىلدىڭ ىشىندە ەكى ەلدىڭ اراسىنداعى قارىم قاتىناس ەداۋىر جاقساردى. شەكارا جونىندەگى كەلىسىمگە قول قويىلدى. شەكارادا 6 ەلدىڭ باسشىلارى كەزدەسىپ، شانحاي ۇيىمىن قۇرۋ تۋرالى كەلىسىمگە كەلدى. كەيىن ەكونوميكالىق بايلانىس جونىندە ءسوز قوزعاپ، شىۇ قۇرىلدى. يدەيانى العا تارتۋشىلاردىڭ ءبىرى قازاقستان بولدى. مۇنىوزدەرى بىلەدى، قاشان دا ايتىپ وتىرادى، - دەي كەلە ەلباسى ءسامميتتىڭ ناتيجەلى قورىتىندىسىن اتاپ ءوتتى.
– جۇڭگو ءتوراعاسىنىڭ شاقىرۋىمەن كەلگەن رەسمي ساپار وتە ناتيجەلى بولدى. تاريحي XIX پارتيانىڭ سەزى ءوتتى. ۇلكەن ماسەلەلەر تالقىلاندى. 2049 جىلى قحر-دىڭ تاۋەلسىزدىك العانىنا 100 جىل تولادى. سول جىلى ءبىزدىڭ "قازاقستان - 2050" ستراتەگيامىز سەكىلدى جۇڭگو دا دامىعان ەڭ الدىڭعى قاتارداعى مەملەكەتتەردىڭ تىزىمىنەن كورىنۋدى كوزدەپ وتىر. ەكىنشىدەن، بۇرىن جۇڭگو ارزان تاۋارلاردى شەتكە شىعاراتىن ەل بولىپ سانالسا، ءقازىر ناعىز تەحنولوگيالىق ءارى بۇگىنگى زامانعا ساي عىلىمي تاۋارلاردى ەكسپورتتاماق. ءقازىردىڭ وزىندە قىتايدى اقش-تان كەيىنگى ەكونوميكاسى دامىعان ەل رەتىندە تانيمىز. قىتايدىڭ بۇگىنگى تەحنولوگياسى باتىستان ارتىق بولماسا، كەم ەمەس. ءبىز ءۇشىن دە قولايلى. بۇرىندارى مەن يندۋستريالىق باعدارلامالاردى ورىنداۋ ءۇشىن قوندىرعى كەرەك، زاۋىتتار كەرەك ەكەنىن ايتقانمىن، سوعان بايلانىستى ءبىز 28 ملرد دوللار كولەمىندەگى 51 وبەكتىگە قول قويعان ەدىك. ءقازىر جاڭا 40 وبەكتىگە قول قويىلدى، - دەدى ەلباسى ءوز سوزىندە.
